1 Naomi avii na mlongo waki wa lukolo lwa Elimeleki mngana waki, mweakemiwi Boazi. Mundu mwenuyo avili na vindu vyamahele na mweatopiswi neju ndava ya matendu gaki gabwina. 2 Ligono limonga, Lutu mundu wa kuhuma ku Moabu amjovili Naomi, "Uniyidakila nihamba ku mgunda kunonga masigalilu ga mabenu mumbele ya mbenaji yoyoha mweakuniyidakilila."

Naomi akamjovela, "Ena mkamwana wangu, hambayi."

3 Hinu Lutu akahamba ku mgunda, akavalanda vabenaji kuni inonga mazanga gevagalekelili. Kumbi mgunda weanongayi wavi wa Boazi, wa lukolo lwa Elimeleki, mngana wa Naomi.

4 Bahopo Boazi abwelili kuhuma ku Betelehemu, akavajambusa vabenaji, akajova, "Bambu Chapanga avyai pamonga na nyenye."

Vene vakamuyangula, "Bambu Chapanga akumotisa."

5 Kangi Boazi amkotili yula mweavayimalila vabenaji, "Wu, mdala yula ndi wa yani?"

6 Mweayimalila lihengu yula akamuyangula, "Yula ndi Mmoabu mweawuyili pamonga na Naomi kuhuma ku mulima wa Moabu. 7 Mwene ayupili, ajovili, ‘Chondi uniyidakila nivalanda mumbele vabenaji, ninonga mazanga ga mabenu.’ Tangiya peabwelili lukela, inonga mabenu mu mgunda lukumbi lwoha, na apumulili kwa lukumbi luhupi ndu pa chikonjo."

8 Kangi Boazi akamjovela Lutu, "Niyuwanila msikana wangu. Kotoka kuhamba kunonga mazanga ku mgunda wungi, na ukotoka kuwuka penapa. Ulandana pamonga na vahengaji vangu va chidala. 9 Lola pandu pevibena vasongolo venava, nongayi mumbele ya vahengaji vadala. Nivabesili vasongolo ava vakotoka kukung'aha. Ngati uvii na njota, uhamba kuvihulu na unywai manji gevanegili vasongolo venavo."

10 Penapo Lutu akafugama na kumgundamila Boazi mbaka pahi cha kumtopesa, akamkota, "Ndava kyani niyidakiliwi palongolo yaku, hati ukanikitila ubwina nene mwenivi muyehe?"

11 Nambu Boazi akamuyangula, "Nigayuwini gala goha geumuhengili nayala waku kutumbula peafwili mngana waku. Nimanyili chila cheuvalekili dadi na nyina waku pamonga na mulima waku, ubwelili kutama pamonga na vandu wangavamanya kutumbula kadeni. 12 Bambu Chapanga akupela njombi ndava ya genago geukitili. Nikumuyupa Bambu Chapanga wa Izilaeli mweumuyupili akuyunga kwa makakala gaki, akupela njombi neju."

13 Lutu akamuyangula, "Mkulu wangu, unihengili gabwina, ulongili na nene bwina na kuupolesa mtima wangu, pamonga kuvya nene nammonga lepi wa vahengaji vaku va chidala."

14 Lukumbi lwa kulya chakulya, Boazi akamkamkela Lutu na kumjovela, "Bwela apa ujwiga libumunda mu divayi, ulyayi." Hinu Lutu akatama pamonga na vabenaji, na Boazi akampela mabenu gegakalingwi, akalya na kuyukuta mbaka gangi akagaleka. 15 Lutu peayendelelayi kunonga mazanga, Boazi akavalagiza vahengaji vaki, "Hati ngati akanonga mu malundiku, mkotoka kumng'aha. 16 Nambu muhuta masasa kuhuma mu malundiku, mumleka anonga changali kumbesa."

17 Hinu Lutu ayendalili kunonga mazanga mbaka kimii, na peabulili shayili yila, apatili lidebe limonga na chidogo. 18 Kangi akagega mabenu gala mbaka ku bomani na kumlangisa nayalani waki chila cheanongili. Mewa awusili na kumpela Naomi chakulya chila chechasigalili chealyayi ku mgunda. 19 Hinu nayala waki akamkota, "Lelu unongili kwoki goha aga? Wu wavili ku mgunda wa yani? Amotisiwa yula mweakutangatili."

Penapo Lutu akamuyangula nayala waki kuvya anongili ku mgunda wa mundu mmonga liina laki Boazi.

20 Hinu Naomi akamjovela mkamwana waki, "Bambu Chapanga ammotisa Boazi! Chapanga itimilisa ahadi zaki kwa vevavi mumi na vevafwili." Ndi akayendelela kujova, "Mundu mwenuyo ndi mlongo witu wa papipi, mmonga wa vala veviganikiwa kutigombola."

21 Kangi Lutu mundu wa ku Moabu akajova, "Ena, anijovili nivya pamonga na vahengaji vaki mbaka vamala kubena mabenu goha."

22 Naomi akamjovela Lutu, "Ena mkamwana wangu. Ndi chabwina kuhenga lihengu pamonga na vadala vangi ku mgunda wa Boazi, muni ukahamba ku mgunda wa mundu yungi vihotola kukulemasa." 23 Hinu Lutu akanonga mazanga papipi na vahengaji va chidala va Boazi, mbaka lukumbi lwa kubena nganu na shayili pelwamaliki. Lukumbi lwenulo lwoha atamayi na Naomi, nayalani waki.