1 Daudi akatoloka kwenuko ku Gati na kutilalila ku mbugu papipi na muji wa Adulamu. Vahaja vaki na valongo vaki vangi pevayuwini kuvya avili penapo, voha vakahamba kwenuko kumlola. 2 Vandu voha vevang'aikayi amala vevavii na madeni amala vala vevavi na mvinisu mu mtima, vakavya pamonga na Daudi. Vandu voha venavo vavii miya mcheche, na mwene Daudi akavya chilongosi wavi. 3 Kuhuma kwenuko Daudi akahamba mbaka ku Mizipa ku mlima wa Moabu. Akamujovela nkosi wa pa Moabu, "Chondi nikuyupa, dadi wangu na nyina wangu vabwela kutama na veve mbaka penimanyayi Chapanga yati akunikitila kyani." 4 Hinu Daudi akahamba kuvatola vandu va mu nyumba yaki waki vatama na nkosi wa pa Moabu, na vene vakatama penapo lukumbi lwoha Daudi peajihihili ku mbugu. 5 Penapo mlota Gadi akamujovela Daudi, "Kotoka kutama mu mbugu, wuka kanyata hamba ku mulima wa Yuda." Hinu Daudi akawuka akahamba ku dasi yeyikemiwa Heleti. 6 Sauli ayuwini kuvya Daudi na vandu vaki vawonikini. Lukumbi lwenulwo Sauli avii ku Gibea, atamili ku chitumbi pahi ya chikongo chechikemiwa mkwaju, mu mawoko gaki akamwili mugoha kuni vatumisi vaki vamtindili. 7 Sauli akavajovela vatumisi vaki, "Hinu muniyuwanilayi nyenye mwavandu va likabila la Benjamini, wu, mwiholalela uyu Daudi mwana wa Yese yati akumpela kila mmonga winu migunda ya mizabibu na migunda hingi? Amala wu, mwiholalela yati akuvakita mwavoha muvya mwavachilongosi va msambi wa manjolinjoli elufu na vachilongosi va manjolinjoli miya? 8 Wu, chenichi ndi chechikuvakita nyenye mkita mpangu wa kuniwusa mu unkosi? Kawaka hati mmonga winu mweanijovili ndali mwana wangu akitili lilaganu na mwana wa Yese. Mewa kawaka hati mundu mmonga pagati yinu mweiviniswa mu mtima ndava yangu amala kunijovela kuvya mwana wangu ndi mweakumkulukisa mtumisi wangu Daudi aninyemelelayi ndava ya kunikoma, ngati chaikita lelu?" 9 Penapo Doegi wa likabila la Edomu, mweayimai papipi na vachilongosi va manjolinjoli va Sauli, akajova, "Namuweni Daudi mwana wa Yese ibwela ku Nobu kwa mteta Ahimeleki mwana wa Ahitubu. 10 Mteta Ahimeleki akamkota Bambu Chapanga ndava ya Daudi, akampela chakulya, mewa akampela na upanga wa Goliati Mufilisiti yula." 11 Nkosi Sauli akalagisa vandu vakamkemela mteta Ahimeleki mwana wa Ahitubu pamonga na vandu voha va dadi waki vevavili vamteta ku Nobu. Na vena voha vakabwela kwa nkosi Sauli. 12 Sauli akamjovela Ahimeleki, "Hinu uniyuwanila veve wamwana wa Ahitubu." Ahimeleki akamuyangula, "Ena, bambu nikuyuwanila." 13 Sauli akamkota, "Ndava kyani veve pamonga na Daudi mwana wa Yese mukitili mpangu wa kuning'anamukila muni muniwusa mu unkosi? Ndava kyani wamupelili mabumunda pamonga na upanga mewa ukamuyupila kwa Chapanga? Ndava yeniyo, aning'anamukili na akuninyemelela anikoma ngati cheikita lelu." 14 Ahimeleki akamuyangula, "Pagati ya vatumisi vaku Daudi ndi chilongosi mweisadikika kuliku voha. Mewa mwenuyu ndi mkohanu waku veve nkosi, mwene ndi chilongosi mkulu wa manjolinjoli gegakuyunga na itopeswa kuliku voha mu nyumba yaku. 15 Lelu ligono lepi la kutumbula nene kumkota Chapanga ndava yaki. Nkosi kotokayi kuniholalela changaganikiwa nene namtumisi waku pamonga na vandu voha va dadi wangu. Nene nimanyili lepi loloha kuvala mpangu wa kukuwusa mu unkosi." 16 Nambu nkosi Sauli akamjovela, "Chakaka Ahimeleki veve yati ukomiwa pamonga na vandu voha va mu nyumba ya dadi waku." 17 Sauli akavajovela valonda vevayimili pamuhana yaki, "Mung'anamukayi muvakomayi va mteta va Bambu Chapanga muni vavii upandi wa Daudi, vamanyili kuvya atitilili nambu vatijovili lepi." Nambu valonda venavo vanyakwili lepi mawoko gavi kuvakoma vamteta va Bambu Chapanga. 18 Penapo nkosi Sauli akamlagiza Doegi, akajova, "Ng'anamukayi ukavakomayi vamteta." Doegi, wa likabila la Edomu akahamba kuvakoma vamteta voha. Ligono lenilo Doegi avakomili vamteta semanini na muhanu veviwala vizibahu vyamsopi vya chimteta panganga. 19 Mewa akavakoma kwa upanga vandu voha vevatama pa Nobu, muji wa vamteta, pamonga na vagosi na vadala, vana vadebe na vevinyonga na ng'ombi na mapunda na mambelele. 20 Nambu Abiatali, mwana wa Ahimeleki, mjukulu wa Ahitubu, akapokonyoka akatilalila kwa Daudi. 21 Abiatali akamkokosela Daudi chila Sauli cheamulagizi Doegi avakoma vamteta va Bambu Chapanga. 22 Ndi Daudi akamujovela Abiatali, "Ligono lila lenamuwene Doegi mundu wa likabila la Edomu peavili penapala, namanyili kuvya yati akumujovela Sauli. Ndava yeniyo nene ndi mwenivayokisi vandu va dadi waku vakomiwayi. 23 Veve tamayi pamonga na nene kotoka kuyogopa. Mundu mweigana kunikoma nene ndi mweigana kukukoma na veve mewa. Ukatamayi pamonga na nene genago yati gakukolela lepi."