1 Pewapitili mwehi umonga Nahashi nkosi wa Vaamoli akahamba kuuzangila muji wa Yabeshi Gileadi. Vakolonjinji va pa Yabeshi Gileadi vakamujovela Nahashi, "Kita malaganu na tete na tete yati tikukuhengela." 2 Nahashi akavayangula, "Malaganu genivika na nyenye ndi aga, mwavoha yati nikuvatupula lihu limonga la upandi wa kulyela, chenicho chikuvapela soni vandu voha va pa Isilaeli." 3 Vachilongosi va pa Yabeshi vakamujovela, "Tipela magono saba muni tituma vandu pa mulima woha wa Isilaeli vakalonda mundu wa kutisangula. Nambu ngati kusi mundu yoyoha wa kutisangula, ndi yati tikujileta na kuvya pahi yaku." 4 Vandu vala pevahikili ku muji wa Gibea, kweitama Sauli ndi vakatumbula kukokosa mambu genago na vandu voha vakavemba kwa lwami. 5 Lukumbi lulolo Sauli akiliwukayi kuhuma ku mgunda pamonga na ng'ombi yaki ya kulimila, ndi akakota, "Vandu venava vana kyani? Ndava kyani vivemba?" Ndi vakamukokosela mambu gevakokwisi vandu vevabwelili kuhuma ku Yabeshi. 6 Sauli peayuwini mambu genago, Mpungu wa Bambu Chapanga ukamubwelela kwa makakala, na mwene akavya na ligoga neju. 7 Akatola ng'ombi zigosi zivili akazidumulana hipandi hipandi, akatuma vandu vahipitisayi hipandi yeniyo pa Isilaeli poha kuni vijova, "Mundu yoyoha mweibela kumulanda Sauli na Samweli ku ngondo, ng'ombi zaki yati zikitiwa chenicho." Vandu va pa Isilaeli vakavya na wogohi ndava ya Bambu Chapanga, ndi vandu voha vakawuka, vakawungana naku na kuvya chindu chimonga. 8 Sauli peavakonganisi Vaisilaeli ku Bezeki akavya na vandu kuhuma ku Isilaeli laki hidatu na va kuhuma ku Yuda elufu selasini. 9 Vakavajovela vajumbi vevabwelili kukokosa kuhuma ku Yabeshi, "Mukavajovelayi vakolonjinji va ku Yabeshi Gileadi, chilau muhi lilanga peliyaka neju, yati muvya mumali kusanguliwa." Vakolonjinji va pa Yabeshi pevayuwini malovi genago ndi vakasangaluka neju. 10 Ndi vakavajovela Vaamoni, "Chilau yati tikujileta na kuvya pahi yinu, na nyenye yati mukutikitila chochoha chemwigana." 11 Chilau yaki Sauli akagavanisa vandu vaki misambi hidatu, lukela pehe vakayingi pa kambi ya Vaamoni na kuvahanganila, vakavakoma mbaka muhi. Vala vevasumukini vakapechengana kila mundu akatila mwene. 12 Penapo Vaisilaeli vakamkota Samweli, "Vavili kwoki vandu vala vevajovayi Sauli ihotola lepi kuvya nkosi witu? Tiletelayi vandu venavo tivakome." 13 Nambu Sauli akavajovela, "Kawaka mundu yoyoha mweikomiwayi lelu, muni lelu Bambu Chapanga avagombwili Vaisilaeli." 14 Kangi Samweli akavajovela vandu, "Tihambayi tavoha ku Giligali tikakokosayi kavili kuvya Sauli ndi nkosi witu." 15 Vandu voha vakahamba ku Giligali, na pevahikili kwenuko vakamkokosa Sauli kuvya nkosi. Vakamuwusila Bambu Chapanga teta za uteke, Sauli pamonga na vandu voha va Isilaeli vakakita mselebuko uvaha.