1 Lukumbi lwenulo Boazi akakwela, akahamba pandu pala pevikonganekela vandu, pa mlyangu uvaha wa muji, akatama. Ndi yula mlongo wa Elimeleki mweaganikiwa avya wa kutumbula kugombola, yula mweamuluwili Boazi, apitili papipi na pandu penapo. Hinu Boazi amkemili akajova, "Mlongo, bwela utama apa." Mundu yula akabwela na kutama pahi. 2 Kangi Boazi avakemili vagogo kumi va muji, akavayupa vene vatamayi penapo. Vakatama. 3 Penapo Boazi akamjovela mlongo waki yula, "Hinu Naomi mweawuyili kuhuma ku Moabu kula, igana kugulisa mgunda wula wewavi wa mlongo witu Elimeleki. 4 Hinu nene niwene mbanga nikumanyisa mambu aga. Hinu ngati ukuugana mgunda wula, ugombolayi palongolo ya vagogo vevatamili apa. Nambu ngati ukuugana lepi ujova, ndava muni fwasi ya kuugombola mgunda wenuwo utumbula veve na nene ndi nilanda."

Mwene akajova, "Nene yati nikuugombola."

5 Boazi akajova, "Chabwina, nambu ukaugombola mgunda kuhuma kwa Naomi, ndi yati mewa ukumgombola Lutu Mmoabu, lipwela wa lukolo lwa yula mweafwili muni mgunda wenuo usigalila mu lukolo lwa mweafwili yula."

6 Mundu yula wa papipi neju akamuyangula, "Ngati naa, nene yati nikuugombola lepi mgunda wenuwo, ndava muni yilolekana kuvya yati nikuuyagisa uhali wangu. Veve uugombolayi wamwene, muni nene nihotola lepi kuugombola."

7 Magono gala ku Izilaeli ngati vandu vigana kugombola amala kugotolana chindu, kwavii na mvelu kwa mundu kuvika ulangisu kwa kuhula chilatu chaki na kumpela yungi. Kwa ulangisu wenuwo Vaizilaeli valangisi kuvya mambu gavikwi bwina.

8 Hinu mundu yula mweaganikiwa kuugombola akamjovela Boazi, "Uugula wamwene." Penapo mlongo mwenuyo akawula chilatu chaki, akampela Boazi. 9 Kangi Boazi akavajovela vagogo na vandu voha vevavi penapo, "Nyenye lelu muyuwini na kulola kuvya nene nigulili kuhuma kwa Naomi vindu vyoha vyevyavili vya Elimeleki na vindu vyoha vya Kilioni na vindu vyoha vya Maloni. 10 Mewa nimtolili Lutu, Mmobu lipwela wa Maloni avya mdala wangu, ndava ya kuyendeleza liina la mweafwili pamonga na vindu vyaki, muni liina la mweafwili likotoka kuyaga pagati ya lukolo lwavi na ukumbuso wa muji waki. Nyenye lelu ndi mwemuyuwana na kulola."

11 Hinu vagogo vala vevavi pa mlyangu uvaha na vandu voha vakayangula, "Ena, tete tiyuwana na kulola. Bambu Chapanga amkita mdala mwenuyu mwaibwela kwaku avya ngati Laheli na Lea, vevaveliki vana vamahele na kuvya mulima wa Izilaeli. Veve uneng'enalayi mu lukolo lwa Efulati, na ulumbiwa ku Betelehemu. 12 Kwa njila ya vana veakukupela Bambu Chapanga kupitila mdala mwenuyu, vandu va munyumba yaku vavya ngati vandu va munyumba ya Pelesi, yula Tamali mweamuvelekili Yuda, mngana waki."

13 Hinu Boazi akamtola Lutu, akavya mdala waki, na vene vakagonekana. Bambu Chapanga akammotisa Lutu, akavya na ndumbu, na akamveleka mwana mgosi. 14 Hinu vadala va muji wenuwo vakamjovela Naomi, "Alumbiwa Bambu Chapanga, yula mweangakuleka lelu changali kuvya na mlongo mweavi wa papipi wa kukuyunga, mwene avya na ulumba uvaha pa Izilaeli. 15 Mwana mwenuyu yati akukukita uvyayi na makakala gavili mu wumi waku na kukuyunga mu ugogolo waku. Ndava nayala waku yula mweakugana na mweavi wabwina neju kwaku kuliku vana va chigosi saba, ndi mweamuveliki." 16 Hinu Naomi amtolili mwana mwenuyo, akampagata na akavya akumlela.

17 Vadala vevavi va papipi yaki vakajova, "Naomi apatili mjukulu mgosi." Mwana mwenuyo vakamkemela liina laki Obedi. Mwene ndi dadi wa Yese, mweavi dadi wa Daudi.

18 Chenichi ndi chiveleku cha Pelesi. Pelesi amveliki Heziloni, 19 Hezilono amveliki Lami, na Lami amveliki Aminadabu, 20 na Aminadabu amveliki Nashoni, na Nashoni amveliki Solomoni, 21 na Solomoniamveliki Boazi, na Boazi amveliki Obedi, 22 na Obedi amveliki Yese na Yese amveliki Daudi.