1 Samweli akafwa, penapo Vaisilaeli voha vakakonganeka ndava ya kumkitila malilo Samweli. Vakamzika ku nyumba yaki ku Lama.

Kangi Daudi akahamba ku lugangatu lwa ku Palani. 2 Kwavili na mundu mmonga ku muji wa Maoni mweavili na vindu vyamahele uko ku Kalimeli, mundu mwenuyo avii na vindu vyamahele neju. Avii na mene elufu yimonga na mambelele elufu zidatu geagadumula mangoma uko ku Kalimeli. 3 Mundu mwenuyo akemiwi Nabali, na mdala waki akemiwi Abigaili. Abigaili avii mdala mweavi na luhala na mweanyambili neju, nambu Nabali mngana waki, mweavili wa lukolo lwa Kalebu, avii mundu muhakau na mweinyimana. 4 Daudi peavili ku lukongolo ayuwini kuvya Nabali agadumulayi mambelele gaki mangoma ku Kalimeli. 5 Ndi Daudi akavatuma vasongolo kumi akavajovela, "Muhambayi mukanijambusila Nabali uko ku Kalimeli. 6 Yati mukumjovela Daudi akujambusa ijova, ‘Utama wumi wa magono gamahele na gegavi gabwina, veve na vandu va mu nyumba yaku pamonga na vyoha vyeuvii navyu. 7 Niyuwini kuvya lukumbi ulu ndi lweukugadumula mambelele gaku mangoma, Vadimaji vaku pevatama na tete tavakitili lepi gahakahu. Na vayiviwi lepi chindu chavi chochoha pevavili na tete kuni ku Kalimeli. 8 Vakotayi vadimaji vaku na vene yati vakukujovela. Hinu nikuyupa uvakitilayi lipyana vasongolo vangu, muni tibwelili lukumbi lwa mselebuko. Chondi nikukuyupa uvapela vahengaji vaku na mwana waku Daudi chochoha cheuvii nachu.’" 9 Vasongolo vala va Daudi vakahamba na kumujovela Nabali ngati chevalagiswi na Daudi. Kangi vakalindila chidogo. 10 Nabali akavayangula vasongolo va Daudi, "Mwenuyu Daudi ndi yani? Mwenuyu mwana wa Yese ndi yani? Magono aga kuvii na vatumisi vamahele neju vevakuvatila vabambu vavi. 11 Wu, nitolayi mabumunda gangu na manji gangu na nyofu zenivatendekili vandu vevidumula mangoma ga mambelele gangu, na kuvapela vandu hati venangavamanya vahumili kwoki!"

12 Ndi vasongolo vala vakawuya kumujovela Daudi gevayanguliwi. 13 Penapo Daudi akavajovela vandu vaki, "Mwavoha mujikungayi mapanga ginu mu hiwunu." Ndi kila mmonga akajikunga lipanga laki, na mwene Daudi mewa akajikunga upanga waki. Vandu miya mcheche vakamulanda Daudi, na vandu miya hivili ndi vakasigalila kuyangali vindu. 14 Msongolo mmonga wa Nabali, akamujovela Abigaili mdala wa Nabali, "Daudi avatumili vajumbi kuhuma ku lukongolo kubwela kumujambusa mkulu witu, nambu mwene avaligili. 15 Nambu vandu venava vatihengili mambu gabwina neju, vatikitili lepi gahakahu, na lukumbi lwoha lwetavili navu kudasi tayagisi lepi chindu chitu chochoha. 16 Vandu venava vavili ngati manjolinjoli va kutiyunga kilu na muhi, lukumbi lwoha lwetadimayi mifwiya papipi yavi. 17 Hinu uholalela lijambu lenili na umanya cha kukita. Chenichi chihotola kuleta msolo kwa bambu witu na kwa vandu vaki voha. Mngana waku Nabali ndi mundu muhakahu na kawaka mweihotola kulongela nayu!" 18 Abigaili akakita kanyata kutola mabumunda miya hivili na tuhaku tuvili twetumemi divayi na nyofu ya mambelele muhanu yeyibanikwi na hipimu kumi na saba ya mandulutulu na hikonyo miya yimonga ya zabibu ziyumu na mabumunda miya hivili ga tini vyoha akavikwesa panani ya lipunda. 19 Kangi akavajovela vatumisi vaki, "Mulongolela na nene yati nikuvalanda." Nambu amjovili lepi Nabali mgana waki.

20 Peahelelayi kuni akwelili lipunda laki, kuhuma ku chitumbi kuhamba ku likemba, chigafula akamuwona Daudi pamonga na vandu vaki vihelela vibwela kula kweavii mwene. 21 Daudi aholalili kuvya, "Nene nijing'ahili kuyunga vindu vya mundu mwenuyu ku lugangatu changali kupata chindu chochoha, na kawaka chindu chaki chochoha chechiyagili, nambu mwene aniwuyisila gahakahu kwa gala gabwina goha genamkitili. 22 Bambu Chapanga anibunayi neju nene ngati chilau yati nikuvakoma lepi vahengaji voha vagosi va mundu mwenuyu." 23 Abigaili peamuweni Daudi, kanyata akahuluka pa lipunda laki na akagundama palongolo ya Daudi mbaka pamihu paki pakapamisa pahi. 24 Akajigwisa pamagendelu ga Daudi na kumujovela, "Veve wa mkulu wangu, kubuda kwenuku ndi kuvyayi kwa nene. Chondi, niyidakilila nilongelayi na veve. Chondi, nikuyupa uyuwanilayi malovi genigana kukujovela mtumisi waku. 25 Nikuyupa bambu wangu, ukotoka kumuholalela mundu muhakau Nabali. Mwene ndi mwehu ngati chelivili liina laki, na mwene ikita ngati mwehu. Bambu wangu, vasongolo vaku pewavatumili nene namtumisi waku navaweni lepi. 26 Hinu bambu wangu, nilapa kwa Bambu Chapanga mweavii mumi, na veve cheuvii mumi, Bambu Chapanga akubesili ukotoka kuwuyisa mbunu kwa kukoma vandu wamwene, valeka vamakoko vaku na vala voha vevakuyupila gakukolela gahakahu vavya vahimu ngati Nabali. 27 Mkulu wangu nikuyupa upokelayi njombi vyenikuletili nene namtumisi waku na uvapelayi vatumisi vaku vevilandana na veve. 28 Chondi unilekekesayi nene namtumisi waku kubuda kwokwoha kwenikukitili. Nimanyili kuvya Bambu Chapanga yati akukukita veve uvya nkosi na uveleku waku mewa yati vivya vankosi, muni veve utovana ngondo za Bambu Chapanga. Uhakau ukoto kuvya mu wumi waku. 29 Kukavyayi na mundu mweakulandalila muni akukoma, Bambu Chapanga, Chapanga waku, yati akuyunga ngati mundu chaiyunga chindu cha mashonga gamahele, nambu vamakoko Bambu Chapanga yati akuvataga kutali ngati mundu cheijugumila liganga kwa ngumbewa. 30 Bambu Chapanga peimala kukita mambu goha gabwina ngati cheakujovili, na kukuhagula veve uvya nkosi wa Isilaeli, 31 veve mkulu wangu yati kuvya lepi na chindu cha kukukita uvya ngolongondi amala kuviniswa mu mtima ndava ya kukoma kwa kugana kuwuyasila mbunu. Bambu Chapanga peakukitilayi gabwina, nikuyupa kotoka kunikosiwa nene mtumisi waku." 32 Daudi akamuyangula Abigaili, "Atopeswa Bambu Chapanga, Chapanga wa Isilaeli, mweakutumili veve lelu ukonganekayi na nene. 33 Bambu Chapanga akumotisa ndava ya cheuhengili kwa luhala kunidivalila nene nikoto kuhamba kukoma na kuwuyisila gahakau kwa chiwoko changu. 34 Chakaka Bambu Chapanga, Chapanga wa Isilaeli anidivalili nikotoka kukukoma. Ngati ngaukotoka kubwela kanyata kukonganeka na nene, chilau lukela kawaka mundu mgosi yeyoha mweavi pagati ya vandu va Nabali mwengasigalili mumi wala Nabali mwene!" 35 Daudi akapokela njombi zoha zeamuletili Abigaili, na akamujovela Abigaili, "Kiliwukayi kunyumba yaku na ukoto kuyogopa. Nigayuwini malovi gaku na niyidakili cheuniyupili." 36 Abigaili peakiliwiki ku nyumba, akamukolela Nabali ikita mselebuko weuvi na vandu vamahele ngati wa chinkosi. Nabali avili mweasangalwiki na agalili neju. Ndava yeniyo Abigaili amujovili lepi chindu chochoha mbaka lukela. 37 Lukela Abigaili peaweni mngana waki ugimbi umuwukili mu mutu na kuvya bwina, akamujovela mambu goha, bahopo Nabali akapola higa yikagogodala akavya ngati liganga. 38 Pegapitili magono kumi, Bambu Chapanga akamkoma Nabali. 39 Daudi peayuwini kuvya Nabali afwili, akajova, "Atopeswa Bambu Chapanga mweamulipisi Nabali kwa kuniliga, Bambu Chapanga mweamukiti mtumisi waki akotoka kukoto kukita uhakau ngati wenuwo na Bambu Chapanga amuhamwili Nabali ndava ya uhakahu waki." Penapo Daudi akavatuma vandu kwa Abigaili vakamuhonga avya mdala waki. 40 Vatumisi va Daudi vakahamba mbaka ku Kalimeli na kumujovela Abigaili naha, "Daudi atitumili tibwela kukutola uvya mdala waki." 41 Abigaili akayima peatamili na kugundama palongolo yavi mbaka pahi na kujova, "Nene namtumisi ndu, niyidakili kuvahengela na hati kuvasanja magendelu vahengaji va bambu wangu." 42 Abigaili akakita kanyata, akayinuka na kukwela pa lipunda laki, akalandana na vatumisi vaki va chidala muhanu, akalongosana na vavanda va Daudi, na mwene akavya mdala wa Daudi. 43 Mewawa Daudi akamugega Ahinoamu wa ku Yezileeli, penapo voha vavili vakavya vadala vaki. 44 Lukumbi lwenulo Sauli amuwusili Mikali msikana waki mweavii mdala wa Daudi agegewayi na Paliti, mwana wa Laishi, mweihuma ku muji weukemiwa Galimu.