1 Ligono limonga mundu mmonga akamjovela Daudi, "Yuwanila, Vafilisiti vakuutova muji wa Keila na vakuvanyaga mabenu pa luvanja lwa kubulila." 2 Daudi akamukota Bambu Chapanga, "Wu, nihamba nikavatova Vafilisiti ava?"

Bambu Chapanga akamuyangula, "Ena, hamba kavatova Vafilisiti na kuvasangula vandu va muji wa Keila."

3 Nambu vandu vaki Daudi vakamujovela, "Bahapa pa Yuda pene petitama tiyogopa, wu yati yivya wuli tikahambayi ku Keila kutovana na manjolinjoli ga Vafilisiti?" 4 Daudi akamuyupa kavili Bambu Chapanga na mwene Bambu Chapanga akamuyangula, "Helela hambayi ku Keila muni yati nikukukita uvatova Vafilisiti." 5 Ndi Daudi akahelela akahamba ku Keila pamonga na vandu vaki, kwenuko akavatova Vafilisiti, akavakoma Vafilisiti vamahele na kutola mifwiya yavi. Penapo Daudi akavasangula vandu va pa Keila.

6 Abiatali mwana wa Ahimeleki, peatilalili kwa Daudi, ahambili na kakoti ka panganga ka chimteta.

7 Sauli peajoviwi kuvya Daudi ahambi ku Keila, akajova, "Chapanga akitili chenichi muni nimukamulayi Daudi, ndava ajidindalili mwene kwa kuyingila mu muji weuvi na mamilyangu na madindilu." 8 Penapo Sauli akavakemela manjolinjoli vaki voha ndava ya ngondo, vakahelela kuhamba ku Keila, akamtindila Daudi na vandu vaki.

9 Daudi peayuwini kuvya Sauli ajitendekihi kumkamula, akamujovela mteta Abiatali, "Niletelayi apa kakoti ako ka chimteta." 10 Kangi Daudi akayupa, "Veve Bambu Chapanga, Chapanga wa Isilaeli, nene namtumisi waku niyuwini kuvya Sauli ibwela kuukomakesa muji wa Keila ndava ya nene. 11 Wu, vandu va pa Keila yati vakumtangatila muni nikamuliwayi? Wu, Sauli yati ibwela ngati nene namuhengaji waku chenayuwini? Veve Bambu Chapanga, Chapanga wa Isilaeli, nikukuyupa uniyangulayi nene namuhengaji waku."

Bambu Chapanga akamuyangula, "Sauli yati ibwela."

12 Daudi akamukota kangi, "Wu, vandu va pa Keila yati vakumtangatila Sauli muni nene pamonga na vandu vangu tikamuliwayi?"

Bambu Chapanga akamuyangula, "Ena, yati vikita chenicho."

13 Ndi Daudi na vandu vaki vevavii ngati miya sita vakawuka pa Keila na kuhamba kwokwoha kwevahotwili kuhamba. Sauli peayuwini kuvya Daudi amali kutoloka pa Keila, akaleka kuhamba kwenuko.

14 Penapo Daudi na vandu vaki vatamili kwa kujihiha mu mulima wa hitumbi, pa lukongolo lwelukemiwa Zifu. Magono goha Sauli amulondayi Daudi, nambu Chapanga amlekili lepi Daudi akamuliwa na Sauli. 15 Daudi peavili ku Holeshi, ku lukongolo lwelukemiwa Zifu, akamanya kuvya Sauli igana kumukoma. 16 Yonatani mwana wa Sauli akamulanda Daudi ku Holeshi na akamkangamalisa mtima kuvya Chapanga iyendelela kumyumnga. 17 Yonatani akamujovela Daudi, "Kotoka kuyogopa, dadi wangu Sauli yati akukamula lepi. Veve yati uvya wa nkosi wa Isilaeli na nene yati nivya mtangatila waku, hati dadi wangu Sauli alimanyili lijambu lenilo." 18 Voha vavili vakavikilana lilaganu palongolo ya Bambu Chapanga. Daudi akatama pa muji wa Holeshi na Yonatani akahamba ku nyumba.

19 Vandu va ku Zifu vakamuhambila Sauli peavii akona ku Gibea, vakamujovela, "Daudi akujihiha pa mulima witu, mu lugangatu lweluvi mu muji wa Holeshi, ku chitumbi chechikemiwa Hakila, chechivii upandi wa kusini mwa Yeshimoni. 20 Hinu veve nkosi, bwelayi ukita chila cheugana mtima waku, na tete lihengu litu yati livya kukutangatila veve umkamula Daudi."

21 Sauli akavayangula, "Chakaka nyenye mukuniwonela nene lipyana, Bambu Chapanga avamotisayi. 22 Muhamba mukakita umang'omesi muni mpamanya pandu peihambahamba, na yani mweamuweni pandu penapo, ndava niyuwini kuvya Daudi achenjili neju. 23 Muhamba mkalonda pandi zoha mpamanya kila pandu peakujihiha, kangi muwuya kwa nene na ujumbi weuvii na uchakaka, ndi yati nihamba pamonga na nyenye. Ngati yati ivya pandu penapo, nene yati nikumulonda pagati ya lukolo zoha zezivii pa mulima wa Yuda."

24 Penapo vakawuka na kuhamba ku Zifu, lukumbi lwenulwo Daudi pamonga na vandu vaki vavii ku lugangatu lwelukemiwa Maoni ku Alaba mana yaki ligema la mfuleni Yoludani, upandi wa kusini wa Yeshimoni. 25 Sauli na vandu vaki vakatumbula kumulonda Daudi. Nambu Daudi peajoviwi genago, akahamba kujihiha ku matalau gegavii ku lugangatu lwa Maoni na akatama kwenuko. Sauli peayuwini genago, akamulandalila Daudi mbaka ku lugangatu lwa Maoni. 26 Sauli na vandu vaki vakavya vigenda upandi umonga wa chitumbi, na mwene Daudi na vandu vaki vakavya vigenda upandi wungi wa chitumbi chenicho. Daudi na vandu vaki vakiti kanyata kumtoloka Sauli. Lukumbi Sauli na manjolinjoli vaki pevahegalili kumukamula Daudi na vandu vaki, 27 akabwela mjumbi kwa Sauli na kumujovela, "Bwela kanyata! Vafilisiti vakuuzangila mulima." 28 Penapo Sauli akaleka kumlanda Daudi na akahamba kutovana na Vafilisiti. Ndi mana pandu penapo pikemiwa Sela Hamalekoti, mana yaki chitumbi cha malekenganu. 29 Daudi na vandu vaki vakawuka pandu penapo, vakahamba kujihiha na kutama ku mbugu yeyivii ku chinyepa cha Engedi.