1 Hinu Bambu Chapanga akamtuma mlota Natani kwa Daudi. Natani akamuhambila Daudi na kumjovela, "Kwavili na vagosi vavili ku muji umonga, mmonga avili na vindu vyamahele na yungi avi mngangu. 2 Mwana vindu vyamahele yula avi na mambelele gamahele na ng'ombi zamahele neju. 3 Nambu mngangu yula avi na limbelele limonga lidala lidebe lealigulili. Akaliyunga na likakula munyumba yaki pamonga na vana vaki. Chakulya chilachila cheilya mwene ndi chealipelili limbelele laki, na chikombi cheanywelelayi mwene ndi chichocho chelanywelela limbelele laki. Mewawa limbelele lenilo lagonayi mu mawoko gaki. Limbelele lenilo lavi ngati msikana waki mngangu mwenuyo. 4 Ligono limonga mwana vindu vyamahele yula ahikiwi na myehe. Ndi mwanavindu vyamahele aganili lepi kutola limbelele laki limonga amala ng'ombi yaki amuhinjila myehe waki, nambu akahamba kumnyaga mngangu yula limbelele waki na kumuhijila myehe waki."

5 Daudi peayuwini genago, akayoma ndava ya mundu mwanavindu vyamahele. Akamjovela mlota Natani, "Nilapa kwa Bambu Chapanga mweavi mumi kuvya mundu mwakiti lijambu lenilo iganikiwa akomiwayi! 6 Yiganikiwa amlipa mngangu yula mambelele mcheche ndava ya limbelele lila leamunyagili, ndava muni akiti lijambu lihakau na avi lepi na lipyana!"

7 Natani akamjovele Daudi, "Mundu mwene ndi veve! Hinu Bambu Chapanga wa Isilaeli, ijova naha, ‘Nene nakunyalili mahuta uvya nkosi wa Isilaeli na nikakusangula mmawoko ga Sauli. 8 Nakupelili unkosi wa Sauli na vasikana vaki vavya vadala vaku, nikakukita uvya nkosi wa Isilaeli na Yuda. Ngati genago gavili gadebe kwaku, nganikuyongasili neju ya genago. 9 Ndava kyani, uvevisi lilovi langu nene Bambu Chapanga na kukita uhakau uwu palongolo yangu? Umkomili Ulia mundu wa likabila la Vahiti ku ngondo kwa upanga, umtoli mdala waki avya mdala waku. Uvakiti Vaamoni vamkoma Ulia ku ngondo! 10 Hinu, ndava muni univevisi umtoli mdala wa Ulia mund wa likabila la Vahiti avya mdala waku, kufwa kwa kukomana yati kuwuka lepi mu uveleku waku.’ 11 Chenichi ndi cheijova Bambu Chapanga, ‘Lola, yati nileta mang'aiso kwa vandu va munyumba yaku wamwene. Yati nikuvatola vadala vaku kuni wilola na kumpela mgosi wa papipi yaku, na mwene yati igona navu pawaka. 12 Veve wakitili lijambu lenilo chimfiyu, nambu nene yati nikita muhi kuni Vaisilaeli voha vilola.’"

13 Hinu, Daudi akamjovela Natani, "Nimbudili Bambu Chapanga."

Natani akamjovela, "Bambu Chapanga akulekekisi kubuda kwaku na veve yati ufwa lepi. 14 Nambu ndava ya chenichi cheukitili chivakita vamakoko va Bambu Chapanga vamvevesayi neju, mwana waku mwaivelekwayi yati ifwa." 15 Kangi nasani akawuya kunyumba yaki.

Bambu Chapanga amtovi mwana wa Daudi mweaveliki na Batisheba mweavi mdala wa Ulia, na mwene akavya mtamu.

16 Daudi amyupi Chapanga muni mwana alama. Akajihinisa chakulya na akahamba ku chumba chaki akagona pahi changatandika chindu kilu yoha. 17 Vatumisi vakulu va munyumba yaki vakamyupa ayimuka, nambu mwene abelili, na alili lepi chakulya chochoha pamonga nawu. 18 Pelapiti lijuma limonga mwana yula akafwa. Vatumisi wayogwipi kumjovela Daudi kuvya mwana afwili, muni vaholalili, "Mwana mwenuyo peavii mumi, talongi nayu, nambu atiyuwanili lepi. Hinu yati tikumjovela wuli kuvya mwana waki afwili? Pangi yati akujilemasa."

19 Daudi pealoli vatumisi vaki vinong'onelana, akamanya kuvya mwana afwili. Ndi akavakota, "Wu, mwana afwili?"

Vene vakamyangula, "Ena! Afwii."

20 Kangi, Daudi akayima kuhuma pahi, akasamba, na kunyala mahuta na kuwala nyula zingi. Kangi akahamba kunyumba ya Bambu Chapanga na akamfugamila. Kangi akawuya ku nyumba yaki akayupa chakulya, vakampela akalya. 21 Vatumisi vaki vakamkota, "Lijambu ng'ani lenili leukitili? Mwana peavi mumi, veve wajihinisi na kumvembela. Nambu afwili uyimwiki na kulya chakmlya."

22 Daudi akavayangula, "Chakaka mwana peavi mumi, najihinisi na kuvemba. Nakitili chenicho muni naholali kuvya, ‘Yani imanya? Pangi Bambu Chapanga nganihengili lipyana na kumleka mwana avya mumi.’ 23 Nambu hinu afwili, ndava kyani nijihinisayi? Wu, nene nihotola kumuwuyisa pa mulima? Ligono limonga yati nihamba kwenuko kweahambili, nambu mwene ihotola lepi kuwuya kuni kwanivii nene."

24 Kangi Daudi akampolesa mtima Batisheba mdala waki. Akagona nayu, ndi akavya na ndumbu na kuveleka mwana mgosi, Daudi amkemili mwana mwenuyo Solomoni. Bambu Chapanga amganili mwana mwenuyo. 25 Bambu Chapanga amtumili mlota Natani kwa Daudi kuvya amkemela mwana mwenuyo Yedidia mana yaki mweaganiwi na Bambu Chapanga.

26 Lukumbi lwenulo, Yoabu atovini na vandu va muji wa Vaamoni, weukemewa Laba, ndi akautola muji wenuwo wa chinkosi 27 Yoabu akatuma ujumbi kwa Daudi, akajova, "Nivatovili vandu va muji wa Laba, na nitolili chinyepa chavi cha manji. 28 Hinu vatola manjolinjoli voha vevasigalili, muutindila muji na kuutola chimakakala. Nambu ngati nikautola nene, yati ukemiwa kwa liina langu" 29 Hinu, Daudi akatola manjolinjoli vaki voha akahamba ku Laba, akauzangila na kuutola muji wenuwo. 30 Kangi Daudi akatola litaji la chinkosi la zahabu kuhuma pa mutu wa chimong'omong'o cha mchapanga Moleki wa Vaamoni. Utopa wa litaji lenilo wavii kilo selasini na muhanu, mugati yaki mwavili na liganga la mashonga gamahele. Hinu Daudi atolili liganga lenilo la mashonga gamahele, akalivika mu litaji laki la chinkosi. Mewa atolili vindu vyamahele neju kuhuma mu muji wenuwo. 31 Kangi avatolili vandu va muji wenuwo, akavavika vahenga lihengu kwa kutumila misumeno na sululu na mavagu na kuvatumila kuhenga lihengu palitanulu la matofali, chenicho ndi cheayikitili miji yoha ya Vaamoni. Pagenago Daudi na manjolinjoli vaki voha vakawuya ku Yelusalemu.