1 Kwavili na ngondo magono gamahele pagati ya vandu vevawungini na vandu va munyumba ya Sauli, na vala vevawungini na Daudi. Daudi ayendalili kupata makakala, nambu upandi wa Sauli wayendalili kupunguka makakala.

2 Vana vevavelekiwi kwa Daudi vavi, Amnoni ndi mveleka waki wa kutumbula, nyina waki avi Ahinohamu mweahumalili ku Yezeeli, 3 Kileabu avi mvelekwa wa pili, nyina waki avi Abigaili, lipwela la Nabali mweahumalili ku Kalimeli na Abisalomu avi mvelekwa waki wa datu, nyina waki avi Maaka, msikana wa Talimai nkosi wa Geshuli, 4 Adoniya mvelekwa waki wa mcheche, nyina waki akemiwa Hagiti, na Shefatia mvelekwa waki wa muhanu, nyina waki akemiwa Abitali, 5 na Isilimu, mvelekwa waki wa sita, nyina waki akemiwi Egila. Daudi aveleki vana vagosi voha ava peavili ku Hebuloni.

6 Ngondo payayendalili pagati ya vandu va Daudi na vandu va munyumba ya Sauli, Abineli ayendalili kuvya na makaka neju pagati ya vandu va munyumba ya Sauli.

7 Sauli peavili mumi avii na mdala wa kuvala mmonga mwaikemiwa Lisipa msikana wa Aiya. Hinu ligono limonga Ishibosheti akamkota Abineli, "Ndava kyani ugonili na mdala wa kuvala wa dadi wangu?" 8 Abineli akayoma neju ndava ya malovi ga Ishibosheti, akajova, "Wu, uholalela nene nihotola kumng'anamukila Sauli na kuuhengela mulima wa Yuda? Wu, uholalela nene nikuvahengela vandu va lukolo lwa Yuda? Lola, nene nikumyidakila dadi waku Sauli, na valongo vaki na vamkozi vaki na nikuyungili ukotoka kubuniwa na Daudi mbaka lelu. Pamonga na genago goha lelu ukuniwona nene kuvya nibudili ndava ya mdala mwenuyu. 9 Chapanga anibuna ngati yati nikita lepi mambu goha Chapanga geamuahidili Daudi. 10 Bambu Chapanga amlapalili Daudi kuvya akuutola unkosi kuhuma mulukolo lwa Sauli na kumpela mwene. Na mwene yati ilongosa Isilaeli na Yuda kuhuma ku Dani mbaka ku Belisheba." 11 Ishibosheti alingili lepi kumyangula chochoha, muni amyogopa neju Abineli.

12 Hinu, Abineli akavatuma vajumbi kwa Daudi, ku Hebuloni vakamjovela, "Wu, mweanamakakala ga kuutalalila mulima uwu ndi yani? Kita lilaganu na nene, na nene yati nikutangatila uyitalalila Isilaeli yoha."

13 Daudi akamyangula, "Chabwina, yati nikita lilaganu na veve. Nambu nikuyupa chindu chimonga, peubwela uganikiwa uniletela hoti mdala wangu Mikali msikana wa Sauli, na penapo ndi yati niyidakilana na veve." 14 Mewa Daudi atumili vajumbi kwa Ishibosheti mwana wa Sauli kujova, "Niwuyasila mdala wangu Mikali mwenamgegili kwa posa ya makumba miya yimonga ga mahona ga Vafilisiti." 15 Hinu, Ishibosheti atumili vandu vakamtola Mikali kuhuma kwa Palitieli mngana waki, mwana wa Laishi. 16 Nambu Palitieli akahamba pamonga na mdala waki kuni ipita kuvemba njila yoha mbaka ku Bahulimu. Abineli akamjovela Palitieli, "Wuya kunyumba." Na mwene akawuya.

17 Abineli alongili na vagogo va Isilaeli, akavajovela, "Mulukumbi lutali mwaganayi neju Daudi avya nkosi winu. 18 Hinu mukita lijambu lenilo, muni Bambu Chapanga amulapalili Daudi kwa kujova, ‘Kupitila veve Daudi mtumisi wangu, yati nikuvasangula vandu vangu va Isilaeli kuhuma mumawoko ga Vafilisiti na yati nikuvasangula kuhuma kwa vamakoko vavi vangi.’" 19 Abineli na mwene mewa alongili na vandu va likabila la Benyamini, kangi akahamba mbaka ku Hebuloni kumjovela Daudi kuvala gala goha gevayidakilini kukita vandu voha va Isilaeli na vandu voha va likabila la Benjamini.

20 Abineli peahambi kwa Daudi kula ku Hebuloni ahambili na vandu ishilini, na Daudi akavakitila mselebuko. 21 Abineli akamjovela Daudi, "Nene yati nihamba kuvakonganesa vandu voha va Isilaeli ndava yaku veve bambu wangu nkosi, ndava vahotola kukita lilaganu na veve muni uvya nkosi wavi, na veve yati ukuvatalalila voha ngati chaugana." Penapo Daudi akamlaga Abineli muni ahamba, na mwene akahamba cha uteke.

22 Daudi peamalili ndu kumlaga Abuneli ahamba cha uteke, Yoabu na vandu vangi va Daudi vawuyili kuhuma ku ngondo, kuni vagegili vindu vyamahele vyevatolili. Hinu Abineli avili lepi pamonga na Daudi ku Hebuloni muni Daudi amali kumlanga na kuhamba. 23 Yoabu peawuyili pamonga na manjolinjoli vaki voha, vandu vakamjovela kuvya Abineli mwana wa Neli abwelili kumlola nkosi Daudi, na mwene amlekili ahambayi cha uteke. 24 Yoabu akamuhambila nkosi na kumjovela, "Hinu ukiti kyani? Lola Abineli abweli kwaku, ndava kyani umleki ahambayi? 25 Wu, umanyi lepi kuvya Abineli mwana wa Neli abweli kukukonga? Abwelili kulolokesa mipangu yaku na gala geukita."

26 Yoabu peahumili kulongela na Daudi, akatuma vajumbi vamulandayi Abineli, na vene vamkolili pa chiliva cha Sila, vakamuwuyisa, nambu Daudi amanyi lepi lijambu lenilo. 27 Abineli peawuyili ku Hebuloni, Yoabu amkemili pamuhana ya limlyangu ngati igana kulongela nayu chimfiyu. Yoabu akamuhoma Abineli mgoha pa lutumbu muni amkomili Asaheli mwavi mlongo waki, na Abineli akafwa. 28 Mwanakandahi Daudi payuwini mambu ago akajova, "Nene na unkosi wangu Chapanga amanyili kuvya tihokili lepi kuvala ngasi ya Abineli mwana wa Neli. 29 Kubuda kwa kukomiwa kwa Abuneli kuvya panani ya Yoabu na vandu va dadi waki! Vandu va Yoabu vavya na utamu wa chisonono, na utamu wa mabudi amala mwaigendela mkongojo, amala kukomiwa kwa upanga, amala vakosa chakulya." 30 Yoabu na mlongo waki Abishani vamkomili Abineli muni amkomi mlongo wavi Asaheli lukumbi lwa ngondo ku Gibeoni.

31 Kangi, nkosi Daudi akamlagiza Yoabu na vala vevavi pamonga nayu, vapapula nyula zavi, vawala magunila ndava ya kumvembenekela Abineli. Lukumbi lwa kumzika Abineli, nkosi Daudi agendayi mumbele ya vandu vevagegili higa ya Abineli. 32 Abineli azikiwi ku Hebuloni na nkosi amvembenikili kwa lwami pamuhana ya litinda, kangi vandu voha na vene mewa vakavemba. 33 Daudi ayimbili lunyimbu ulu lwa kumvembenekela Abineli, akajova, "Yivi wuli mbaka Abineli kufwa ngati mundu mweahimwiki?

34 Mawoko gaku gakungiwi lepi na magendelu gaku gakungiwi lepi.

Ufwi ngati mundu muhakau!"

Vandu voha vamvembenikili.

35 Daudi abelili kulya chakulya ligono loha la malilu, hinu vandu voha vahambili kumyupa Daudi alya chakulya, nambu Daudi alapili akavajovela, "Chapanga anikoma ngati yati nilya chakulya amala chindu chochoha kwakona lilanga langatipama." 36 Vandu voha vagaweni mambu genago vakaganiswa. Vandu vaganiswi na kila chindu cheakitili nkosi. 37 Hinu ligono lenilo Vaisilaeli voha vamanyili kuvya nkosi Daudi awungini lepi na Yoabu kumkoma Abineli mwana wa Neli. 38 Nkosi Daudi akavajovela vatumisi vaki, "Wu, mmanyili lepi kuvya lelu mundu mkulu na mweimanyikana afwili pa Isilaeli? 39 Hati ngati nene na nkosi mweninyunyiziwi mahuta na Bambu Chapanga, lelu nikujiwona nina makakala lepi. Vana ava va Seluya vakuning'aha. Bambu Chapanga avahamula vandu venava vahakau ndava ya uhakau wevakitili!"