1 Ligono limonga Yonatani mwana wa nkosi Sauli amjovili msongolo mweigega vindu vyaki vya ngondo, "Bwela tiyomboka kumwambu ku kambi ya Vafilisiti." Nambu Yonatani amujovili lepi dadi waki. 2 Sauli avii atamili pahi ya chimuwili cha mkomamanga ku Migiloni, kuvala ya muji wa Gibea, penapo avii na manjolinjoli mia sita. 3 Pagati yavi avili Ahiya, mweawalili kakoti kahupi ka chimteta, mwenuyo avili mwana wa Ahiatibu mulongo waki Ikabodi, mwana wa Finehasi na mjukulu wa Eli, mteta wa Bambu Chapanga wa ku Shilo. Kawaka mundu mweamanyili kuvya Yonatani awukili pa kambi.

4 Mundila yeaganikiwayi kupita Yonatani ndava ya kuhika pevaviki kambi Vafilisiti mwavili na matalau gavili gegavi na mihelelu ikali, upandi uwu na upandi wungi. Litalau limonga lakemiwa Bosesi na litalau lingi lakemiwa Sene. 5 Muhelelu umonga wavili ku upandi wa kasikazini kuni ulolesana na muji wa Mikimashi na muhelelu wungi wavili ku upandi wa kusini kuni ulolesana na muji wa Gibea.

6 Yonatani akamujovela msongolo yula mweamugegili vindu vyaki vya ngondo, "Bwela tihambayi ku upandi wungi wa kambi ya vandu vevangadumuliwa jandu. Pangi Bambu Chapanga yati akutitangatila, muni Bambu Chapanga isangula lepi ndava ya umahele amala udebe wa vandu."

7 Msongolo mweamugegela vindu vya ngondo yula akamujovela, "Ena! Nene nivii pamonga na veve muni maholo gaku giwanangana na maholo gangu."

8 Yonatani akamjovela, "Ena, mpangu wangu ndi uwu, yati tiyomboka na kuvahambila vandu vala muni vatiwonayi. 9 Ngati vakatijovelayi, ‘Mutilindilayi bahopo tibwela kwinu.’ Yati tiyima bahopo petivyayi yati tihamba lepi kwavi. 10 Nambu vakatijovelayi, ‘Mkwela mbwela kwitu.’ Yati tikwela muni chenicho ndi yati chivya ulangiso kuvya Bambu Chapanga atikitili tivatovayi."

11 Penapo Yonatani na msongolo yula vakahuma muni Vafilisiti vavawonayi. Kangi Vafilisiti pevavawene vakajova, "Muvalolayi vala Vaebulania vihuma mu malindi kwevajihihili." 12 Vafilisiti vevavili pa kambi vakamukemela Yonatani na msongolo mweakumugegela vindu vyaki vya ngondo, "Mukwelayi mubwela kuni muchikolele."

Yonatani akamujovela msongolo yula, "Tiyeni ukwelayi pamonga na nene, muni Bambu Chapanga yati akutitangatila tivatovayi." 13 Penapo Yonatani akakwela kunani cha kukwava, na msongolo yula akamulanda mumbele. Yonatani akavatova Vafilisiti na kuvagwisa pahi na msongolo yula apitayi kuvakomakesa. 14 Pevavatovili mala ya kutumbula, Yonatani na msongolo waki vavakomili vandu ngati ishilini ku luvanja lweluhika uvaha wa heka yapinga. 15 Manjolinjoli voha vakawehuka, na manjolinjoli vala vevavii pa kambi vakatilila ku migunda, na vala vevavii mu ulonda na vevizangila vandendemiki na ndima ya pala pevavili yikanyugusika. Bambu Chapanga ndi mweakitili kuwehuka kwenuko kuhumilayi.

16 Vamang'omesi va Sauli vevavili ku Gibea ku mulima wa Benjamini vavawene manjolinjoli vamahele vitila cha kupechengana. 17 Sauli akavajovela manjolinjoli vevavii pamonga naku, "Mujivalangayi muni timanyayi kuvya vayani vevangavya peapa." Pevamalili kujivalanga ndi vakamanya kuvya Yonatani na msongolo waki mweakumgegela vindu vya ngondo vavili lepi. 18 Sauli akamujovela mteta Ahiya, "Liletayi apa Lisanduku la Lilaganu la Bambu Chapanga." Magono genago Lisanduku la Lilaganu la Bambu Chapanga lavili kwa Vaisilaeli. 19 Lukumbi Sauli pealongelayi na mteta, lwami lwa wogohi lwa vandu vevatila lwayonjosiki neju ku kambi ya Vafilisiti. Penapo Sauli akamujovela mteta Ahiya, "Leka, kotoka kulileta Lisanduku la Lilaganu la Bambu Chapanga!" 20 Kangi Sauli na manjolinjoli vaki vakajitendekeha na kuhamba ku ngondo kukomana na Vafilisiti. Nambu vakavakolela Vafilisiti vawewiki neju, vitovana vene kwa vene kwa mapanga gavi. 21 Penapo Vaebulania vevavii ku upandi wa Vafilisiti tangia kadeni ndi vakawuka na kuhamba kuwungana na Vaisilaeli vevavili pamonga na Sauli na Yonatani. 22 Mewawa na Vaisilaeli voha vevajihihili ku mumlima wa hitumbi ya Efulaimu, pevayuwini kuvya Vafilisiti vitila, na vene mewa vakavalandalila na kuvakoma. 23 Paligono lenilo Bambu Chapanga avakitili Vaisilaeli vahotola na ngondo yikadandasika mbaka kupita ku Beti Aveni.

24 Ligono lenilo Vaisilaeli vavii legelege neju muni Sauli avalapakisi vandu akajova, "Apewa likoto mundu yoyoha mweilya chakulya lelu kwakona lilanga kutipama na kwakona nene nangavawuyasila mbunu vamakoko vangu." Hinu ligono lenilo kawaka mundu mwealili chakulya chochoha. 25 Manjolinjoli voha vakahamba kudasi, na vene vakawona wuchi uvii panani ya ndima. 26 Pavayingili mu dasi vakawona wuchi uchuluzika, nambu kawaka mundu mwealili, ndava vayogwipi likoto levalapakiswi na Sauli. 27 Nambu Yonatani avii lepi lukumbi dadi waki peavalapisayi vandu. Hinu akagolosa ndonga yeavili nayu, akayijwiga palisega la wuchi, kangi akamyanga wuchi wenuwo, na penapo akapata makakala. 28 Mundu mmonga akamjovela, "Dadi waku avalapakisi vandu na kujova, ‘Apewa likoto mundu yoyoha mweilya chakulya lelu.’ Ndi mana tivi legelege ndava ya njala."

29 Yonatani akamyangula, "Dadi wangu avang'ahili vandu! Hinu nene nivii na makakala muni nimyangili wuchi chidogo. 30 Ngati manjolinjoli vitu ngavalili chakulya chila chevanyagili kwa vamakoko vitu, ngatipatili makakala na lelu ngativakomili Vafilisiti vamahele."

31 Ligono lila Vaisilaeli vavatovili Vafilisiti, tangia ku Mikimashi mbaka ku Aiyaloni. Makakala gakavamalika Vaisilaeli ndava ya njala. 32 Hinu vakajumbalila vindu vyevavanyagili vamakoko vala, vakatola mambelele na ng'ombi zigosi vakahinja, kwakona ngasi yangamalika kuhuma mu nyofu yeniyo, vakayivaula na kulya. 33 Linjolinjoli mmonga akamujovela Sauli, "Lola vandu vakumubudila Bambu Chapanga kwa kulya nyofu yeyivi na ngasi." Sauli akavajovela vandu, "Nyenye mwavasadika lepi kwa Bambu Chapanga, mulibilindusayi liganga livaha libwela apa penivili nene." 34 Kangi Sauli akavajovela, "Muhambayi pagati ya vandu na muvajovelayi naha, kila mmonga aletayi ng'ombi na limbelele laki apa alihinjayi, aleka ngasi yihulula yoha ndi ayitendekeha na kulya. Vakotokayi kumuhokela Bambu Chapanga kwa kulya nyofu yeyivi na ngasi." Hinu kila mmonga akaleta ng'ombi yaki kilu yeniyo, akayihinja pandu pala. 35 Kangi Sauli akamujengela Bambu Chapanga pandu pa kuwusila teta, penapo ndi pavili pandu pa kutumbula pa kuwusila teta, Sauli peamujengili Bambu Chapanga.

36 Kangi Sauli akavajovela vandu, "Tihambayi tikavazangilayi Vafilisiti kilu iyi, na kuvatova na kuvanyaga vindu vyavi mbaka peyihika lukela, na yati tikotokumleka mundu yoyoha mweivya mumi." Vandu vakamujovela, "Kitayi chochoha cheuwona kuvya chabwina." Nambu mteta akavajovela, "Mulindila hoti timukota Chapanga."

37 Ndi Sauli akamukota Bambu Chapanga, "Wu, nihambayi nikavazangila Vafilisiti? Wu, petihambayi yati ukutikita tivatovayi?" Nambu Bambu Chapanga amuyangwili lepi mu ligono lenilo. 38 Sauli akajova, "Mubwelayi apa mwavachilongosi mwavoha va manjolinjoli, muni timanyayi tibudili kyani lelu. 39 Nilapa kwa Bambu Chapanga mweavii mumi na mweakuyisangula Isilaeli, yeyoha mweabudili hati ngati mwana wangu Yonatani, iganikiwa akomiwayi." Nambu kawaka mundu mweayangwili linenu loloha. 40 Penapo Sauli akavajovela Vaisilaeli voha, "Nyenye mwavoha muyimayi kula, nene na mwana wangu Yonatani yati tiyima kuni." Vene vakamuyangula, "Kitayi chochoha cheuwona kuvya chabwina."

41 Kangi Sauli akamuyupa Bambu Chapanga, akajova, "Veve Bambu Chapanga, Chapanga wa Isilaeli ndava kyani waniyangwili lepi nene namuhengaji waku? Veve Bambu Chapanga, Chapanga wa Isilaeli, ngati mwenibudili ndi nene amala mwana wangu Yonatani ndi uhamulayi kwa liganga la Ulimu. Nambu ngati vevabudili ndi vandu vaku va Isilaeli ndi uhamulayi kwa liganga la Tumimu." Penapo Yonatani na Sauli vakawonekana kuvya vahokili, nambu vandu vawonikini kuvya vahoki lepi. 42 Sauli akajova, "Mukinayi gudugudu ndava ya nene na mwana wangu Yonatani." Penapo gudugudu yikalangisa kuvya Yonatani ndi mweahokili. 43 Ndi Sauli akamujovela Yonatani, "Nijovelayi cheukitili." Yonatani akayangula, "Nalili wuchi chidogo kwa ndonga yangu. Nivii apa nijitendekihi kufwa."

44 Sauli akajova, "Bambu Chapanga anikomayi ngati veve Yonatani yati ukomiwa lepi."

45 Nambu vandu vakamujovela Sauli, "Ndava kyani Yonatani akomiwayi mundu mweavakitili Vaisilaeli vahotolayi? Yikotoka kuvya chenicho kwaki. Tilapa kwa Bambu Chapanga mweavili mumi, hati luyunju lumonga lwa mutu waki yati lugwa lepi pahi. Cheachikitili lelu ndi achikitili kwa utangatila wa Bambu Chapanga." Penapo vandu vakamusangula Yonatani na mwene akomiwi lepi.

46 Penapo Sauli akaleka kuvalandalila Vafilisiti, na vene Vafilisiti vakawuka na kukiliwuka ku mulima wavi.

47 Sauli peavili nkosi wa Isilaeli, akakomana na vamakoko vaki va pandi zoha. Akomini na Vamoabu na Vaamoli na Vaedomu na vankosi va Soba na Vafilisiti. Kila mweatovini nayu ndi amuhotwili. 48 Akatovana chikekesi na akavahotola Vaamaleki. Akavasangula Vaisilaeli kuhuma kwa vandu vevavazangili.

49 Vana vagosi va Sauli ndi vavii Yonatani na Ishivi na Maliki Shua. Na vana vadala vavii vavili, mvelekanu wa kutumbula akemiwa Melabu na mbena waki akemiwa Mikali. 50 Mdala wa Sauli akemiwa Ahinoamu mwana wa Ahimaasi. Mkulu wa manjolinjoli va Sauli akemiwayi Abuneli, mwana wa Neli, na Neli avili dadi mdebe wa Sauli. 51 Dadi waki Sauli akemiwi Kishi na dadi waki Abuneli akemiwi Neli, venavo voha vavili vavii vana vagosi va Abieli.

52 Lukumbi lwoha lwa utalalila wa Sauli kwavili na ngondo yivaha pagati ya Vaisilaeli na Vafilisiti, Sauli peamuweni mundu mweavi na makakala amala mkekesi amuyingisayi mu manjolinjoli gaki.