1 Sauli akamjovela Yonatani mwana waki pamonga na manjolinjoli vaki vakekesi voha vamkoma Daudi. Nambu Yonatani mwana wa Sauli amuganili neju Daudi. 2 Hinu Yonatani akamujovela Daudi, "Dadi wangu ilonda njila ya kukukoma. Hinu ujiyangalilayi, chilau lukela hamba pandu pala pa kujihiha na usigalila kukwokwo. 3 Nene yati nibwela na dadi wangu ku mgunda kweujihihili. Penapo yati nilongela nayu kukuvala veve, na lijambu loloha lenikulimanya, yati nibwela kukujovela." 4 Yonatani akamulumbalila Daudi palongolo ya Sauli dadi waki, akamujovela, "Nkosi kotoka kukita chindu chochoha chihakahu kwa muhengaji waku Daudi. Muni mwene akukitili lepi lijambu lihakahu loloha, goha geakukitili ndi gakukutangatila neju veve. 5 Wumi waki auweni kuvya chindu lepi pala peamukomayi Goliati, Mufilisiti yula, ndi mwene Bambu Chapanga avapelili Vaisilaeli uhotola uvaha. Veve pewaweni chenicho mewa wahekalili neju. Ndava kyani ugana kukita uhakahu kwa kumkoma Daudi changali kujova cheahokili?" 6 Sauli akamuyuwanila Yonatani na kulapa naha, "Nilapa kwa Bambu Chapanga mweavii mumi yati nikumukoma lepi Daudi." 7 Penapo Yonatani akamukemela Daudi na kumukokosela goha gevalongili na Sauli. Yonatani akamupeleka Daudi kwa Sauli, Daudi akamuhengela Sauli ngati cheyavi pa kutumbula. 8 Pegamaliki genago pakahumalili ngondo kavili pagati ya Vafilisiti na Vaisilaeli. Daudi akahamba kutovana na Vafilisiti, akavakoma Vafilisiti vamahele na vevasigalili vakamtila. 9 Mpungu uhakahu kuhuma kwa Bambu Chapanga ukamuyingila Sauli peavili ku nyumba yaki, kuni akamwili mgoha mu chiwoko chaki, lukumbi lwenulwo Daudi atovayi kanjeke kaki. 10 Sauli alingili kumukoma Daudi na mgoha wenuwo cha kumuhindalila mu luwumba. Daudi akayepa na mgoha wenuwo ukahoma mu luwumba. Kilu yiyoyo Daudi akawuka na akatoloka penapo. 11 Kilu yiyo Sauli akavatuma vandu ku nyumba ya Daudi vakamulolayi ngati avili na yikahika lukela amukomayi. Nambu Mikali mdala wa Daudi akamujovela Daudi, "Ngati yati utila lepi kusangula wumi waku kilu iyi, chilau lukela yati ukomiwa." 12 Penapo Mikali akamtangatila Daudi kumuhelesa pa lidilisha kuhumila kunani mbaka pahi, ndi Daudi akatila. 13 Penapo Mikali akatola chimong'omong'o na kuchigoneka pa chitanda na ku mutu akachiyegemesela msagamilu wa mangoma ga mene, na akachigubika nyula. 14 Sauli peatumili vandu vakamukamulayi Daudi, Mikali akavajovela, "Daudi ilwala." 15 Kangi Sauli akavatuma vahamba kavili, akavalagisa akajova, "Mumuleta Daudi hati ngati avii pa chitanda chaki nimkoma." 16 Vandu vala pevayingili pandu peagonili Daudi na kugubukula kumbi vagoniki chimong'omong'o na kumutu vavikili msagamilu wa mangoma ga mene. 17 Sauli akamujovela Mikali, "Ndava kyani unikongili naha? Umulekili likoko wangu atolokayi?" Mikali akamuyangula Sauli, "Anijovili, ‘Nileka nihamba ngati lepi yati nikukoma.’" 18 Hinu Daudi atilili, na ajumbalili kwa Samweli ku Lama na akamujovela goha geakitiwi na Sauli. Pena Daudi na Samweli vakahamba kutama ku Nayoti. 19 Badayi Sauli akayuwana kuvya Daudi avii ku Nayoti ku muji wa Lama, 20 Hinu Sauli akatuma vandu vakamukamulayi Daudi. Nambu pevaukolili msambi wa vamulota weulongoswa na Samweli viwusa ulota, Mpungu wa Bambu Chapanga ukavayingila vatumisi va Sauli vala na vene balapala vakatumbula kuwusa ulota. 21 Sauli peajoviwi mambu genago, akavatuma vahengaji vangi, na vene mewa vakatumbula kuwusa ulota. Sauli akatuma vangi mala ya datu, na vene mewa vakawusa ulota. 22 Penapo akahamba mwene ku Lama. Peahikili pa chiliva chivaha chechivili ku Seku, akamukolela mundu mmonga na akamukota, "Samweli na Daudi vavili kwoki?" Mundu mwenuyo akamuyangula, "Vavii ku Nayoti ku muji wa Lama." 23 Na mwene Sauli akahamba ku Nayoti ku muji Lama, peahikili kwenuko, Mpungu wa Bambu Chapanga ukamuyingila na mwene akatumbula kuwusa ulota kuni avii mu njila mbaka peahikili ku Nayoti ku muji wa Lama. 24 Akahula nyula zaki na kuwusa ulota palongolo ya Samweli, akatama waka ligono lenilo loha muhi na kilu. Chenichi ndi chechavakitili vandu vakotana, "Wu, Sauli mewa ndi mmonga wa vamlota?"