1 Kangi Samweli akavajovela Vaisilaeli voha, "Goha gemunijovili nigayuwini na nivapelili nkosi winu mweakuvatalalila. 2 Hinu muvii na nkosi mweakuvalongosa. Nene hinu namugogolo na ninahulia, na vana vangu va chigosi vavili pamonga na nyenye. Navii chilongosi winu tangia usongolo wangu mbaka lelu. 3 Nene niyimili apa, ngati nikitili uhakau wowoha, mkokosa palongolo ya Bambu Chapanga na palongolo ya nkosi waki mweamuhagwili. Wu, ninyagili ng'ombi amala lipunda la mundu yoyoha? Yani mwenimukongili? Yani mwenimuwonili pagati yinu? Wu, nipokili hongo kwa mundu yoyoha ndava nikoto kuhamula cha uchakaka? Ngati nikiti genago, nene yati nikuvawuyasila." 4 Vandu vakamuyangula, "Pehe, utikongili lepi, wala watiwonili lepi na utolili lepi chindu chochoha cha mundu." 5 Samweli akavayangula, "Bambu Chapanga ndi shahidi winu, na nkosi waki mweamuhagwili lelu ndi shahidi ngati muniweni kawaka chindu chihakau chanikitili." Vene vakamyangula, "Mwene Bambu Chapanga ndi shahidi." 6 Samweli akayendelela kujova, "Bambu Chapanga ndi mweavahagwili Musa na Aluni na kuvawusa vagogo vinu ku mulima wa Misili. 7 Hinu muyimayi bahopo pemuvili muni tigalola palongolo ya Bambu matendu ga chakaka geagakitili mwene Bambu Chapanga kwinu nyenye na kwa vagogo vinu." 8 "Yakobo na vandu va mu nyumba yaki pevahambili ku Misili na Vamisili pevavang'ahili nyenye, ndi vagogo vinu vakamuvembela Bambu Chapanga, na mwene akavatuma Musa na Haluni, na vene vakavawusa vagogo vinu ku mulima wa Misili na kuvakita mutama mu mulima uwu. 9 Nambu vene vakamukosiwa Bambu Chapanga, Chapanga wavi, na mwene akamukita Sisela mweavili mukulu wa manjolinjoli ga Hazoli avatova, mewa vabuniwi na Vafilisiti na nkosi wa ku Moabu. Vandu va milima yeniyo vakomini na vagogo vinu na kuvahotola. 10 Vagogo vinu vakamuvembela Bambu Chapanga kuni vijova, ‘Tibudili kwa kukuleka veve Bambu Chapanga, na kwa kuihengela michapanga Baali na Ashitaloti. Hinu tisangulayi tikoto kutoviwa na vamakoko vitu, na tete yati tikukuhengela veve.’ 11 Penapo Bambu Chapanga akamutuma Yelubaali, na badayi akamutuma Balaki, kangi akamutuma Yefita, na pamwisu akanituma nene Samweli. Na Bambu Chapanga akavasangula muwuka kwa vamakoko vinu vevavatindili pandi zoha, na nyenye mkatama cha uteke. 12 Nambu pemwamuweni nkosi Nahashi wa Vaamoni abwelili kuvatova, mwamubelili Bambu Chapanga mweavii nkosi winu, mukanijovela, ‘Pehe, tigana nkosi atitalalila.’"

13 "Hinu, nkosi mwemujihagulili ndi uyu apa, mwamuyupili Bambu Chapanga avapelayi nkosi na mwene avapelili nkosi avatalalilayi. 14 Ngati mukamtopesa Bambu Chapanga, Chapanga winu na kumuhengela na kuyidakila changali kuleka kulanda malagizu gaki, nyenye mwavene na nkosi winu mweakuvatalalila, mukamulandayi Bambu Chapanga, Chapanga winu, ndi mambu yati gakuvahambila bwina. 15 Nambu ngati yati mukumuyuwanila lepi Bambu Chapanga, na kuleka kukamula malagizu gaki, mwene yati akuvabuna nyenye na nkosi winu ngati cheavabunili vagogo vinu. 16 Hinu, muyima yati mukulilola lijambu livaha leakulikitayi Bambu Chapanga palongolo yinu. 17 Wu, lukumbi ulu si ndi chilangasi na ndi lukumbi lwa kubena nganu? Nambu nene yati nikumuyupa Bambu Chapanga aletayi fula na mbamba. Na nyenye yati mwimanya kuvya lijambu linu lemukitili la kujiyupila nkosi winu chelivii lihakau palongolo ya Bambu Chapanga." 18 Ndi Samweli akamuyupa Bambu Chapanga, mu ligono lilolo Bambu Chapanga akatonyesa fula na mbamba. Vandu vakamuyogopa neju Bambu Chapanga na Samweli mewa. 19 Hinu vakamujovela Samweli, "Chondi utiyupilayi kwa Bambu Chapanga, Chapanga waku, tete tavatumisi vaku tikotokayi kufwa; muni uhakau witu uyonjosiki kuvya uvaha neju kwa kugana kwitu kuvya na nkosi." 20 Samweli akavayangula, "Mukotoka kuyogopa hati ngati mukitili uhakau uhu woha, mukotoka kuleka kumulanda Bambu Chapanga, na mumuhengelayi kwa mitima yinu yoha. 21 Mukotoka kuhilanda michapanga ya makeu yeyangavya na chindu na hihotola lepi kuvasangula, muni yihotola lepi kukita chindu chochoha. 22 Ndava ya liina laki likulu, Bambu Chapanga yati akuvataga lepi vandu vaki, muni Bambu aganiswi kuvakita muvya mwavandu vaki. 23 Nambu nene yati nileka lepi kuvayupila kwa Bambu Chapanga, muni nikakitayi chenicho yati nivya nimubudili Bambu Chapanga. Ndava yeniyo yati niyendelela kuvawula muni mutama kwa kukita mambu gabwina na gegiyidakiliwa palongolo ya Bambu Chapanga. 24 Hinu nyenye mumtopesa Bambu Chapanga lukumbi lwoha na kumuhengela cha uchakaa na kwa mitima yinu yoha. Mugakumbukayi gala mambu gakulu geavakitili. 25 Nambu ngati mukayendelelayi kukita gahakahu, ndi yati mukomakeswa nyenye pamonga na nkosi winu."