1 Kangi Samweli akatola kachupa kadebe ka mahuta akamuyitalila Sauli ku mutu, akamukumbatila na kumujovela, "Bambu Chapanga akusopili mahuta muni uvyayi mtalalila wa vandu vaki vevavi pa mulima waki. 2 Petilagana na nene lelu, yati ukongana na vandu vavili papipi na litinda la Laheli, ku Selisa ku mubaka wa Benjamini. Yati vaku jovela kuvya mapunda gala gewahambili kugalonda gawonikini. Dadi waku alekili kuholalela mapunda gegahovalili, na hinu akuholalela veve, na akujikota, ‘Yati nikumpata wuli mwana wangu?’ 3 Ukawuka penapo uhamba ku mkongo uvaha weukemiwa mwaloni weuvii ku Taboli, pandu penapo yati ukonganeka na vagosi vadatu vevihamba ku Beteli kumuwusila teta Chapanga. Pagati yavi mumonga ihuta mene zidebezidebe zidatu, na yungi agegili mabumunda gadatu, na wadatu agegili kahaku ka chikumba kekamemili divayi. 4 Yati vakukujambusa na kukupela mabumunda gavili, na veve yati upokela mabumunda genago. 5 Kangi peuhika ku Gibea ya Chapanga, pandu pevaviki kambi manjolinjoli va Vafilisiti, pepavili papipi na muji penapo yati ukonganeka na msambi wa vamulota vihelela kuhuma pandu pa kunena ya kutetela kuni vitova kanjeke na ng'oma hidebe na vitolilo na lilimba kuni viwusa ulota. 6 Mpungu wa Bambu Chapanga yati ukuyingila chimakakala, na veve yati utumbula kuwusa ulota pamonga navu na veve yati ung'anamuswa kuvya wamundu mbwina neju. 7 Lukumbi mambu genago pegakumwangilayi, ukitayi chochoha cheuganikiwa kukita, muni Chapanga avii pamonga na veve. 8 Yati ukunilongolela kuhamba ku muji wa Giligali, na nene yati nikukubwelela kwenuko kuwusa teta za kutinyiswa na teta za uteke. Yati ukunilindila penapo kwa magono saba mbaka nibwelayi kukulangisa chakuhenga."

9 Sauli peawukili ndu kulekana na Samweli, Chapanga akaunganamusa mtima wa Sauli. Goha geajoviwi na Samweli gakahumalila ligono lilalila. 10 Sauli na mtumisi waki pevahikili ku Gibea, vakakonganeka na msambi wa vamulota. Mpungu wa Chapanga ukamuyingila chimakakala, na mwene akatumbula kuwusa ulota pamonga navu. 11 Vandu vevammanyili Sauli tangiya kadeni, pevamuweni iwusa ulota ndi vakakotana, "Chimukolili kyani mwana wa Kishi? Wu, Sauli na mwene mlota mewa?" 12 Mundu mmonga mkolonjinji wa penapo akakota, "Wu, dadi wavi ndi yani?" Kwahumalili luhumu lwelujova, "Wu, Sauli mewa ndi mmonga wa vamlota?" 13 Sauli peamalili kuwusa ulota, akakwela kuhamba ku chitumbi pandu pa kutetela. 14 Dadi waki mdebe Sauli peavaweni Sauli na muhengaji waki, akavakota, "Mwahambili kwoki?" Sauli akayangula, "Tahambili kugalonda mapunda. Nambu petasindwili kugawona, tikamuhambila Samweli." 15 Dadi waki mdogo yula akamjovela Sauli, "Chondi, nijovelayi cheakujovili Samweli." 16 Sauli akamyangula, "Atijovili hotohoto kuvya mapunda gamali kuwonekana." Nambu Sauli amujovili lepi dadi waki mdebe kuvya Samweli amujovili kuvya yati ivya nkosi.

17 Samweli akavakemela Vandu voha vakonganeka palongolo ya Bambu Chapanga uko ku Mizipa. 18 Pevabwelili ndi akavajovela, "Bambu Chapanga, Chapanga wa Isilaeli ijova naha, ‘Navagombwili nyenye Mwavaizilaeli kuhuma ku mulima wa Misili, na navawusili kuhuma kwa Vamisili na vankosi voha vevavang'ahili nyenye. 19 Nambu lelu munibelili nene Chapanga winu, mwenavagombwili kuhuma mu mang'aisu na mtau, na nyenye mwijova mwigana nkosi. Hinu mbwela palongolo ya Bambu Chapanga kuni muvii mu makabila ginu na mu lukolo zinu.’" 20 Samweli peagakonganisi makabila goha ga Isilaeli pamonga, na Bambu Chapanga akalihagula likabila la Benjamini. 21 Akavaleta palongolo vandu va likabila la Benjamini lukolo kwa lukolo, na lukolo lwa Matili lukahaguliwa. Kangi vakakina gudugudu, na Sauli mwana wa Kishi akahaguliwa. Nambu pevamulondili Sauli mwene vamuweni lepi. 22 Penapo vakamukota kavili Bambu Chapanga, "Wu, mundu mwenuyu amali kubwela penapa?" Bambu Chapanga akavayangula, "Ena avile, nambu ajihihi pala pamizigu." 23 Hinu vandu vakajumba kuhamba kumtola Sauli na kumuleta palongolo ya vandu. Sauli peayimili pagati ya vandu, avili mtali kuliku vandu voha, na voha vamuhikila mu mavega. 24 Samweli akavajovela vandu voha, "Wu, mukumuwona? Mwenuyu ndi mundu mweahaguliwi na Bambu Chapanga pagati yinu, kawaka yungi mweavii ngati mwenuyu pagati ya vandu voha."

Ndi vandu voha vakajova, "Nkosi atama wumi wa magono gamahele."

25 Samweli akavakokosela vandu voha uhotola na mahengu geiganikiwa kukita nkosi, kangi akagayandika mahengu genago goha mu chitabu na kuchivika palongolo ya Bambu Chapanga. Kangi Samweli akavalaga vandu na kuvajovela voha vakiliwukayi ku nyumba zavi. 26 Mewa Sauli akahamba ku nyumba yaki ku Gibea, kuni ihindikiswa na vandu vakekesi va ngondo vala vevalongwiswi na Chapanga kukita chenicho. 27 Nambu pavili na vandu vangi vevanaluhonda, vakajova, "Wu, mundu mwenuyu yati ihotola kutisangula?" Venavo vakamuvevesa Sauli na vamupelili lepi njombi yoyoha. Nambu Sauli aguni nuu.