1 Vagosi vangi kuhuma ku Zifu vakamuhambila Sauli ku Gibea na kumujovela kuvya, Daudi ajihihi ku chitumbi chechikemiwa Hakila, kuupandi welihumila lilanga wa muji Yeshimoni. 2 Ndi Sauli akahelela kuhamba ku lugangatu lwelukemiwa Zifu kumulonda Daudi kuni alongosini na manjolinjoli vakekesi elufu zidatu vevahaguliwi pa Isilaeli. 3 Na mwene Sauli akavika kambi pamuhana ya njila panani chidunda chechikemiwa Hakila, chechilolesana na muji wa ku Yeshimoni. Nambu Daudi avii akona kulugangatu, Daudi peamanyili kuvya Sauli abwelili kudasi kumulonda, 4 ndi akavatuma vamang'omesi na vene vakabwela kumujovela kuvya chakaka Sauli abwelili. 5 Ndi Daudi akawuka akahamba pandu peavikili Sauli kambi. Akapawona pandu pevagonili Sauli pamonga na Abuneli mwana wa Neli, mkekesi wa manjolinjoli ga Sauli. Sauli agonili pagati ya kambi kuni manjolinjoli gaki gamtindili pandi zoha. 6 Penapo Daudi avakotili Ahimeleki mweavili wa likabila la Vahiti, na Abishai mulongo waki Yoabu, nyina wavi akemiwayi Seluya, "Yani yati ihamba pamonga na nene ku kambi ya Sauli?"

Abishai akamuyangula, "Nene yati nihamba pamonga na veve."

7 Kilu Daudi na Abishai vakayingila mu kambi ya Sauli, vakamukolela Sauli agonili pagati ya lindanda lenilo, papipi na mutu waki ndi ahomiki mgoha waki pandima. Abuneli pamonga na manjolinjoli vangi vagonili kumutindila Sauli. 8 Abishai akamjovela Daudi, "Lelu Bambu Chapanga akuhotwisi umkoma likoko waku mumawoko gaku. Hinu nileka nene nimuhome mala yimonga mbaka mgoha uhumila pahi, nene yati nikumuhoma lepi mala zivili!" 9 Nambu Daudi akamjovela Abishai, "Kotoka kumukoma! Muni chakaka Bambu Chapanga yati akumbuna mundu yoyoha mweigolosayi chiwoko chaki kwa mundu waki mweamuhagwili kwa kumyitila mahuta." 10 Daudi akajova, "Nilapa kwa Bambu Chapanga mweavii mumi, kuvya Bambu Chapanga mwene ndi mweakumukoma Sauli, na ligono laki la kufwa yati lihika ndu, amala yati ihamba ku ngondo na kufwilila kukwokwo. 11 Bambu Chapanga anidivalila nikotoka kuchigolosa chiwoko changu kukoma mundu waki mweamuhagwili kwa kumnyalili mahuta avya nkosi! Nambu tolayi mugoha waki weauhomiki papipi na mutu waki na libotolo laki la manji, kangi tiwukayi peapa." 12 Ndi Daudi akatola mgoha wula na libotolo la manji vyevyavii papipi na mutu wa Sauli, kangi vakawuka penapo. Nambu kawaka mundu mwealolili amala kumanya chechahumalili, na kawaka mundu mweayimwiki, muni Bambu Chapanga avaletili lugono tipitipi. 13 Penapo Daudi akahamba ku upandi wungi wa ligema lenilo na kuyima ku chituvilu cha chitumbi patali neju na msambi wa Sauli. 14 Kangi Daudi akaukemela msambi wa manjolinjoli ga Sauli pamonga na Abuneli mwana wa Neli kuni ijova, "Wu, Abuneli ukuniyuwana?" Abuneli akakota, "Wayani veve mweukumkemela nkosi?" 15 Daudi akamuyangula, "Veve wamgosi lepi mkekesi? Yani mweavii ngati veve pa Isilaeli? Hinu mbona wamuyungili lepi bambu waku nkosi? Mundu mmonga ayingili kwinu kumukoma bambu waku nkosi. 16 Abineli ichi cheukuchikita chabwina lepi. Nilapa kwa Bambu Chapanga mweavii mumi, veve na vandu vaku mganikiwa mfwayi, muni mwamuyungili lepi bambu winu mweayitiwi mahuta na Bambu Chapanga avya nkosi! Mlola penapo pemuvili, wu uvii kwoki mgoha wa nkosi na libotolo laki la manji vyevyavii papipi na mutu waki?" 17 Sauli akalumanya lwami lwa Daudi ndi akakota, "Wu, lwenulu ndi lwami lwaku wamwana wangu Daudi?" Daudi akayangula, "Ena, ulu ndi lwami lwangu bambu wangu nkosi." 18 Kangi akayendelela kujova, "Ndava kyani bambu wangu ukunilonda londa? Nikitili kyani? Na nikuhokili kyani? 19 Hinu wabambu wangu nkosi, yuwanilayi malovi ga muhengaji waku. Yikavyayi Bambu Chapanga ndi mweakung'anamwisi uvya walikoko wangu, hinu apokelayi luteta lwa kutinyiswa lwelukumkita ang'anamusa mpangu waki. Nambu ngati vandu ndi vevakitili chenicho, vandu venavo vapewa likoto palongolo ya Bambu Chapanga, muni vanivingili niwuka pa mulima weatipelili Bambu Chapanga na vakajova kuvya, ‘Hamba ukaifugamila michapanga hingi.’ 20 Kotoka kunileka nifwilila ku mulima wa chiyehe, kutali na peavii Bambu Chapanga. Ndava kyani veve nkosi wa Isilaeli ubwelili kunilonda nene mwenivii ngati lumbapani? Ndava kyani ukunilonda nene ngati mundu mweilonda ngwali kuhitumbi?" 21 Sauli akamuyangula, "Nikitili uhakahu, wuyayi wamwana wangu Daudi! Yati niwuyila lepi kavili kulinga kukukoma, muni lelu unilekili kavili mumi. Nene namuyimu na nibudili neju!" 22 Daudi akayangula, "Veve nkosi, mgoha waku uvii kuni, mtumayi linjolinjoli waku mmonga abwela kuutola. 23 Bambu Chapanga akumpela njombi kila mundu msadikika mweikita geigana Bambu. Lelu Bambu Chapanga anihotwisi nikukoma, nambu nene nachigolwisi lepi chiwoko changu kukukoma, muni veve uhaguliwi na Bambu Chapanga kwa kunyalwa mahuta uvya nkosi. 24 Lola ngati chenikaweni kuvya wumi waku lelu uvii wabwina, chichocho wumi wangu uvii na ubwina kwa Bambu Chapanga, na mwene anisangwili niwuka mu mang'aiso gangu goha." 25 Penapo Sauli akamujovela Daudi, "Chapanga akumotisa wamwana wangu Daudi! Yati uhenga mambu gavaha na goha yati ukugahotola!"

Kangi Daudi akawuka akahamba na mwene Sauli akawuya ku nyumba yaki.