1 Lukumbi lwenulo msongolo Samweli avii akumuhengela Bambu Chapanga kuni iyimamiwa Eli. Na mwene Bambu Chapanga alongili na vandu hotohoto mala zidebe, na avalotisi lepi ndoto lukumbi lwoha. 2 Kilu yimonga Eli mweavii na mihu gegatubwili kubela kulola bwina avii agonili mu chumba chaki. 3 Samweli mewa avii agonili munyumba ya Bambu Chapanga papipi na Lisanduku la Lilaganu la Chapanga. Na hai ya Bambu Chapanga yavili yakona yiyaka. 4 Ndi Bambu Chapanga akamukemela Samweli! Na mwene Samweli akayidika "Nene apa." 5 Kangi Samweli akajumba na kumuhambila mteta Eli akamujovela, "Nibwelili muni veve unikemili." Nambu Eli akamujovela, "Nene nikukemili lepi, hamba ukagonayi." Samweli akahamba kugona kavili. 6 Bambu Chapanga akamukemela kavili Samweli, "Samweli!" Samweli akayimuka akamuhambila kavili Eli na kumujovela, "Nibwelili muni ndava unikemili." Nambu Eli akamujovela, "Wamwana wangu nikukemili lepi, hamba kagona kavili." 7 Samweli avii akona angamumanya Bambu Chapanga, na Linenu la Bambu Chapanga lavii lakona langagubukuliwa kwaki. 8 Bambu Chapanga akamukemela Samweli kwa mala ya datu. Samweli akayimuka, na akamuhambila Eli akamujovela, "Nibwelili ndava ukanikemili." Penapo Eli akamanya kuvya Bambu Chapanga ndi mweakumukemela Samweli. 9 Ndi Eli akamujovela Samweli, "Hamba kagona na akakukemelayi kavili mujovelayi naha, ‘Jova veve Bambu Chapanga muni nene mtumisi waku nikuyuwanila.’" Ndi Samweli akakiliwuka kugona pandu paki. 10 Bambu Chapanga akabwela akayima papipi nayu na akamukemela ngati cheamukemili pakutumbula, "Samweli! Samweli!" Samweli akayangula, "Jova, ndava muni nene mtumisi waku nikuyuwanila!" 11 Kangi Bambu Chapanga akamujovela Samweli, "Yuwanila nivii papipi kukita lijambu nunuyu pa mulima wa Isilaeli na mundu yoyoha mweiyuwanayi yati ivya na wogohi. 12 Ligono lenilo yati nikumkitila Eli pamonga na vandu va munyumba yaki mambu gala goha genajovili yati nikumkitila tangia pakutumbula mbaka pamwisu. 13 Namujovili kuvya yati nikuvabuna vandu va munyumba yaki magono goha gangali ni mwisu, ndava ya kumbudila kwavi Chapanga kweakumanyili muni vana vaki va chigosi vaniligili nene, na mwene avalakalili lepi. 14 Ndava yeniyo nilapa kuvala vandu va mu nyumba ya Eli kuvya kubuda kwavi yati kuwusiwa lepi kwa teta ya kuhinjwa amala kwa teta." 15 Samweli akagona penapala mbaka lukela, akayimuka na kudindula milyangu ga nyumba ya Bambu Chapanga. Nambu ayogwipi kumujovela Eli gala geajovili Bambu Chapanga. 16 Nambu Eli akamukemela, "Msongolo wangu Samweli!" Samweli akayangula, "Nene apa." 17 Eli akamukota, "Wu, Bambu Chapanga akakujovili kyani? Kotoka kunihiha cheakujovili, ngati ukanihiha Chapanga akubuna neju." 18 Ndi, Samweli akamujovela Eli goha geajoviwi, amuhihili lepi chindu chochoha. Eli akajova, "Mwene ndi Bambu Chapanga muleka ahenga chochoha cheiwona kuvya chabwina kwaki." 19 Bambu Chapanga avii pamonga na Samweli peakulayi, na gala goha geajovili kawaka hati limonga lealileki kukita. 20 Vandu voha va pamulima wa Isilaeli tangia ku Dani, upandi wa kasikazini, mbaka Beeli Sheba kuupandi wa kusini, vakamanya kuvya Samweli avii mlota wa Bambu Chapanga. 21 Bambu Chapanga akayendelela kujilangisa uko ku Shilo kweamuhumalili Samweli kwa ndila ya linenu laki.