1 Yoabu ajoviwi kuvya nkosi Daudi ivemba na kuvembeneka ndava ya kufwa kwa Abusalomu. 2 Ndava yeniyo, luheku lwa uhotola lwang'anamwiki kuvya kuvembeneka kwa manjolinjoli voha va Daudi ligono lenilo, muni vayuwini kuvya nkosi ivembeneka ndava ya mwana waki. 3 Ligono lenilo vakawuya ku muji chinunu, ngati vamanjolinjoli veviwona soni ndava ya kutila ngondo. 4 Nkosi akajigubika pamihu paki na kuvemba kwa lwami luvaha, kuni ijova, "Yoyo mwana wangu Abusalomu! Yoyo Abusalomu, mwana wangu!"

5 Yoabu akahamba ku nyumba ya nkosi na kumjovela, "Lelu utipeli soni tavandu vaku tavoha, vandu vevasangwili wumi waku na wumi wa vasongolo vaku na wa vasikana vaku na wa vadala vaku na wa vadala vaku va kuvala. 6 Veve uvagana vala vevakuvenga na uvavenga vala vevakugana. Hinu ulangisi hotohoto kuvya vakulu va manjolinjoli vaku na vandu vavi vana mana lepi kwa veve. Nilola kuvya, lelu ngati Abusalomu ngeivya mumi, na tete tavoha ngativili tifwili, veve ngauhekalili. 7 Hinu yimai uhamba ukavapolesa mtima vatumisi vaku. Muni nilapila kwa Bambu Chapanga kuvya ngati uhamba lepi kuvapolesa mitima, kawaka hata mmonga mwaisigalila pamonga na veve kilu iyi. Lijambu lenili yati livya mbunu uvaha kwa veve kuliku gahakau goha gegakupatili kuhuma usongolo waku mbaka lelu." 8 Ndi nkosi akayima, akahamba na kutama papipi na lilyangu la muji. Vandu voha pevayuwini kuvya nkosi atamili pa mlyangu, vakamuhambila kuhuma kunyumba zavi.

Lukumbi lwenulo Vaizilaeli voha vevavili pamonga na Abusalomu vajumbalile ku nyumba zavi.

9 Vandu va makabila goha ga Izilaeli vakalijovesana vene kwa vene, kuni vijova, "Nkosi Daudi atigombwili mumawoko ga vamakoko vitu, atigombwili mu mawoko ga Vafilisti. Nambu hinu aujumbili mulima, amtila Abusalomu. 10 Hinu mwenuyo Abusalomu mwetamunyalili mahuta avyai nkosi witu, hinu akomiwi ku ngondo. Hinu ndava kyani tilongelela lepi kuvala kumuwuyisa nkosi Daudi?"

11 Nkosi Daudi atumili ujumbi kwa vamteta Sadoki na Abiathali kuvya, "Muvakotayi vagogo va ku Yuda, ‘Ndava kyani nyenye muvyai va mwishu kumuwuyisa nkosi ku nyumba yaki ya chinkosi? Mambu goha gevajovili Vaizilaeli voha, gamuhikalili nkosi. 12 Nyenye ndi mwavalongo vangu, nyenye na nene gogo witu mmonga, ndava kyani muvyai vamwishu kuniwuyisa nene nkosi?’ 13 Mumkotayi mewa Amasa, ‘Wu, veve na nene gogo witu mmonga lepi? Kangi Chapanga anikomayi ngati yati nikukita lepi uvya mkulu wa vamanjolinjoli vangu pahala pa Yoabu.’" 14 Daudi ayikitili mitima ya vandu voha va ku Yuda himuyidakila vakavya ngati mundu mmonga. Hinu vakampelekela ujumbi weujova, "Wuya kunyumba, veve na vatumisi vaku voha."

15 Hinu nkosi atumbwili kuwuya, na peahikili ku mfuleni Yolodani, vandu va ku Yuda vahambili ku Giligali kumpokela nkosi, kangi vakamyombosa mu mfuleni Yolodani. 16 Shimei mwana wa Gela wa likabila la Benjamini kuhuma ku Bahulimu, akabwela kanyata muni awungana na vandu vangi kumpokela nkosi Daudi. 17 Shimei ahambili pamonga na Vabenyamini elufu yimonga kuni valongosini na Siba mtumisi wa vandu va munyumba ya Sauli, pamonga na vana vaki kumi na vatumisi ishilini, vahambili kanyata ku mfuleni Yolodani kwakona na nkosi Daudi. 18 Vakayomboka mfuleni kuvahindakisa vandu va nkosi kuyomboka na kukita kila chindu chaigana nkosi.

Nkosi peavi papipi kuyomboka mfuleni Yolodani, Shimei mwana wa Gela akabwela akafugama na kugundama mbaka pahi cha kutopesa palongolo ya nkosi. 19 Shimei akamjovela nkosi, "Chondi Bambu wangu nkosi, nikuyupa ukoto kukumbuka kuhoka kwenakukitili ligono lila lewawukili ku Yelusalemu. Kotoka kugavika mu mtima waku. 20 Nene mtumisi waku nimanyili kuvya nibudili, ndi mana lelu namundu wa kutumbula wa likabila la Yosefu, kubwela kukupokela veve bambu wangu nkosi."

21 Abishai mwana wa Seluya akajova, "Shimei yikumgana akomiwayi ndava muni ampeli likoto mundu yula mweahaguliwi na Bambu Chapanga kwa kumnyunyusila mahuta avya nkosi."

22 Nambu Daudi akamjovela Abishai na Yoabu muhaja waki, "Yani mweakujovili unitangatilayi? Ugana kuniletela matatizu? Hinu nene ndi nkosi wa Izilaeli na kawaka Muizilaeli mweakomiwayi lelu." 23 Nkosi akamjovela Shimei, "Veve yati ukomiwa lepi." Nkosi akamlapila Shimei.

24 Mefibosheti mjukulu wa Sauli, akabwela kumpokela nkosi Daudi. Asanjili lepi magendelu gaki amala kuketa manjwemba gaki amala kuchapa nyula zaki kuhuma ligono lila nkosi peawukili ku Yelusalemu mbaka ligono leawuyili cha uteke. 25 Lukumbi Mefibosheti peawukili ku Yelusalemu kubwela kumpokela nkosi, nkosi akamkota, "Mefibosheti, ndava kyani wahambili lepi pamonga na nene?"

26 Mefibosheti akayangula, "Mkulu wangu nkosi, ngati chaumanyili nene mtumisi waku nina chilema, namjovili mtumisi wangu anitandikila lipunda niwukayi pamonga na veve. Nambu Siba mtumisi wangu aning'anamukili. 27 Hinu anijovalili kwa veve nkosi. Nambu veve nkosi wangu uvi na luhala ngati mtumu wa Chapanga, hinu kitayi chochoha cheuchiwona chabwina. 28 Valongo voha va vadadi wangu vavi vandu veviganikiwa kukomiwa njwee palongolo yaku, mkulu wangu nkosi. Nambu wanivikili nene mtumisi waku pagati ya vala vevilya pamonga na veve munyumba yaku. Wu, niganikiwa kuyendelela kujitetela palongolo yaku veve nkosi?"

29 Nkosi akamuyangula, "Ndava kyani ujova gengo goha? Nimali kulagiza veve na Siba mugavana migunda ya Sauli."

30 Mefibosheti akamjovela nkosi, "Mleka Siba atolayi migunda yoha yivya yaki mwene, chabwina kwa nene ndi kukuwona veve nkosi uwuyili bwina ku nyumba."

31 Balizilai wa kuhuma ku Gileadi, mewa akabwela kuhuma ku muji wa Logelimu kumuhindikisa nkosi kuyomboka mfuleni Yolodani. 32 Balizilai avi mgogolo neju, avi na myaka semanini. Avi na vindu vyamahele neju na ampelili nkosi chakulya lukumbi lwoha lweatamili ku Mahanaimu. 33 Nkosi Daudi akamjovela Balizilai, "Tihambai pamonga na nene ku Yelusalemu, na yati nikuyangalila."

34 Nambu Balizilai akamyangula nkosi, "Nina magono lepi gamahele ga kuvya mumi, ndava kyani nihambai pamonga na veve nkosi ku Yelusalemu? 35 Nene nina myaka semanini, nihotola kusiganisa gabwina na gahakau? Wu, nihotola kumanya kunoga kwa chakulya amala mnyweso? Wu, nihotola kuyuwanila bwina lwami lwa vayimbaji vagosi na vadala? Ndava kyani nene mtumisi waku nivya mzigu kwaku veve bambu wangu nkosi? 36 Nene mtumisi waku yati niyomboka na veve mfuleni Yolodani na kukuhindikisa chidogo mbaka. Nambu ndava kyani nkosi ukunipela njombi yeniyi yivaha. 37 Nikuyupa unileka nene mtumisi waku niwuya muni nifwilila mu muji wangu namwene papipi na litinda la dadi na nyina wangu. Nambu avii peapa mwana mtumisi waku Kimihamu, mleka ayomboka na veve bambu wangu nkosi. Umuhengelayi chochoha cheuwona veve chabwina."

38 Nkosi akamuyangula, "Nene yati nihamba na Kimihamu na kumkitila chochoha chechikuganisa. Na chindu chochoha chewigana nikukitila, yati nikukitila." 39 Ndi Daudi na vandu vaki voha vakayomboka mfuleni Yolodani. Nkosi amkumbatili chauganu na kummotisa Balizilai, na mwene Balizilai akawuya ku nyumba yaki.

40 Lukumbi nkosi peayombwiki mfuleni kuhamba ku Giligali, Kimihamu akayomboka nayu. Vandu voha va Yuda na yapinga ya vandu va Isilaeli vamuhindikisayi nkosi. 41 Kangi vandu voha va Isilaeli vakabwela kwa nkosi na kumjovela, "Ndava kyani valongo vitu vandu va Yuda vakutolili chimfiyu pewavili mu njila, na vakakuyombosa mfuleni Yolodani, veve na vandu va myumba yaku, pamonga na vandu vaku voha?"

42 Vandu va ku Yuda vakavayangula vandu va Izilaeli, "Takitili chenicho muni nkosi ndi mlongo witu. Ndava kyani muyoma ndava ya lijambu lenili? Wu, tilili chindu chochoha cha nkosi? Wu, atipelili njombi yoyoha?"

43 Vaisilaeli vakavayangula vandu va Yuda, "Daudi iganikiwa kuvya nkosi witu mala kumi neju kuliku nyenye. Ndava kyani mwativevisi? Wu, tete tavi lepi va kutumbula kujova kuvya nkosi witu awuyiswayi?"

Nambu vandu va Yuda valongili malovi ga kuvinisa kuliku vandu va ku Isilaeli.