1 Penapo kadeni, Vaamula pevatalalilayi pa Izilaeli, yahumalili njala pamulima wenuwo. Mundu mmonga kuhuma ku Betelehemu ya ku Yuda pamonga na mdala waki na vana vavi va chigosi vavili vahambili kutama kwa lukumbi ku mulima wa Moabu ngati vayehe. 2 Mundu mwenuyo liina laki Elimeleki na mdala waki akemiwa Naomi. Maina ga vana vavi va chigosi, mmonga akemiwi Mahaloni na yungi Kilioni. Mundu mwenuyo pamonga na valongo vaki vavi va lukolo lwa Efulati, kuhuma ku muji wa Betelehemu, mu mulima wa Yuda. Vakahamba ku Moabu, na vakatama kwenuko. 3 Elimeleki mngana wa Naomi afwili, Naomi asigalili na vana vaki vavili vagosi vala. 4 Vasongolo venavo vakavagega vasikana Vamoabu. Vaadala venavo mmonga akemiwi Olipa na yungi akemiwa Lutu. Pevatamili kwenuko kwa miyaka kumi, 5 Maloni na Kilioni vafwili. Hinu Naomi asigalili mwene, changali mngana wala vana vaki vagosi vavili vala.

6 Naomi peayuwini kuvya Bambu Chapanga avamotisi vandu vaki kwa kuvapela chakulya, hinu mwene pamonga na vakamwana vaki vajitendekili kuwuka kwenuko, kuwuya ku Izilaeli. 7 Ndi Naomi pamonga na vakamwana vaki vakawuka pandu pala pevatamayi, vakatumbula kuwuya ku mulima wa Yuda. 8 Hinu Naomi akavajovela vakamwana vaki vavili vala, "Muwuya kila mmonga kunyumba ya nyina waki. Bambu Chapanga avahengela gabwina ngati nyenye chemwanihengili gabwina nene pamonga na vangana vinu vala vevafwili. 9 Bambu Chapanga avatangatila, kila mmonga winu apata pandu pa kutama cha uteke kwa mngana waki."

Ndi Naomi akavalaga na kuvakumbatila cha uganu ngati chewavili mvelu wavi. Nambu vene vakatumbuala kuvemba kwa lwami, 10 na kumjovela, "Lepi! Tigana kuhamba pamonga na veve kwa vandu vaku."

11 Nambu Naomi akavajovela vakamwana vaki, "Chondi, muwuya mwavakamwana vangu. Ndava kyani munilandayi nene? Wu, muhololela kuvya nihotola kupata kavili vana vagosi vevakuvagega nyenye? 12 Muwuya kunyumba yinu mwavakamwana vangu, ndava muni nene namgogolo neju, nihotola lepi kugegewa kavili. Hati ngati nganiholalela kuvya nihotola kupata vana, na hati ngati nikagonekana na mgosi kilu yeniyi, na kuveleka vana vagosi, 13 wu, ngamuhotwili kulindila mbaka vakulayi? Wu, ngamuhotwili kujidivalila mukotoka kugegewa na vagosi vangi? Lepi, vakamwana vangu! Nene nina mvinisu neju kuliku nyenye, muni Bambu Chapanga anibunili."

14 Penapo vakavemba kavili kwa lwami. Ndi Olipa akamkumbatila cha uganu nanyala waki, akamlaga na kuwuya kunyumba, nambu Lutu abelili kulekana nayu. 15 Hinu Naomi akamjovela, "Lutu, lola mlumbu waku iwuya kwa vandu vaki na kwa michapanga yaki, hinu na veve uwuya pamonga nayu."

16 Nambu Lutu akamuyangula, "Kotoka kunikulukisa nikuleka amala nikotoka kukulanda. Kwokwoha kwewihamba na nene yati nihamba, na kwewitama veve na nene yati nitama. Vandu vaku, yati vivya vandu vangu, na Chapanga waku, yati ivya Chapanga wangu. 17 Pandu peufwilila veve na nene yati nifwilila penapo, na yati nizikwa bahopo. Bambu Chapanga anibunayi neju, ngati yati nilekana na veve, nambu kwa lifwa ndu."

18 Naomi peamanyili kuvya Lutu ahamwili kuhamba pamonga nayu, akaleka kumkulukisa kavili.

19 Ndi voha vavili vakayendelela na lugendu, na vakahika ku Betelehemu. Pevahikili kwenuko, vandu voha vakakangasa, na vadala vakakotana, "Wu, mwenuyu ndi Naomi?"

20 Naomi akajova, "Mkotoka kunikemela kavili Naomi, munikemela Mala, ndava muni Bambu Chapanga mweavi na makakala goha, akitili wumi wangu uvya na mvinisu neju. 21 Penawukili penapa, navii na vindu vyamahele, nambu hinu Bambu Chapanga aniwuyisi changali chindu. Ndava kyani mukunikemela Naomi kuni Bambu Chapanga anibunili na aning'aili."

22 Chenicho ndi Naomi pamonga na Lutu Mmoabu, mkamwana waki, chevawuyili kuhuma ku Moabu, na kuhika ku Betelehemu lukumbi lwa kubena shayili palwatumbula.