1 Daudi avakonganisi kangi manjolinjoli vakekesi elufu selasini vevamanyi kutova ngondo. 2 Daudi awukili na vandu vaki vakahamba ku Baali Yuda kulitola Lisandu la Lilaganu la Bambu Chapanga, lelikemiwa kwa liina la Bambu Chapanga mweanamakakala, mwaitama pa chigoda chaki cha unkosi panani ya viumbi vyevivi na magwaba. 3 Hinu, vakalitola Lisanduku la Bambu Chapanga kuhuma mu nyumba ya Abinadabu yeyavili ku chitumbi, vakalivika panani ya mutuka yamupya ya kuhutwa na falasi. Uza na Ahio vana va Abinadabu valongosayi mutuka yeniyo, 4 Ahio agendayi palongolo ya lisanduku lenilo. 5 Daudi na vandu voha va Isilaeli, vakayimba na kukina kwa makakala gavi goha palongolo ya Bambu Chapanga. Vatovili ng'oma zezatenganizwi kwa mvinje, lilimba na kanjeke na ng'oma na liseve na matoazi.

6 Pavahikili paluvanja lwa kupepetela mabenu lwa ku Nakoni, Uza akalikamula Lisanduku la Lilaganu la Chapanga muni ng'ombi zila zakuvandwiki. 7 Bahopo ligoga la Bambu Chapanga likavya ndava ya Uza. Chapanga akamkoma balapala. Uza akafwa pamuhana ya Lisanduku la Lilaganu la Bambu Chapanga. 8 Daudi ayomili muni Bambu Chapanga amkomili Uza ndava ya ligoga. Ndi pandu pala pikemiwa Pelesi Uza mbaka lelu.

9 Ligono lenilo Daudi amyogwipe Bambu Chapanga, akajova, "Hinu nene yati nihotola wuli kulitola na kutama nalu Lisanduku la Bambu Chapanga?" 10 Hinu Daudi apeliki lepi Lisanduku la Lilaganu ku muji wa Daudi, nambu alipeliki ku nyumba ya Obedi Edomu, mundu wa muji wa Giti. 11 Lisanduku lenilo la Bambu Chapanga latamili ku nyumba ya Obedi Edomu kwa lukumbi lwa miyehi hidatu, ndi Chapanga akammotisa Obedi Edomu pamonga na vandu va munyumba yaki.

12 Nkosi Daudi peayuwini kuvya Chapanga ammotisi Obedi Edomu pamonga vindu vyoha vyeavi navyu ndava ya Lisanduku la Chapanga, akahamba kulitola Lisanduku la Lilaganu mu nyumba ya Obedi Edomu na kulipeleka ku muji wa Daudi kwa sangaluka. 13 Vandu vala vevagegi Lisanduku la Bambu Chapanga pevagendili hatuwa sita, Daudi akavayimamisa, akawusa teta ya kutinyiswa ng'ombi yigosi na mpapakasi mweakulupili. 14 Daudi akinili palongolo ya Bambu Chapanga kwa makakala gaki goha kuni awalili kagwanda kahupi ka chimteta. 15 Hinu, mwene na Vaisilaeli voha valipeliki Lisanduku la Lilaganu la Bambu Chapanga ku muji wa Daudi kwa sangaluka na kwa kupula mapenenga.

16 Lisanduku la Bambu Chapanga pelayingila mu muji wa Daudi, Mikali msikana wa Sauli alingulili pa lidilisha amuweni nkosi Daudi ihumbahumba na kukina palongolo ya Bambu Chapanga, ndi akamvevesa mu mtima waki. 17 Kangi vayingisi Lisanduku la Bambu Chapanga mugati ya lindada lealiyimiki Daudi na kulivika pandu paki. Ndi Daudi akawusa luteta lwa kutinyisa na luteta lwa uteke palongolo ya Bambu Chapanga. 18 Daudi peamali kuwusa luteta lwa kutinyisa na luteta lwa uteke, akavamotisa vandu kwa lihina la Bambu Chapanga mweavi na makakala goha. 19 Mewa akavagavanisila yakulya vandu voha vagosi na vadala, kila mundu akampela chipandi cha nyama na libumunda na libumunda la zabibu ziyumu. Ndi vandu voha vakawuka, kila mundu akawuya ku nyumba yaki.

20 Daudi peawuyili ku nyumba yaki ndava ya kuvamotisa vandu va mu nyumba yaki, Mikali msikana wa Sauli akahuma kuvala, akahamba kumpokela, akamjovela cha kumvevesa, "Lola lelu nkosi wa Isilaeli cheajipelili soni kwa kujigubukula nyula zaki palongolo ya vatumisi vaki vagosi na vadala ngati mundu mweahimwiki chaihula nyula zaki palongolo ya vandu changali kuwona soni."

21 Daudi akamjovela Mikali, "Nikalikina paongolo ya Bambu Chapanga mweanihagwili nene na kumleka dadi waku na vandu va munyumba yaki. Anikitili nivya mtalalila wa vandu vaki va Izilaeli. Hinu nene yati niyendelela kukina ndava ya kumtopesa Bambu Chapanga. 22 Yati nikujihelesa neju kuliku hinu. Veve yati ukuniwona chindu lepi, nambu vatumisi venavo veukuvajova yati vakunitopesa."

23 Hinu Mikali msikana wa Sauli apatili lepi mwana mbaka peafwili.