1 Kwavili na mundu mmonga mweakemiwi Elikana wa likabila la Efulaimu, mweatamayi pamuji wa Lama ku mulima wa hitumbi ya Efulaimu. Mwene avili mwana wa Yelohamu, mjukulu wa Elihu, hukulu waki avii Tohu mweahumalili wa lukolo lwa Zufu. 2 Elikana avii na vadala vavili, mmonga akemiwa Hana na yungi akemiwa Penina. Penina avii na vana, nambu Hana avii lepi na vana. 3 Kila mwaka Elikana agendili kuhuma ku Lama kuhamba ku Shilo ndava ya kumufugamila Bambu Chapanga mweana uhotola woha na kumuwusila teta. Kwenuko vana vavili va chigosi va Eli, Hofini na Finehasi venavo ndi vavii vamteta va Bambu Chapanga. 4 Kila lukumbi pelahikili ligono la kuteta, Elikana amupelayi Penina mdala waki lilundu limonga la nyofu na lilundu limonga kwa kila vana vaki va chigosi na va chidala. 5 Nambu Elikana amupelayi Hana malundu gavili muni amuganili neju, na Bambu Chapanga amukitili akotoka kuveleka. 6 Kangi Penina amukitila luhonda muni amuyomesa Hana, muni Bambu Chapanga amukitili akotoka kuvelela vana. 7 Lijambu lenili layendalili kuhumalila chenicho mu kila mwaka. Kila lukumbi Hana peahambayi kunyumba ya Bambu Chapanga, Penina amukitila luhonda Hana mbaka Hana avembayi na abelayi kulya chochoha. 8 Elikana mngana waki Hana, akamukota, "Ndava kyani uvemba? Ndava kyani uganili lepi kulya? Ndava kyani uvii mvinisu mu mtima waku? Wu, nene nambwina lepi kwaku kuliku vana kumi va chigosi?"

9 Ligono limonga pevamalili kulya na kunywa ku Shilo, Hana akayima. Lukumbi lwenulo mteta Eli atamili pa chigoda pamuhana ya chizingiti cha mlyangu wa nyumba ya Bambu Chapanga. 10 Hana kuni avii na mvinisu neju mu mtima, amuyupayi Bambu Chapanga kuni ivemba neju. 11 Hana akavika nazili kwa kujova, "Veve Bambu Chapanga mweuna makakala, unilolayi nene namuhengaji waku! ulolayi mang'aiso gangu na unikumbukayi ukotoka kunikosiwa ngati ukanipelayi mwana wa chigosi, mwana mwenuyo yati nikukuwusila veve Bambu Chapanga avyayi waku magono gaki goha ga wumi waki, katu mayunju ga mumutu waki yati giketwa lepi."

12 Hana peavili iyendelela kumuyupa Bambu Chapanga, Eli akavya akuilolokesa milomo ya Hana. 13 Hana ayupayi cha kumtima, kuni milomo yaki yakinakinayi, nambu chayuwaniki lepi cheijova. Penapo Eli aholalili kuvya Hana agalili. 14 Penapo Eli akamukota Hana, "Wu yati uyendelela kugala mbaka ndali? Lekayi kunywega divayi."

15 Nambu Hana akamuyangula, "Nigalili lepi bambu wangu, nene namudala mwenivii na mvinisu neju mu mtima wangu, nene ninywili lepi divayi wala ugimbi, nambu namujovelayi Bambu Chapanga gegavii mu mtima wangu. 16 Kotoka kuniholalela kuvya nene namudala mbudanu. Nivi mu kuyupa penapa kuni nivii na mvinisu uvaha na ning'ahika."

17 Ndi Eli akamujovela, "Uhambayi kwa uteke na Chapanga wa Isilaeli akupelayi cheumuyupili." 18 Hana akajova, "Nikuyupa nene namuhengaji waku uholalela gabwina kunivala nene." Kangi Hana akawuka akalya chakulya, na avili lepi na mvinisu.

19 Chilau yaki lukela pehee, Elikana na vandu va mu nyumba yaki vakayimuka, vakamuyupa Bambu Chapanga, kangi vakawuya ku nyumba yavi ku Lama. Elikana akagonekana na Hana mdala waki, na Bambu Chapanga akamuyangula Hana chila cheayupayi. 20 Penapo Hana akavya na ndumbu, akamveleka mwana wa chigosi. Na mwene akampela liina Samweli, muni ajovili, "Namuyupili kwa Bambu Chapanga."

21 Lukumbi Elikana pamonga na vandu va mu nyumba yaki pevahambili kuwusa teta za kutinyiswa za kila mwaka kwa Bambu Chapanga na kutimilisa nazili yaki, 22 Hana ahambili lepi, amujovili mgosi waki naha, "Mbaka mwana peileka kunyonga, ndi yati nikumpeleka kwenuko na yati nikumuwusa palongolo ya Bambu Chapanga na atamayi kwenuko magono ga wumi waki woha."

23 Elikana mgangawaki Hana akayangula, "Kitayi cheuwona kuvya chabwina. Lindilayi mbaka peukumulekesayi mwana kunyonga. Na Bambu Chapanga akutangatilayi kutimilisa nazili yaku yeuyivikili." Ndi Hana akasigalila panyumba mbaka peamulekisi mwana waki kunyonga.

24 Pelwahikili lukumbi lwa mwana mwenuyo kulekeswa kunyonga, Hana akamupeleka pamonga na ng'ombi yigosi yeyina miyaka hidatu, na dumula sita za uhembe na kahaku ka chikumba kekamemili divayi. Hana akamuleta mwana mu nyumba ya Bambu Chapanga ku Shilo, na mwana mwenuyo avii akona mdebe. 25 Pevamalili kuyihinja ng'ombi yigosi yila, ndi vakamupeleka mwana kwa mteta Eli. 26 Hana akamujovela Eli, "Chondi bambu wangu, ngati cheutama mumi, nene ndi mdala yula wenayimili penapa papipi yaku kuni iyupa Bambu Chapanga. 27 Namuyupili Bambu Chapanga anipelayi mwana uyu, na mwene anipelili ngati chenamuyupili. 28 Ndava yeniyo, nene nikumpela Bambu Chapanga mwana uyu, magono goha ga wumi waki abaguliwi ndava ya Bambu Chapanga."

Na penapo vakamufugamila Bambu Chapanga.