1 Samweli akamujovela Sauli, "Bambu Chapanga anitumili nikuyitilayi mahuta uvyayi nkosi wa vandu vaki va Isilaeli. Hinu yuwanilayi malovi ga Bambu Chapanga. 2 Bambu Chapanga mweavi na makakala goha ijova naha, ‘Yati nikuvabuna Vaamaleki ndava vavatovili Vaisilaeli pevahumayi ku Misili. 3 Hinu hambayi ukavahanganilayi na kuyongomesa vindu vyavi vyoha. Ukoto kuleka chindu chochoha, nambu uvakomayi voha vagosi na vadala na vana vadebe na vana vevinyonga pamonga na ng'ombi na mambelele na ngamiya na mapunda.’"

4 Ndi Sauli akavakemela manjolinjoli vaki ku Telaimu, manjolinjoli vevigenda kwa magendelu vakavya laki zivili vevahumili ku Isilaeli, na vevahumili ku Yuda vavili elufu kumi. 5 Kangi Sauli na vandu vaki vakahamba ku muji wa Amaleki, vakajihiha mu ligema muni kuvanyemelela. 6 Sauli akavajovela Vakeni, "Mujibagula pagati ya Vaamaleki, ngati mukabelayi yati nikuvakoma nyenye pamonga na vene. Muwukayi ndava nyenye mwavakitili gabwina Vaisilaeli pevawukayi ku Misili." Ndi Wakeni vakajibagula pagati ya Vaamaleki.

7 Kangi Sauli akavatova Vaamaleki tangia ku Havila mbaka ku Shuli yeyivii ku upandi welihumila lilanga wa Misili. 8 Akamkamula Agagi nkosi wa Vaamaleki kuni avii mumi na kuvakoma vandu vaki voha kwa upanga. 9 Nambu Sauli pamonga na manjolinjoli vaki vamulekili mumi Agagi pamonga na mambelele gegakulupalili na ng'ombi zabwina na mipapakasi yaki na vanamambelele pamonga na kila chindu chechawonakini kuvya chabwina. Vindu vyenivyo vaganili lepi kuvikomakesa njwee, nambu vindu vyevyaveviswi na hinyama yeyigandili vahikomakisi njwee.

10 Kangi Bambu Chapanga akamujovela Samweli, 11 "Ninung'unika kuvya nimukitili Sauli avyayi nkosi, mwene alekili kunilanda nene na ikamula lepi malagizu gangu." Samweli akanung'unika na akamuvembele Bambu Chapanga kilu yoha. 12 Samweli akayimuka lukela pee akahamba kukongana na Sauli, kwenuko akajoviwa kuvya Sauli ahambili ku Kalimeli, na kwenuko ajiyimamisili liganga la ukumbuso wa ukulu waki, na hinu awuyili na kuhamba ku Giligali. 13 Samweli peakonganiki na Sauli, ndi Sauli akamujovela Samweli, "Umotiswayi na Bambu Chapanga! Nigayidakili gala geanijovili Bambu Chapanga nigakitayi."

14 Samweli akamkota, "Kuvemba kwenuku kwa mambelele kweniyuwana mu makutu gangu, na kuvemba kwenuku kwa ng'ombi kwenikuyuwana ndi chindu kiki?"

15 Sauli akamuyangula, "Manjolinjoli vaviletili kuhuma kwa Vaamaleki, vakomili lepi ng'ombi na mambelele gegakulupalili, vavilekili muni vamuwusilayi luteta lwa kutinyiswa Bambu Chapanga, Chapanga waku, nambu hingi yoha tahikomakisi njwee."

16 Samweli akamujovela Sauli, "Gunayi! Lindila nikujovela geanijovili Bambu Chapanga lelu kilu."

Sauli akayangula, "Nijovela."

17 Samweli akamujovela, "Pamonga kuvya kadeni wamwene wajiweni kuvya wamudebe pamihu paku wamwene, wu, wakitiki lepi kuvya wachilongosi wa makabila ga Isilaeli? Bambu Chapanga akunyalili mahuta uvyayi nkosi wa Vaisilaeli. 18 Bambu Chapanga peakutumili akujovili, ‘Hamba ukavakomakesa njwee Vaamaleki vevabudili, ukatovanayi navu mbaka uvakoma voha.’ 19 Ndava kyani wamuyidakili lepi Bambu Chapanga? Ndava kyani wajumbalili kutola vindu na kukita uhakahu palongolo ya Bambu Chapanga?"

20 Sauli akayangula, "Chakaka nene nimuyidakili Bambu Chapanga, nahambili kula ngati cheanilagizi Bambu Chapanga, nivakomakisi Vaamaleki voha na nimuletili apa Agagi nkosi wa Vaamaleki. 21 Nambu manjolinjoli vangu vatolili mambelele na ng'ombi zezikulupalili pamonga na vindu vyoha vyevyavili vyabwina ndava ya kumuwusila Bambu Chapanga, Chapanga waku teta ya kutinyiswa ku Giligali."

22 Samweli akamkota, "Wu, wiholalela kuvya Bambu Chapanga igana teta za kutinyiswa na teta zingi kuliku kumyidakila mwene? Lola, chabwina Kumuyidakila mwene kuliku kuwusa teta, na chabwina kumuyuwanila mwene kuliku kuwusa mahuta ga limbelele ligosi. 23 Kumng'anamukila Bambu Chapanga kuwanangana na uhakahu wa uhavi, na chinywinda ndi ngati uhakahu wa kufugamila vimong'omong'o. Ndava muni ubelili malagizu ga Bambu Chapanga, na mwene akubelili ukotoka kuvya nkosi."

24 Penapo Sauli akamujovela Samweli, "Chakaka nimbudili Bambu Chapanga, nikitili lepi geanijovili Bambu Chapanga na malagizu gaku, ndava navayogwipi vandu na nikakita gevigana vene. 25 Hinu nikukuyupa unilekekesayi kubuda kwangu, na ukiliwukayi pamonga na nene ndava nikamufugamilayi Bambu Chapanga."

26 Samweli akamuyangula, "Katu nihotola lepi kukiliwuka pamonga na veve. Veve wabelili malagizu ga Bambu Chapanga na mwene akubelili veve ukoto kuyendelela kuvya nkosi wa vandu vaki va Isilaeli."

27 Samweli peang'anamwiki kugana kuwuka, Sauli akakamula lugwinyilu lwa nyula ya Samweli na nyula yikapapuka. 28 Penapo Samweli akamujovela Sauli, "Kuhumila lelu Bambu Chapanga autolili unkosi wa Isilaeli kuhuma kwaku kwa makakala na yati akumupela Muisilaeli yungi mweavii mbwina kuliku veve. 29 Bambu Chapanga, Chapanga mweavi ukulu wa Vaisilaeli ijova lepi makehu, na ing'anamusa lepi geajovili. Muni mwene mundu lepi mbaka ang'anamusa maholo gaki."

30 Sauli akamuyangula, "Nikitili uhakahu. Pamonga na naha nitopesayi palongolo ya vagogo va vandu vangu na Vaisilaeli. Niyidakilayi nikiliwukayi pamonga na veve nikamufugamilayi Bambu Chapanga, Chapanga waku." 31 Ndi Samweli akakiliwuka pamonga na Sauli mbaka ku Giligali, na Sauli akamufugamila Bambu Chapanga.

32 Ndi Samweli akajova, "Muniletelayi apa Agagi nkosi wa Vaamaleki." Agagi akamuhambila Samweli kuni asangalwiki, muni aholalili kuvya yati ikomiwa lepi. 33 Nambu Samweli akajova, "Ngati upanga waku chewavakitili vadala vamahele vakoto kuvya na vana, ndi na veve nyina waku yati ivya lepi na mwana pagati ya vadala." Samweli akamudumulana Agagi hipandi hipandi palongolo ya Bambu Chapanga ku Giligali.

34 Pagenago Samweli akahamba ku Lama, na nkosi Sauli akakwela kukiliwuka ku nyumba yaki ku Gibea. 35 Kuhumila ligono lenilo Samweli amuweni lepi kavili Sauli, nambu Samweli avii na uvinisu mu mtima ndava ya gala geakitili Sauli. Bambu Chapanga na mwene akavya ngolongondi ndava ya Sauli, muni amuhagwili avya nkosi wa Vaisilaeli.