1 Lisanduku la Lilaganu la Bambu Chapanga pelatamili pa mulima wa Vafilisiti mulukumbi lwa miehi saba, 2 Vafilisiti vakavakemela vamteta vavi va Dagoni pamonga na valondola vavi na kuvakota, "Wu, tikita wuli kulivala Lisanduku lenili la Lilaganu la Bambu Chapanga? Mutijovelayi tihotola wuli kuliwuyisa ku Isilaeli." 3 Vene vakavayangula, "Pemukiliwusa Lisanduku la Lilaganu la Bambu Chapanga wa Isilaeli, mukotoka kukiliwusa mawoko gawaka. Kwa namuna yoyoha yila, muwusayi na teta ya kuwusa mabudilu, na nyenye yati mwilama. Mukakitayi chenicho yati mwimanya ndava ya kyani Chapanga avya akuvabuna." 4 Vafilisiti vakakota, "Timupelekela teta yoki ya kuwusa kubuda?" Vene vakavayangula, "Mupeleka vimong'omong'o muhanu vya zahabu vyeviwanangana na maputi na mupelekayi pamonga na vimong'omong'o muhanu vya zahabu vyeviwanangana na magudwani, kila chimong'omong'o chiyima pahala pa nkosi mmonga wa Vafilisiti, ndava muni utamu wewavapatili nyenye ndi wuwowo wewavapatili vankosi vinu. 5 Mutendekehayi luhumu lwa himong'omong'o hya maputi na himong'omong'o ya magudwani, vindu vyevikita vandu vinu vakomakeswa. Yiganikiwa mumupela utopesa Chapanga wa Vaisilaeli. Pangi yati ileka kuvabuna nyenye pamonga na michapanga yinu na mulima winu. 6 Ndava ya kyani muvya na chinywinda mu mitima yinu ngati chevakitili va Misili na nkosi wavi Falao? Wu, Chapanga peavang'ahisi Vamisili, vavalekili lepi Vaisilaeli vawukayi na vene vakawuka? 7 Hinu mutendekeha mutuka yamupya ya kuhutwa pamonga na ng'ombi zivili zezinyongesa zezakona kukungwa lingolingoli, muzikunga mu mutuka yeniyo nambu mipapakasi yaki mukotoka kuhamba nazu, muhileka mu chivaya. 8 Mutola Lisanduku la Lilaganu la Bambu Chapanga mulivika mu mutuka yeniyo, pamuhana ya Lisanduku lenilo muvikayi vimong'omong'o vya zahabu vyemukumpelekela vivya teta ya kuwusa kubudu kwinu. Kangi muyileka yihamba yene kwokwoha kweyigana kuhamba. 9 Muiyangalila bwina mutuka yeniyo, ngati yilongosa kuhamba ku mulima waki ku muji wa Beti Shemeshi, penapo ndi yati timanya kuvya mweatiletili msolo uwu ndi Chapanga wa Vaisilaeli. Nambu ngati yihamba lepi kwenuko, ndi yati timanya kuvya msolo uwu atiletili lepi Bambu Chapanga, nambu uhumalili wene ndu." 10 Vakakita ngati chevajoviwi, vakazitola ng'ombi zivili zezinyongesa na kuzikunga zihuta mutuka yeniyo, na mipapakasi yavi vakahikunga mu chivaya. 11 Lisanduku la Lilaganu la Bambu Chapanga lila vakalivika mu mutuka pamonga na libokisi lelina himong'omong'o ya magudwani ga zahabu na himong'omong'o yeyiwanangana na maputi. 12 Kangi ng'ombi zenizo zikalongosa kuhamba ku muji wa Beti Shemeshi changali kuvedukila kumangiha amala kuupandi wa kulyelela, na pezahambayi zapita kuvemba. Vankosi muhanu va Vafilisiti vala ndi vakazilandalila mbaka ku mubaka wa Beti Shemeshi. 13 Vandu va ku Beti Shemeshi vabenayi nganu ku liwasi. Pevayinwili mitu yavi na kuliwona Lisanduku la Lilaganu la Bambu Chapanga, na vene vakahekelela neju. 14 Mutuka yeniyo yikahika ku mgunda wa Yoshua, mundu wa ku Beti Shemeshi, yikayima pamuhana ya liganga livaha. Vandu vakayibomolana mutuka yila, na ng'ombi zila vakamuwusila Bambu Chapanga luteta lwa kutinyisa. 15 Valawi vakalihelesa Lisanduku la Lilaganu la Bambu Chapanga pamonga na libokisi lila lelina himong'omong'o ya zahabu na kuvika panani ya liganga livaha. Kangi vandu va Beti Shemeshi vakamuwusila Bambu Chapanga teta za kutinyiswa kwa motu na teta zingi. 16 Vachilongosi muhanu va Vafilisiti vala pevamali kugawona gegahengiki penapo, ligono lilolo vakakiliwuka ku Ekiloni. 17 Chenichi ndi Vafilisiti chevapeliki himong'omong'o ya zahabu ya maputi kwa Chapanga hivya teta ya kuwusa kubuda kwavi, chimong'omong'o chimonga chivya pahala pa muji umonga, Chimong'omong'o chimonga ndava ya muji wa Ashidodi na Chimong'omong'o chimonga ndava ya muji wa Gaza na Chimong'omong'o chimonga ndava ya muji wa Ashikeloni na Chimong'omong'o chimonga ndava ya muji wa Gati na Chimong'omong'o chimonga ndava ya muji wa Ekiloni. 18 Mewa vapeliki na himong'omong'o muhanu ya zahabu ya magudwani kulandana na muvalangu wa miji yoha ya Vafilisiti yeyatalaliwi na vakulu muhanu va Vafilisiti, miji yeniyo yatindisiwi luwumba pamonga na hijiji yaki yatindisiwi lepi luwumba. Liganga livaha lelavili mumugunda wa Yoshua mundu wa ku Beti Shemeshi livii mbaka lelu ngati ukumbuso wa pandu pelavikiwi Lisandu la Lilaganu la Bambu Chapanga. 19 Bambu Chapanga akavakoma vandu sabini vevatama pa muji wa Beti Shemeshi, ndava valingulili mugati ya Lisanduku la Bambu Chapanga. Vandu vakavya vavembeniki muni Bambu Chapanga avabunili neju.

20 Kangi vandu vapa Beti Shemeshi vakajova, "Yani mweihotola kulama palongolo ya Bambu Chapanga, Chapanga mweiyidakiliwa kufugamiwa? Yati tikulupeleka kwa yani ndava awuka kwitu?" 21 Ndi vakavatuma vandu vahamba kwa vakolonjinji va muji wa Kiliati Yealimu vakajova, "Vafilisiti vakiliwisi Lisanduku la Lilaganu la Bambu Chapanga, hinu mubwela mulitolayi."