1 Ligono limonga, Daudi akakota, "Wu, avi mundu yoyoha mweasigali mumi pagati ya vandu va munyumba ya Sauli? Ngati avili nigana kumuhengela gabwina ndava yalilaganu lenavikili na Yonatani."

2 Kwavili na mtumisi mmonga munyumba ya Sauli mweakemiwayi Siba. Vakamjovela ahamba kwa Daudi. Nkosi Daudi amkotili, "Veve ndi Siba."

Mwene akayangula, "Ena ndi nene mtumisi waku."

3 Nkosi akamkota, "Wu, kawaka mundu yoyoha mweasigalili mumi munyumba ya Sauli? Ngati avi nigana kumuhengela ubwina wa Chapanga."

Siba akamyangula, "Avi mwana wa Yonatani, nambu mwene ana chilema cha magendelu."

4 Nkosi Daudi akamkota, "Avi kwoki?"

Siba akayangula, "Avi ku nyumba ya Makili mwana wa Amieli ku Lo Debali."

5 Hinu nkosi Daudi akavatuma vandu vakamleta, na mwene akaletwa kuhuma kunyumba ya Makili mwana wa Amieli ku Lo Debali.

6 Hinu, Mefibosheti mwana wa Yonatani, mjukulu wa Sauli akahamba kwa nkosi Daudi, akafugama palongolo ya nkosi Daudi. Daudi akamkemela, "Mefibosheti." Na mwene akamyangula, "Ena, nene apa mtumisi waku."

7 Nkosi Daudi akamjovela, "Kotoka kuyogopa. Nene yati nikuhengela gabwina ndava ya dadi waku Yonatani. Ndima yila yoha yeyavi ya gogo waku Sauli yati nikuwuyasila. Na veve magono goha yati wilya pamonga na nene munyumba yangu."

8 Mefibosheti akagundama, na kujova, "Nene ndi ngati libwa lelifwili, ndava kyani unihengela gabwina genago?"

9 Kangi, nkosi Daudi akamkemela Siba mtumisi wa Sauli, akamjovela, "Vindu vyoha vyevyavili vya Sauli na vandu va munyumba yaki nimpelili Mefibosheti, mjukulu wa mkulu waku. 10 Veve na vana vaku na vatumisi vaku yati mukumlimila Mefibosheti na kumletela mabenu muni mjukulu wa mkulu waku avya na chakulya magono goha. Nambu mwene yati ilya pamonga na nene munyumba yangu." Siba avi na vana vagosi kumi na muhanu na vatumisi ishilini.

11 Penapo Siba akamjovela nkosi, "Nene mtumisi waku yati nikita chindu chochoha cheukunijovela." Hinu Mefibosheti alyayi chakulya chaki munyumba ya Daudi ngati mmonga wa vana va nkosi.

12 Mefibosheti avi na mwana mdebe mgosi mweakemewa Mika. Vandu va munyumba ya Siba vakavya vatumisi va Mefibosheti. 13 Hinu, Mefibosheti mweavili na chilema cha magendelu gaki goha atamayi ku Yelusalemu na kulya chakulya chaki munyumba ya nkosi magono goha.