1 Mukutumbula kwa mwaka wa mupya, lukumbi vankosi pevahambayi kutovana ngondo, Daudi amtumi Yoabu na vakulu va manjolinjoli vaki pamonga na manjolinjoli va Izilaeli. Vakavakomakesa Vaamoni na kuutindila muji wa Laba. Nambu Daudi asigalili ku Yelusalemu.

2 Ligono limonga muhi, Daudi ayimwiki pa chitanda akahamba kunani ku golofa ya nyumba yaki ya chinkosi. Peagendayi ku golofa kwenuko, amuweni mdala mmonga isamba ku nyumba yaki, mdala mwenuyo anyambili neju. 3 Daudi amtumi mundu akakota mdala mwenuyo ndi yani. Mundu yula akamjovela "Mdala mwenuyo ndi Betisheba msikana wa Eliabu, na ndi mdala wa Ulia kuhuma mu likabila la Vahiti." 4 Ndi Daudi atumili vajumbi vamleta. Hinu Betisheba akabwela kwa Daudi, na mwene akagona nayu, mdala mwenuyo ahumi kujinyambisa ndava ya kuseka ngasi, kangi akawuya kunyumba yaki. 5 Badayi mdala mwenuyo akajimanya kuvya ana ndumbu, hinu akatuma ujumbi kwa Daudi kuvya avi na ndumbu yaki.

6 Hinu, Daudi akamtumila Yoabu ujumbi akajova, "Mtuma Ulia kuhuma mu likabila la Vahiti abwela kwa nene." Na mwene Yoabu akamtuma Ulia ahamba kwa Daudi. 7 Ulia peahiki kwaki, Daudi amkotili kumvala Yoabu na vandu voha mewa kuvala ngondo. 8 Kangi Daudi akamjovela Ulia, "Wuya kunyumba yaku ukapumulila chidogo." Ulia akawuka muyumba ya nkosi, lukumbi lulalula nkosi akampelekela njombi. 9 Nambu Ulia awuyili lepi kunyumba yaki, nambu agonili pa limlyangu la nyumba ya chinkosi pamonga na valonda va nkosi. 10 Daudi peajoviwi kuvya Ulia ahambili lepi ku nyumba yaki, Daudi amkotili Ulia, "Veve uwuyili ndu kuhuma ku ngondo, wavili lepi pa nyumba mu magono gamahele, ndava kyani uhambi lepi kunyumba yaku?"

11 Ulia akamyangula Daudi, "Lisanduku la Lilaganu, pamonga na manjolinjoli voha va Isilaeli na Yuda vitama mu mandanda ku ngondo. Mkulu wangu Yoabu na vatumisi vaki voha vagoni ku lukongolo. Wu, chabwina nene kuhamba kunyumba nikalyai na kunywa na kugona na mdala wangu? Nene nilapa palongolo yaku, nihotola lepi kukita chindu ngati chenicho."

12 Kangi Daudi akamjovela Ulia, "Hinu tama penapa lelu, chilau yati nikuleka uhamba." Hinu ligono lenilo Ulia asigalili pamuji wa Yelusalemu, na ligono lelalandili, 13 Daudi amgongolili Ulia munyumba yaki kulya na kunywa, akamkita Ulia agala. Hati naha, kilu yila Ulia ahambi lepi kunyumba yaki, nambu agoni pampasa waki pamonga na valonda va nkosi waki.

14 Lukela lwaki, Daudi ayandiki balua akampela Ulia ayipeleka kwa Yoabu. 15 Mubalua yeniyo daudi ayandiki naha, "Mvika Ulia palongolo pandu peyikolaniki neju ngondo, nyenye muhegelela mumbele asigalila mwene muni atoviwa mbaka kufwa." 16 Hinu Yoabu peauzangila muji, amviki Ulia pandu peamanyili kuvya pavi na manjolinjoli vakekesi va vamakoko. 17 Vakolonjinji va muji wenuwo vahumili mu muji wavi kubwela kutovana na manjolinjoli vevalongwiswi na Yoabu. Vatumisi vangi va Daudi vakomiwi, na Ulia wa kuhuma mu likabila la Vahiti mewa akomiwi.

18 Kangi Yoabu apeliki ujumbi kwa Daudi kumjovela mambu goha gegahumalili ku ngondo. 19 Yoabu amlagizi mtumisi mweamtumili, "Peumalayi kumjovela nkosi mambu goha kuvala ngondo, 20 nkosi ihotola kuyoma, na ihotola kukukota, ‘Ndava kyani pemwatovanayi mwahegalili papipi na muji? Mwamanyi lepi kuvya ngavahotwili kuvatova na nduta kuhuma mu luwumba lwa muji wavi? 21 Yani amkomili Abimeleki mwana wa Yelubasheti? Wu, mdala lepi mmonga pa muji wa Tebesi mweamgwisili liganga la kuyagila kuhuma mu luwumba ndi likamukoma Abimeleki? Ndava kyani hinu, mwaluhegalili luwumba?’ Akakukotayi chenichi veve mjovela naha, ‘Hati mtumisi waku Ulia wa likabila la Vahiti na mwene mewa afwili.’"

22 Mjumbi yula akahamba kwa Daudi na kumjovela goha gealagizwi na Yoabu agajova. 23 Mjumbi yula akamjovela Daudi, "Makoko vitu vatizidili makakala, vakahuma kuvala ya muji na kutizangila ku lukongolo. Hati naha tete tavavingasini mbaka ku limlyangu la muji wavi. 24 Kangi vevajugumila nduta vatijugumili tete vatumisi vaku kuhuma mu luwumba. Vatumisi vaku vangi vakomiwi. Hati mtumisi waku Ulia kuhuma mu likabila la Vahiti mewa afwili."

25 Daudi akamjovela mjumbi yula, "Mjovela naha Yoabu, ‘Lijambu lenili likotoka kukung'aha muni upanga uvi lepi na mihu, ngondo yikoma mundu yoyoha yula. Mkangamala na muvatova vandu va muji wenuwo na muutola muji wenuwo.’ Ukamjovela Yoabu chenicho muni umkangamalisa mtima."

26 Batisheba mdala wa Ulia peayuwini kuvya mngana waki afwii, amvembenikili mgana waki. 27 Magono ga malilu pegamaliki, Daudi amtolili Batisheba akamleta pa mu nyumba yaki, akavya mdala waki, na mwene Batisheba akamvelekela Daudi mwana mgosi. Nambu lijambu lenilo leakitili Daudi lamganisi lepi Bambu Chapanga.