1 Daudi akahamba kwa mteta Ahimeleki uko ku Nobu. Ahimeleki akahamba kumupokela kuni indendemeka, akamukota Daudi, "Ndava kyani uvii wamwene? Na ndava kyani ubwelili lepi na mundu yungi?" 2 Daudi akamuyangula, "Nibwelili namwene muni nkosi anitumili nibwela apa kumkitila lijambu nunuyu. Anijovoli katu nikotoka kumukokosela mundu yoyoha pandu penivili na lijambu leniganikiwa kukita. Nilagini na vandu vangu kuvya tikonganeka pandu nunuyu. 3 Wu, uvii na chakulya chochoha peapa? Nikuyupa unipela mabumunda muhanu amala chochoha cheuvii nachu." 4 Mteta Ahimeleki akamuyangula Daudi, "Apa nivii lepi na mabumunda geugana veve, nambu nivi nagu mabumunda gegawusiwi kwa Bambu Chapanga gegiliwa na vamteta ndu. Nihotola kukupela mabumunda aga ngati ndu vandu vaku vagonikini lepi na vadala vavi." 5 Daudi akamujovela, "Chakaka nene na vandu vangu tigonikini lepi na vadala vitu mu magono aga gadatu, ngati chetikitaga petivya mu lugendu lwa magono goha. Mivili ya vandu vangu yiyidakiliwa mu kumfugamila Bambu Chapanga magono goha petivya mu lugendu, na mu lugendu lwenulu lijambu lenilo ndi liganikiwa neju." 6 Penapo mteta Ahimeleki akampela Daudi mabumunda gegawusiwi kwa Chapanga, muni pavili lepi na mabumunda gangi nga gago ndu gegavikiwi palongolo ya Bambu Chapanga. Vakagawusa mabumunda genago na kuvika mabumunda gangi gegahumi pa chihinja lukumbi lulwolwo ligono lila pegawusiwi. 7 Hinu ligono lenilo pavili na muhengaji mmonga wa Sauli, mweaganikiwa kunyambiswa muni ayidakiliwa palongolo ya Bambu Chapanga, liina laki akemiwa Doegi, mundu wa kuhuma ku Edomu, chilongosi wa vandu vevamdimila Sauli mifwiya yaki. 8 Daudi akamukota Ahimeleki, "Wu, una upanga amala mgoha unipelayi? Nene nawukili changali kugega upanga wangu wala chindu chingi chochoha cha ngondo, muni lihengu la nkosi laganikiwi likitika kanyata." 9 Mteta Ahimeleki akamuyangula, "Nivii nawu upanga ula wa Goliati Mufilisiti yula mwewamukomili kuligema lelikemiwa Ela, uvii kuyetu ya kagwanda ka mteta ukungiwi mu chitambala. Ngati ugana kuutola, utolayi muni kawaka upanga wungi peapa."

Daudi akamujovela, "Ngati kawaka upanga wungi ngati wenuwo, nikuyupa unipelayi wuwowo." 10 Hinu ligono lilolo Daudi akawuka, akamtila Sauli, akahamba kwa Akishi nkosi wa ku Gati. 11 Vahengaji va nkosi vakamujovela Akishi, "Mwenuyu Daudi lepi nkosi wa mulima wa Isilaeli? Mwenuyu ndi mwevamuyimbili lunyimbu mung'oma zavi ndava yaki kujova, ‘Sauli akomili vandu vaki maelufu na Daudi akomili vandu vaki makumi elufu.’ " 12 Daudi agavikili malovi genago mu mtima, na akamuyogopa neju Akishi nkosi wa ku Gati. 13 Ndava yeniyo Daudi akajikita awonekana ngati mundu mweipenga palongolo yavi, pevaganayi kumkamula, mwene akakwendakwenda luwumba na kuvika alama munani ya mulyangu na kuleka mata gamuhelelayi mu manjwemba gaki. 14 Akishi akavajovela vatumisi vaki, "Mlola! Mundu mwenuyu ipenga! Ndava kyani mumuletili kwa nene? 15 Wu, nene nigana mundu yungi mweavii na lupengu akita mambu genaga palongolo yang? Nigana lepi mundu mwenuyu ayingila mu nyumba yangu."