1 Vafilisiti pevamalili kulitola Lisanduku la Lilaganu la Bambu Chapanga, vakaligega kuhuma ku muji wa Ebenezeli mbaka ku muji wavi wa Ashidodi. 2 Ndi vakalipeleka Lisanduku la Lilaganu la Bambu Chapanga mugati ya nyumba ya Dagoni mchapanga wavi na kulivika pamuhana ya chimong'omong'o cha mchapanga wavi weukemiwa Dagoni. 3 Chilau yaki lukela, vandu va muji wa Ashidodi pevayimwiki vakawona chimong'omong'o cha Dagoni chigwili cha kukupama palongolo ya Lisanduku la Lilaganu la Bambu Chapanga. Vakachiyimika kavili chimong'omong'o cha Dagoni na kuchivika kavili pahali paki. 4 Nambu, chilau yaki lukela pevayimwiki, vakawona chimong'omong'o cha Dagoni chigwili cha kukupama palongolo ya Lisanduku la Lilaganu la Bambu Chapanga, chidenyiki mutu na magendelu na mawoko vyoha vyenivyo vyadenyiki vikavya vigonili paha ya felemu lwa mulyangu. Chechasigalili ndi higa ndu ya chimong'omong'o cha Dagoni. 5 Ndima na vamteta va Dagoni na vandu voha peviyingila mu nyumba ya mchapanga wavi Dagoni ku Ashidodi, vilivatila lepi lufelemu lwa pamulyangu wa kuyingalila mbaka lelu.

6 Bambu Chapanga akavabuna neju vandu va ku Ashidodi na vala vevitama mu vijiji vyevivi papipi navu, akavaletela uhalabisu na kuvang'aha kwa maputi. 7 Vandu va pa Ashidodi pevagaweni mambu gegakuvakolela, ndi vakajova, "Chapanga wa Isilaeli akutibuna neju tete pamonga na mchapanga witu Dagoni. Lisanduku la Lilaganu la Bambu Chapanga liganikiwa lepi livya kwitu." 8 Ndi vakavatuma vandu kuvakemela vachilongosi voha va Vafilisiti na vakavakota, "Wu, tilikita wuli Lisanduku lenili la Lilaganu la Bambu Chapanga wa Isilaeli?"

Vachilongosi vala vakayangula, "Lisanduku lenili la Lilanganu la Bambu Chapanga wa Isilaeli tilipelekayi ku Gati." Ndi vakalipeleka ku muji wa Gati. 9 Nambu pevamali kulipeleka Lisanduku lenilo ku muji wa Gati, penapo Bambu Chapanga akavabuna vandu va muji wa Gati vavaha kwa vadebe kuvakita vamyogopayi neju kwa kuvaletela maputi. 10 Ndi vakalipeleka Lisanduku lenilo la Lilaganu la Bambu Chapanga mbaka ku Ekiloni. Nambu pavalihikisi kwenuko Lisanduku lenilo la Bambu Chapanga wa Isilaeli, vandu va muji wenuwo vakavembeneka na kujova, "Vatiletili Lisanduku la Lilaganu la Bambu Chapanga wa Isilaeli ndava ya kutikomakesa tete na vandu vitu." 11 Ndi vakavakemela vachilongosi voha va Vafilisiti na kuvajovela, "Muliwuyisayi Lisanduka la Lilaganu la Bambu Chapanga wa Isilaeli mu mulima wavi, ngati lepi yati likutikoma tete pamonga na vandu vitu." Vakakita chenicho ndava muni Bambu Chapanga avabunayi neju na vandu vamahele vamali kufwa, hinu vandu vavi na wogohi. 12 Na vala vevavii vakona mumi vavii na maputi, na chivembu chavi chikahika mbaka kunani kwa Chapanga.