1 Pegapitili magono gadatu, Daudi pamonga na vandu vaki vakakiliwuka ku Sikilagi. Vaamaleki vavii vamali kuutova mulima wa kusini ya Yuda weukemiwa Negebu pamonga na muji wa Sikilagi na kuutinyisa motu. 2 Vavakamwili vadala na vandu voha vevavili mu muji wenuwo, vavaha na vadebe. Vamkomili lepi hati mmonga, nambu vavatolili na kuhamba navu. 3 Daudi na vandu vaki pevahikili mu muji weukemiwa Sikilagi, vakakolela muji utinyiswi na motu, vadala pamonga na vana vavi vagosi na vadala vakamuliwi na kutolewa. 4 Penapo Daudi na vandu vaki vakatumbula kuvemba kwa lwami mbaka makakala gakavamalika. 5 Vadala vavili va Daudi, Ahinoamu wa kuhuma ku Yezileeli na Abigaili lipwela mweavii mdala wa Nabali wa kuhuma ku Kalimeli, na vena mewa vatoliwi.

6 Penapo Daudi avii mu mang'aisu gavaha muni vandu vajovesanayi kugana kumutova maganga, kila mundu avii na mvinisu mu mtima waki ndava ya kuyagisa vana vavi vagosi na vadala. Nambu Daudi apewi makakala na Bambu Chapanga, Chapanga waki. 7 Penapo Daudi akamujovela mteta Abiasali mwana wa Ahimeleki, "Niletela kakoti ka chimteta." Abiatali akamupelekela. 8 Daudi akamukota Bambu Chapanga, "Wu, niulandayi msambi uwu wa manjolinjoli vevavatoli vandu vitu? Yati nikuvakamula?" Bambu Chapanga akamuyangula, "Uvalandayi muni yati ukuvakamula na kuvasangula vandu vevatoliwi."

9 Penapo ndi Daudi akawuka pamonga na manjolinjoli miya sita veavili navu. Pevahikili pa kapela kekikemiwa Besoli, vakavakolela vandu vavi vangi vavalekili penapo. 10 Nambu Daudi akayendelela kugalandalila manjolinjoli gala kuni avii na manjolinjoli vaki miya mcheche na vangi miya hivili avalekili pa kapela kenako pamonga na vevavakolili vala muni vatotokili vahotwili lepi kuyomboka kapela kenako. 11 Pevahambayi vakamkolela Mmisili mmonga pa mgunda, na vene vakamupeleka kwa Daudi, vakamupela Mmisili mwenuyo manji ga kunywa na chakulya. 12 Mewawa vakamupela kangi chipandi cha libumunda la tini na hipanyu hivili ya zabibu hiyumu. Peamalili kulya, akavya na makakala, muni mundu mwenuyo alili lepi chindu chochoha kwa magono gadatu muhi na kilu. 13 Daudi akamukota, "Mkulu waku ndi yani? Na uhumalili kwoki?" Mwene akamujovela, "Nene nihumalili ku Misili, namvanda wa Muamaleki. Mkulu wangu anilekili mumbele mu magono gadatu gegapitili muni nene nalwalayi. 14 Tete tahambili kutovana ngondo ku Negebu yaani kusini mwa mulima wa Yuda Kalebu. Na tete tiyochili motu muji wa Sikilagi."

15 Daudi akamukota, "Wu, uhotola kunipeleku mbaka kweuvii msambi wenuwo wa vandu vevavatolili vandu vitu?"

Msongolo mwenuyo akamuyangula, "Ngati ukanilapilayi kwa liina la Bambu Chapanga kuvya yati ukunikoma lepi, wala kunipeleka kwa mkulu wangu, ndi yati nikukupeleka."

16 Msongolo yula akamulongosa Daudi mbaka peuvili msambi wula. Pevahikili penapo vavakolili vamali kudandasika kila pandu, valyayi na kunywega na kuhina ndava vindu vyevanyajili kuhuma ku mlima wa Vafilisiti na ku mlima wa Yuda vyavili vyamahele neju. 17 Daudi akavatova tangia lukela mbaka ligono lelalandili chimihi. Kawaka mugosi mweasigalili mumi nga vala ndu miya mcheche vevakwelili ngamiya na kutila. 18 Daudi awuyisi kila chindu chechanyagiwi na Vaamaleki, pamonga na vadala vaki vavili. 19 Daudi awuyisi vindu vyoha, kawaka chechahovalili vakavya vasongolo amala vagogolo mwana mgosi amala wa chidala, na vindu vyoha vyevanyagili Vaamaleki. 20 Mewa Daudi asangwili na misambi yoha ya ng'ombi na mambelele, na vandu vevahilongosayi vakaulongosa msambi wa mifuya palongolo ya mifuya ya Daudi na vijova, "Vyenivi ndi vindu vyeanyagili Daudi!"

21 Daudi avawuyili vandu vala miya zivili veavalekili pa kapela ka Besoli ndava muni vatotokili kumulanda. Vandu vala pevamuweni Daudi pamonga na vandu vealongosini navu, vakahamba kumpokela. Daudi peahegalili papipi na vandu venavo, akavajambusa. 22 Nambu vandu voha vahakahu na vevanaluhonda vevavili pagati ya vandu vevalandini na Daudi, vakajova, "Tigavana lepi na vandu ava chindu chochoha chetinyagili muni vahambili lepi pamonga na tete. Nambu vihotola kuvatola vadala vavi na vana vavi ndu vahamba."

23 Daudi akavayangula, "Naha lepi mwavalongo vangu. Chabwina lepi kukita chenichi muvindu vyetipewi na Bambu Chapanga. Bambu Chapanga atiyungili bwina, na atikitili tivahotola msambi wula wevabwelili kutizangila. 24 Kawaka mundu mweakugayidakilayi aga gemwijova! Mweahambili kungondo na mweasigalili kuyunga vindu voha yati vipewa cha kuwanangana." 25 Tangia ligono lenilo Daudi akavika muhilu wenuwo pa mulima wa Isilaeli mbaka lelu.

26 Daudi peawuyili ku Sikilagi, akavapelekela vagogo va mlima wa Yuda vevavii vankozi vaki pandu pa vindu vyeanyagili na kujova, "Zenizi ndi njombi zinu kuhuma mu vindu vyetitolili kuhuma kwa vamakoko va Bambu Chapanga." 27 Akavapelekela vevavili ku muji wa Beteli na muji wa Lamoti na ku muji wa kusini yaani Negebu na vevavii ku muji wa Yatili, 28 na vala vevitama ku muji wa Aloeli na muji wa Sifimoti na vevitama ku muji wa Eshitemoa, 29 na vevitama ku muji wa Lakali na vevitama ku muji wa Vayelameeli na vevitama ku muji wa Vakeni, 30 na vala vevitama ku muji wa Holima na vevitama ku muji wa Bolashani na vevitama ku muji wa Ataki, 31 na vala vevitama ku muji wa Hebuloni. Mewawa Daudi avapelakili njombi vagogo vevavii vankozi vaki vevitama ku milima yoha yeayigendalili mwene na vandu vaki.