1 Kangi Hana akayupa na kujova,

"Mtima wangu usangalwiki ndava ya Bambu Chapanga,

muni Bambu Chapanga anipelili utopesa!

Na nene nipatili makakala palongolo ya vamakoko vangu,

muni Bambu Chapanga anisangwili na kunipela luheku!"

2 "Kawaka mweavi mbwina na mweangabuda ngati Bambu Chapanga,

kawaka hati mmonga mweavii ngati mwene,

kawaka mweavii litalawu ngati Chapanga witu.

3 Muleka kujikwiha,

mukoto kulongela chi mahanyi.

Muni Bambu Chapanga ndi mweamanyili,

na mwene ndi mweihamula matendu gitu goha.

4 Pinde za vevanamakakala hidenyiki,

nambu avakangamalisa vevavii yutiyuti.

5 Vandu vala vevavili na chakulya chamahele kadeni,

hinu vihengeswa mahengu ganonopu ndava ya kupata chakulya,

nambu vevavii na njala kadeni,

hinu vana vyakulya vyamahele.

Mdala ngababa hinu aveliki vana saba,

nambu yula mweavii na vana vamahele, hinu asigalili mkiva.

6 Bambu Chapanga ikoma na kuyukisa,

mwene akuvahelesa pahi ku ligodi na kuvawuyisa kavili.

7 Bambu Chapanga ndi mweakuvakita vangi vavyayi vangangu na vangi vavya vanavindu vyamahele,

vangi akuvahelesa na vangi akuvakwesa.

8 Akuvayinula vangangu kuhuma mu ungangu,

na vangali chindu kuhuma mu ungangu wavi.

Akuvatamika pamonga na vakulu

na kuvakita vahala chigoda cha utopesa cha unkosi.

muni mikingisa ya mulima ndi ya Bambu Chapanga,

mwene auyimiki mulima panani ya mikingisa yeniyo."

9 "Mwene ndi mweakuziyunga njila za vandu vaki vevavi vasadikika,

nambu yati akuvakita vandu vabudanu vakomakeswa mu chitita.

Muni kawaka mundu mweipata vindu kwa makakala gaki mwene.

10 Vala vamakoko va Bambu yati videnywa hipandihipandi,

yati ibulumila ngati mbamba kuhuma kunani ndava yavi.

Bambu yati akuuhamula mulima woha,

yati akumpela makakala na utopesa nkosi waki mweamuhagwili."

11 Kangi Elikana akawuya ku nyumba yaki ku Lama, nambu Samweli mwana waki akasigalila ku Shilo, akumuhengela Bambu palongolo ya mteta Eli.

12 Vana va chigosi va Eli vavii vahakau neju. Vammanyili lepi Bambu Chapanga. 13 Hinu lwavi luhumu lwa vamteta pamonga na vandu kuvya kila lukumbi mundu peipeleka teta na kuni nofu yivila, mtumisi wa mteta ngaabwelili na chihomelu chechina ng'onji hidatu. 14 na mwene ayingisayi chihomelu chenicho kwa makakala mu liteleku, nyofu yoyoha yeyahomiwi na chihomelu chenicho ndi yavya ya mteta. Chenicho ndi vamteta chevavakitili Vaisilaeli voha pevahambayi kuwusa teta ku Shilo. 15 Nambu kwakona hati mahuta gangayochwa, muhengaji wa mteta ngeabwelili na kumujovela mundu mweiwusa teta ya kutinyiswa, "Mpela mteta nyofu ya akayanikila pa moto, muni mwene itola lepi nyofu yeyiviliswi kuhuma kwaku, nambu itola yivisi." 16 Ngati mundu mwenuyo akamjovelayi, "Lindilayi hoti niyocha mahuta ndi utolayi chewigana," Penapo muhengaji mwenuyo amuyangulayi, "Pehe, unipelayi hinu naha. Ngati ukunipela lepi ndi yati nitola cha makakala." 17 Kubudila kwenuko kwevakitili vana va Eli ndi kwavii kuvaha neju palongolo ya Bambu. Muni vasongolo venavo vazivevisi teta zezawusiwi kwa Bambu Chapanga.

18 Nambu Samweli ayendalili kumuhengela Bambu Chapanga kuni awalili chizibau chamsopi. 19 Mu kila mwaka nyina waki amutotelayi kanzu yidebe, na amupelekelayi pevahambayi na mngana waki kuwusa teta ya kutinyiswa ya mwaka. 20 Eli akammotisa Elikana na mdala waki akajova, "Bambu Chapanga akuwuyasila veve Elikana vana vangi kwa mudala mwenuyu muni vatolayi pandu pa msongolo mwenuyu mweabaguliwi ndava ya Bambu Chapanga." Pegamaliki genago vakakiliwuka ku nyumba yavi. 21 Bambu Chapanga amkitili gabwina Hana, ndi akaveleka vana vagosi vadatu na vana vadala vavili. Lukumbi lulwolwo msongolo Samweli ayendelela kukula na kuyendelela kumuhengela Bambu Chapanga.

22 Lukumbi lwenulo Eli avii mgogolo neju. Ayuwini mambu goha gevahengayi vana vaki va chigosi kwa vandu voha va Isilaeli, na chevagonekanayi na vadala vevahengayi lihengu mu lindanda la kukonganekela ndava ya Chapanga. 23 Penapo akavakota vana vaki, "Ndava kyani mukita mambu ngati aga? Niyuwana kuhuma kwa vandu voha gahakahu gemwikita. 24 Mukotoka kukita chenicho mwavana vangu! Muni mambu geniyuwana kuhuma kwa vandu va Bambu Chapanga ndi gahakau. 25 Ngati mundu amubudili muyaki, Bambu Chapanga ihotola kumtetela mundu mwenuyo. Nambu mundu akamubudilayi Bambu Chapanga ndi yani mweihotolayi kumuyupila kwa Bambu Chapanga muni alekekeswayi?" Nambu vana venavo vamuyuwanili lepi dadi wavi, muni Bambu Chapanga amali kuhamula kuvakoma. 26 Msongolo Samweli akayendelela kukula, kuni akumanisa Bambu Chapanga pamonga na vandu.

27 Ligono limonga mlota wa Bambu Chapanga akamuhambila Eli, akamujovela, "Bambu Chapanga ijova naha, ‘Najigubukwili kwa vandu va mu nyumba ya Haluni dadi waku peavili ku uvanda kwa Falao ku mulima wa Misili. 28 Pagati ya makabila goha ga Isilaeli namuhagwili Haluni na vandu vaki voha vavyayi vamteta vangu, vanihengelayi na vawusa teta za kutinyiswa pandu pa kuwusila teta, vahukisayi ubani na vawalayi chizibau kuni vakunihengela. Vandu va mu nyumba ya dadi waku Haluni vapewa pandu pa teta zangu za kutinyiswa zevaniwusili vandu va Isilaeli kwa motu. 29 Ndava kyani, ukuzimilila mata teta za kutinyiswa na teta zenavalagizi vandu vaniletelayi? Veve uvayuwanili vana vaku kuliku nene kwa kujikulupalisa mwavene kwa kulya pandu pabwina pa teta zevakuniwusila vandu vangu va Isilaeli!’ 30 Hinu Bambu Chapanga, Chapanga wa Isilaeli, ijova naha, ‘Najovili kuvya vandu va munyumba yaku na vandu va munyumba ya vagogo vaku yati mwibwela palongolo yangu kunihengela magono goha gangali mwisu,’ Nambu hinu Bambu Chapanga ijova kuvya yati nikita lepi chenicho kangi, yati nikuvatopesa vala vevakunitopesa na vala vevakunivevesa yati nikuvavevesa. 31 Lola magono gibwela genikuvakoma vasongolo va mu vandu va mu nyumba yaku na mu lukolo lwaku, penapo yati kwivya lepi na mgosi yoyoha mweisigalila mumi mbaka muugogolo waki. 32 Vandu va mu nyumba yaku yati ving'ahika pevivya mu nyumba yangu, pamonga kuvya Vaisilaeli yati vimotisiwa, kawaka mundu mweitama muni mbaka kuvya mgogolo mu lukolo lwaku. 33 Yoyoha mwenikumleka mumi yati ilekwa ndava ya kuvemba na kuuvinisa mtima waki, na vagosi vamahele muuveleku waku yati vifwa vakona vangavya vagogolo. 34 Na chila chechikuvakolela vana vaku vavili, Hofini na Finehasi ndi voha vavili yati vifwa ligono limonga na lijambu lenilo ndi yati livya ulangisu. 35 Kangi yati nikumuhagula mteta yungi msadikika mweikita gala ga mumtima wangu na genikugaholalela. Mwene yati nikumpela uveleku weukangamili, na vene magono goha yati vakumuhengela nkosi mwenikumuhagula. 36 Mundu yoyoha mweisigalilayi mu vandu va munyumba yaku yati akumuhambila mteta mwenuyo na kumgundamila na kumuyupa mashonga amala chipandi cha libumunda, na kumujovela, ‘Chondi niyupa nipela lihengu nunuyu mu uteta muni nihotola kupata chakulya.’"