1 Daudi peahegalili palongolo chidogo kuhuma pachituvilu cha chitumbi akakonganeka na Siba mtumisi wa Mefibosheti akumlindila, akampokela kuni avi na punda zaki zivili zezitandikwi kuni zigegi mabumunda miya zivili na keki miya yimonga zezitenganizwi kwa zabibu ziyumu na keke miya yimonga zezitenganizwi kwa tini na kahaku ka chikumba kekamemii divayi. 2 Nkosi Daudi akamkota Siba, "Ndava kyani uletili vindu ivi?"

Siba akamyangula, "Punda ndi ndava ya kukwela vandu va munyumba yaku, mabumunda na matunda yati vilya vandu voha na divayi ndava ya kuvasangalusa vandu vevitotokela kulukongolo."

3 Kangi nkosi akamkota "Avi kwoki Mefibosheti mjukulu wa mkulu waku?"

Siba akamyangula nkosi, "Mwene asigali ku Yelusalemu muni iholalela kuvya vandu va Isilaeli yati vakumuwuyasila unkosi wa Sauli gogo waki."

4 Nkosi akamjovela Siba, "Vindu vila vyevyavili vya Mefibosheti hinu ndi vindu vyaku."

Siba akamjovela, "Usengwili mkulu wangu, nene niyupa niyidakiliwa palongolo yaku magono goha bambu wangu nkosi."

5 Lukumbi nkosi Daudi peahegalili ku Bahulimu, ahumalili mundu mmonga wa lukolo lwa Sauli, liina laki Shimei mwana wa Gela, mundu mwenuyo akatumbula kumpela likoto Daudi changaleka. 6 Shimei akavajugumila maganga Daudi na vatumisi vaki, pamonga kuvya valonda vamtindila kuupandi wa mangeha na wa kulyelela. 7 Shimei ampelili likoto na kujova, "Wuka! Hamba uko! Veve mweukoma vandu! Veve mwewangaganikiwa kwa chindu chochoha! 8 Bambu Chapanga akulipisili mbunu ndava ya vandu voha va munyumba ya Sauli vewavakomili, na utolili unkosi waki. Hinu Bambu Chapanga ampelili unkosi Abusalomu mwana waku. Lola, wenuwu ndi mwisu waku veve wamukomaji."

9 Ndi Abishai, mwana mau mweikemiwa Seluya, akamjovela nkosi, "Veve mkulu, ndava kyani mundu uyu mweavii ngati libwa lelifwili akupela likoto? Leka nene nihamba nikamdumula mutu waki!"

10 Nambu nkosi akavajovela, "Ndi kuna kyani pagati yangu na nyenye mwavana va Seruya? Yikavyai Bambu Chapanga amjovili Shimei, ‘mpela Daudi likoto,’ wu, ndi yani hinu ihotola kukota, ‘Ndava kyani ikita chenichi?’ " 11 Kangi nkosi Daudi akamjovela Abishai na vatumisi vaki voha, "Yikavya mwana wangu namwene igana kunikoma, yivya wuli kwa mundu uyu wa likabila la Benyamini? Nyenye mumlekayi anipela likoto muni Bambu Chapanga amulagazili anipela likoto. 12 Pangi Bambu Chapanga yati ilola kubuda kwangu na mwene yati akunilipa gabwina ndava ya likoto lenipewili lelu." 13 Hinu nkosi Daudi na vandu vaki vakayendelela na lugendu lwavi kuchitumbi na shimei agendayi mumihana ya chitumbi kulolesana na Daudi kuni akumtagila nkosi Daudi maganga na lububu. 14 Kangi nkosi pamonga na vandu vaki voha vevavi pamonga na mwene, vakahika mumihana ya mfuleni Yoludani kuni vatotokili neju. Ndi vakapumulila.

15 Lukumbi lwenulo, Abusalomu na vandu voha va ku Isilaeli vakahamba ku muji wa Yelusalemu, na Ahitofeli avi pamonga na vene. 16 Hushai kuhuma ku Aliki, mkozi wa Daudi, akamuhambila Abusalomu, akamjovela, "Uvyai na wumi utali! Utama wumi wa magono gamahele nkosi!"

17 Absolamu akamkota Hushai, "Wu, Wenuwu ndi ubwina waku weuyendelela kusindimala weukumlangisa mkozi waku Daudi? Mbona wahambili lepi pamonga na mkozi waku?"

18 Hushai akamyangula, "Lepi! Muni yula mweahaguliwi na Bambu Chapanga, na mweahaguliwi na vandu ava na vandu voha va ku Isilaeli, mwenuyo ndi mwenivya pamonga naku. 19 Neju ya genago, nene nimuhengela yani? Wu, lepi mwana wa bambu wangu? Yati nikukuhenela veve ngati chenamuhengelayi dadi waku."

20 Hinu Abusalomu akamujovela Ahitofeli, "Hinu tivili peapa, unijovela tikita kyani?"

21 Ahitofeli akamjovela Abusalomu, "Hambayi ukagona na vadala va kuvala va dadi waku veavalekili vayangalila nyumba ya chinkosi. Ndi vandu voha va ku Isilaeli peviyuwana kuvya veve umuyomisi dadi waku, penapo vandu voha vevavi pamonga na veve yati vipata makakala." 22 Hinu vandu vakatendekela lindanda ku chituvilu ya nyumba ya nkosi ndava ya Abusalomu, na mwene akagona na vadala va kuvala va dadi waki, kuni vandu voha va ku Isilaeli vakuvawona.

23 Magono genago, chochoha cheajovili Ahitofeli chawonakini ngati ajoviwi na Chapanga. Mewa chayidakiliwi na Daudi pamonga na Abusalomu.