1 Nkosi Daudi peatamayi mu nyumba yaki ya chinkosi, Bambu Chapanga akamkita atama cha uteke kutali na makoko vaki voha. 2 Nkosi Daudi amjovili mlota Natani, "Lola, nene nitama mu nyumba yeyijengiwi kwa mikongo ya mielezi, kuni Lisanduku la Bambu Chapanga litama mu lindanda."

3 Natani akamjovela nkosi, "Hamba ukakita chochoha chauholalela mu mtima waku, muni Bambu Chapanga avi pamonga na veve." 4 Nambu kilu yilayila Bambu Chapanga akamjovela Natani, 5 "Hamba ukamjovela mtumisi wangu Daudi, Bambu Chapanga ijova naa, ‘Wu, veve yati ukunijengela nene nyumba ya kutama? 6 Tangiya ligono lila penavawusili Vaisilaeli ku mulima wa Misili mbaka lelu nitami lepi mu nyumba. Nigendili kila pahali kuni nitama mu lindanda. 7 Pandu popoha penahambili na Vaisilaeli, niwayili lepi kumkota chilongosi yoyoha wa Izilaeli mwenamulagizi avayunga vandu va Izilaeli, ndava kyani anijengili lepi nyumba ya mielezi?’"

8 Hinu Chapanga akayendelela kujova, "Mjovela mtumisi wangu Daudi, Bambu Chapanga mweavi na makakala goha ijova naa, ‘Nakuwusili kudasi kwewadima mambelele, muni uvatalalila vandu vangu va Isilaeli. 9 Kuhumila lukumbi lwenulwo navi pamonga na veve kwokwoha kwewahamba, na navakomakisi vamakoko vaku voha palongolo yaku. Hinu yati nikulikita liina laku livya likulu ngati mahina ga vakulu vangi va pamulima. 10 Nene yati nikuvapela vandu vangu va Isilaeli pandu pa kutama na yati nikuvavika mwenumo muni vatama pandu pavi vene, vakotoka kung'ahiswa kangi. Vandu vahakau yati vakuvatesa lepi kavili ngati chavavakitili kadeni, 11 tangiya penavahagwili vahamula ndava ya vandu vangu va Isilaeli. Nene yati nikuyangalila kuhumila kwa vamakoko vaku voha. Pagenago goha, nene Bambu Chapanga nikujovela kuvya yati nikujengela nyumba. 12 Ligono leufwayi na kuzikwa mu matinda ga vagogo vaku, nene yati nikumkita mwana mmonga pagati ya vana vaku veve wamwene avya nkosi, na nene yati nikuukangamalisa unkosi waki. 13 Mwene yati akunijengela nyumba ndava ya liina langu, na nene yati nikuukangamalisa unkosi waki magono goha gangali mwishu. 14 Nene yati nivya dadi waki na mwene yati ivya mwana wangu. Akakita gahakau yati nikumbuna ngati dadi cheakuvabuna vana vaki kwa ndonga. 15 Nambu uganu wangu wewangamalika yati nikuuwusa lepi kwaki ngati chenauwusili kwa Sauli, mwenamuwusili palongolo yaku. 16 Vandu va munyumba yaku na unkosi waku yati nikuukita uvya magono goha gangali mwishu. Chigoda chaku cha unkosi yati chivya chechikangamili magono goha gangali mwishu.’"

17 Natani amjovili Daudi mambu goha geajoviwi na Bambu Chapanga mu maono.

18 Kangi nkosi Daudi akayingila mugati mu Lindanda palongolo Bambu Chapanga, akatama pahi na kuyupa, "Veve Bambu Chapanga, nene ndi yani, na vandu vangu ndi kiki hati kunikwiha ngati naa chenivili nene hinu? 19 Lijambu lenili lavii lidebe pamihu paku, veve Bambu Chapanga, pamonga na genago uvaahidili vandu va munyumba yangu mambu gavaha mu miyaka yamahele yeyibwela, na unilangisi mambu ga viveleku vyevibwela, veve Bambu Chapanga. 20 Nikujovela kyani neju, nene Daudi mtumisi waku? Muni veve Bambu Chapanga, Chapanga wangu umanyili nene ndi namuhengaji waku! 21 Ngati chewaahidili na kwa kugana kwaku wamwene, ukitili mambu goha gavaha muni unikita nene mtumisi waku nivya nigamanya. 22 Veve Bambu Chapanga mweuvili na makakala goha, veve ndi mkulu kuliku vandu voha. Kawaka mweavili ngati veve, veve ndu ndi Chapanga. Mambu goha getigayuwini kukuvala veve ndi gachakaka. 23 Kawaka vandu pamulima vevihotola kuwananiswa na vandu vaku va Isilaeli. Veve wahambili kuvagombola kuhuma ku Misli muni vavya vandu vaku. Veve Bambu Chapanga wajikitili liina na kukita mambu gavaha na gakukangasa. Ukavavinga vandu va milima hingi na michapanga yavi palongolo ya vandu vaku. 24 Uvakangamalisi vandu vaku va Isilaeli ndava yaku wamwene, muni vavya vandu vaku magono goha gangali mwishu, na veve uvi wa Bambu Chapanga, Chapanga wavi.

25 Hinu, veve Bambu Chapanga, utimilisayi chila chawajovi ndava ya nene mtumisi waku na ndava ya vandu va munyumba yangu, uvakangamalisa magono goha gangali mwishu ngati chewaahidili. 26 Liina laku yati lilumbiwa magono goha gangali mwishu, na vandu yati vijova, ‘Bambu Chapanga mweavi na makakala goha ndi Chapanga panani ya Isilaeli.’ Vandu va munyumba yangu nene Daudi mtumisi waku, yati vikangamaliswa palongolo yaku. 27 Muni veve Bambu Chapanga mweuvi na makala goha, Chapanga wa Isilaeli, unigubukuli nene mtumisi waku, pewajovili, ‘Yati nikujengela nyumba.’ Chenicho ndi chechikunipela mtima wa kuyupa genaga palongolo yaku changali kutotokela.

28 Hinu veve Bambu Chapanga, veve ndi Chapanga, lukumbi lwoha utimilisa ahadi zaku, na veve uniahidili nene mtumisi waku lijambu lenili labwina. 29 Hinu nikuyupa umotisayi chiveleku changu nene mtumisi waku chisindimala magono goha palongolo yaku, muni veve Bambu Chapanga waahidili chenicho, mewa mumota zaku vandu va munyumba yangu yati vimotiswa magono goha gangali mwishu."