1 Penapo vandu va ku Kiliati Yealimu vakahamba kulitola Lisanduku la Lilaganu la Bambu Chapanga, vakalipeleka ku nyumba ya Abinadabu, yeyavi ku chitumbi. Na vakamkita Eleazali mwana waki mgosi ayidakiliwa mukumfugamila Bambu Chapanga, muni aliyungayi Lisanduku la Lilaganu la Bambu Chapanga.

2 Lisanduku la Lilaganu la Bambu Chapanga latamili ku Kiliati Yealimu kwa lukumbi lwa miyaka ishilini, na lukumbi lwenulo lwoha Vaisilaeli voha ngolongondi mu mtima na vamuyupili neju Bambu Chapanga muni avatangatila. 3 Samweli akavajovela Vaisilaeli, "Ngati mukumuwuyila Bambu Chapanga kwa mitima yinu yoha, muganikiwa muiwusayi michapanga ya chiyehe yeyivii pagati yinu na vimong'omong'o vya Ashitaloti. Mumuhambilayi Bambu Chapanga kwa mitima yinu yoha, na kumuhengela mwene ndu, ndi na mwene yati akuvasangula mumawoko ga Vafilisiti." 4 Penapo Vaisilaeli vakahitaga kutali himong'omong'o ya Vabahali na Vaashitaloti, ndi vakamuhengela Bambu Chapanga mwene ndu. 5 Kangi Samweli akavajovela vachilongosi voha va Vaisilaeli, "Muvakemela Vaisilaeli voha vakonganeka ku Mizipa, na kwenuko nene yati nikuvayupila kwa Bambu Chapanga." 6 Ndi Vaisilaeli voha vakakonganeka ku Mizipa. Vakanega manji na kugayita palongolo ya Bambu Chapanga kulangisa kuvya vavii mu mang'aisu na ligono lenilo loha vakajihinisa changali kulya na vakajova, "Timuhokili Bambu Chapanga witu." Samweli ndi avii muhamula wa Vaisilaeli ku Mizipa. 7 Vafilisiti pevayuwini kuvya Vaisilaeli vakonganiki pamonga ku Mizipa, vachilongosi muhanu va Vafilisiti vakahamba kuvahanganila. Vaisilaeli pevayuwini lijambu lenilo, vakavya na wogohi ndava ya Vafilisiti. 8 Hinu Vaisilaeli vakamujovela Samweli, "Kotokayi kuleka kutiyupila kwa Bambu Chapanga, Chapanga witu muni atisangula kwa Vafilisiti venavo." 9 Penapo Samweli akatola mwana limbelele mweakona inyonga, akamuwusila Bambu Chapanga kuvya teta ya kutinyiswa, kangi Samweli akamyupa Bambu Chapanga ndava ya Vaisilaeli, na mwene Bambu Chapanga akayangula kuyupa kwaki. 10 Lukumbi Samweli peawusayi teta ya kutinyiswa yila, Vafilisiti vavii papipi kuvahanganila Vaisilaeli. Nambu Bambu Chapanga akavayogopesa Vafilisiti kwa lwami luvaha lwa mbamba kuhuma kunani kwaki na vene vakawehuka na vahotwili lepi kutovana na Vaisilaeli. 11 Vaisilaeli vakavajumbisa Vafilisiti kuhuma ku Mizipa na kuvakoma mu njila mbaka papipi na muji weukemiwa Beti Kali. 12 Ndi Samweli akalitola liganga na kuliyimika pagati ya Mizipa na Sheni, liganga lenilo akalikemela Ebenezeli akajova, "Mbaka penapa petivili Bambu Chapanga atitangatili." 13 Kwa namuna yeniyo Vafilisiti vatoviwi ku ngondo na vawuyalili lepi kavili kuyizangila Isilaeli. Lukumbi lwoha Samweli peavi mumi, Bambu Chapanga atumili uhotola waki kutovana na Vafilisiti. 14 Miji yoha ya Vaisilaeli yeyatoliwi na Vafilisiti kuhuma ku Ekiloni mbaka ku Gati ikawuyiswa kwa Vaisilaeli, na vene vakaugombola mulima wavi kuhuma kwa Vafilisiti. Hinu kukavya na uteke pagati ya Vaisilaeli na Vaamoli. 15 Samweli ayendalili kuvya muhamula wa Vaisilaeli mu wumi waki woha. 16 Mu kila mwaka Samweli agendalelayi ku Beteli na ku Giligali na ku Mizipa, na kuhamula mihalu Vaisilaeli vevatamayi mu miji yeniyo yoha. 17 Peamalayi akiliwukayi ku Lama, muni kwenuko kwavili ku nyumba yaki, kwenuko mewa avahamulayi Vaisilaeli, na mwene kwenuko akamujengela Bambu Chapanga pandu pa kuwusila teta.