1 Pa genago, nkosi Daudi akavazangila kangi Vafilisiti na kuvahotola. Akautola muji wa Metigi Ama kuhuma kwa Vafilisiti.

2 Kangi Daudi avahotwili manjolinjoli va Vamoabu. Avavikili mu msitali vandu veavakamwili na kuvagoneka pahi. Akalagiza vala vevavilimu misitali hivili vakomiwayi na vala vevavili mu msitali wa datu vavaleka mumi. Hinu Vamoabu vakavya vatumisi vaki Daudi na vakavya vakumlipa kodi.

3 Mewa Daudi amuhotwili Hadadezeli mwana wa Lehobu, nkosi wa muji wa Soba weuvi mu mulima wa Vaalamu. Daudi ahotwili lukumbi Hadadezeli peavii munjila kuhamba kuwuyisa pandu pa mfuleni Efulati muni pavya mu utalalila waki. 4 Daudi avakamwili vakwela falasi alufu yimonga na miya saba, na manjolinjoli vevagenda kwa magendelu alufu ishilini. Kangi Daudi akadumula misekete ya magendelu ga mumbele falasi vevahuta mutuka, nambu azilekili falasi miya yimonga zezahuta mutuka.

5 Vaalamu va ku Damasiko pevahamba kumtangatila Hadadezeli, nkosi wa Soba, Daudi avazangili na kuvakoma Vaalamu elufu ishilini na mbili. 6 Kangi Daudi avikili kambi za ngondo ku muji wa Vaalamu va ku Damasiko. Hinu Vaalamu vakavya vatumisi vaki na vakavya vakumlipa kodi. Bambu Chapanga amkitli Daudi ahotola kwokwoha kweahambili. 7 Daudi atolili vingwamba vya zahabu vyevagegili vakulu va manjolinjoli va Hadadezeli na kuzipeleka Yelusalemu. 8 Mewa atoli shaba zamahele neju kuhuma ku miji ya Beta na ku Belotai, miji yeyatalaliwi na Hadadezeli.

9 Toi nkosi wa ku Hamati, peayuwini kuvya Daudi auhotwili msambi wa manjolinjoli ga Hadadezeli, 10 amtumili Yolamu mwana waki ahamba kwa nkosi Daudi kumsengusa ndava ya kumuhotola Hadadezeli. Muni nkosi Hadadezeli na nkosi Toi vavi vamakoko na vene vatovini ngondo pamahele. Yolamu ampelekili Daudi njombi zamahele za vindu vya madini ga feza na vya zahabu na vya shaba. 11 Daudi awusili njombi zenizo zivya ndava ya Bambu Chapanga, pamonga na madini ga feza na zahabu zeazitolili kuhuma ku milima yoha yeayihotwili, 12 milima yeninyo ndi, Edomu na Moabu na Amoni na Filisitia na amaleki, pamonga na vindu vyeavitolili kwa nkosi Hadadezeli, mwana wa Lehobu nkosi wa Soba.

13 Daudi amanyikini neju peawuyili kuhuma kuvakoma Vaedomu alufu kumi na nane ku Likemba la Mwinyu. 14 Daudi avikili kambi ya manjolinjoli pamulima woha wa Edomu. Na Vaedomu voha va kwenuko vakavya vatumisi vaki. Bambu Chapanga amuhotwisi Daudi kuhotola kwokwoha kweahambili.

15 Hinu Daudi atalalili Isilaeli yoha, na mwene akavahamula vandu vaki voha ngati cheyaganikiwi changali kumpendelela mundu. 16 Yoabu mwana wa Seluya, avi mkulu wa manjolinjoli. Yehoshafati mwana wa Ahiludi, avili muyandikaji wa mambu gegahumalili. 17 Sadoki mwana wa Ahitubu na Ahimeleki mwana wa Abiatali, vene vavii vamteta. Selaya avii muyandikaji wa libanji la muhalu. 18 Benaya mwana wa Yehoyada avii chilongosi wa Vakeleti na Vapeleti vevavi valonda va Daudi, na vana va Daudi vakavya vevakuvatangatila vandu kulanda mihilu ya chinkosi.