1 Vaisilaeli valapili ku Mizipa kuvya, Kawaka hati mmonga wavi mwakumleka msikana waki agegewa kwa vandu va likabila la Benjamini. 2 Hinu Vaisilaeli vakahamba mbaka ku Beteli kuyupa palongolo ya Chapanga mbaka kimihi. Vakavemba kwa lwami luvaha na lipyanda. 3 Vakajova, "Veve Bambu Chapanga, Chapanga wa Isilaeli, ndava kyani lijambu lenili lihumalili kwa Vaisilaeli? Ndava kyani likabila limonga la Isilaeli liyagili."

4 Chilau yaki vandu vayimwiki lukela pee, vakajenga pandu pakuwusila luteta, vakawusa luteta lwa kutinyisa na teta za uteke. 5 Kangi Vaisilaeli vakakotana, "Pagati ya makabila goha ga Isilaeli livi likabila loloha langabwela kumngonganu wewakitiwi palongolo ya Bambu Chapanga ku Mizipa?" Ndava muni vakitili chilapu kuvya mundu yoyoha mweangahamba palongolo ya Bambu Chapanga ku Mizipa iganikiwa akomewa. 6 Nambu Vaisilaeli vakavawonela lipyana valongo vavi va likabila la Benjamini, vakajova, "Lelu likabila limonga la Isilaeli liyongomiswi. 7 Hinu tikita wuli ndava ya vagosi va likabila la Benjamini vevasigalili muni vapata vadala? Ndava muni tamali kulapa kwa lihina la Bambu Chapanga kuvya yati tikuvapela lepi vasikana vitu vavya vadala vavi."

8 Vakakotana kangi, "Chikundi choki cha likabila la Isilaeli chechangahamba kumngonganu petahambili kumuyupa Bambu Chapanga ku Mizipa?" Ndi vakamanya kuvya kawaka mundu yoyoha kuhuma ku Yabeshi Gileadi mwabwelili kumngonganu wenuwo. 9 Muni pevavalangiwi ku Mizipa, kwavili lepi na mundu yoyoha wa ku Yabeshi Giliadi mweavili pa mngonganu wenuwo. 10 Hinu kumngonganu wenuwo wa Isilaeli vakahamula kuvapeleka manjolinjoli vaki elufu kumi na mbili vevavili vakekesi neju na kuvalagiza, "Muhamba mukavakoma kwa mapanga vandu va ku Yabeshi Gileadi, kila mundu mweitama kwenuko mewa mukavakoma vadala pamonga na vana. 11 Yati mkuvakoma vagosi voha na vadala voha vangavya vakamwali." 12 Hinu ku Yabeshi Gileadi vakavakolela vasikana miya mcheche vevavi vakona vangagona na mgosi, vakavatola na vakavapeleka kukambi ya ku Shilo mu mulima wa Kanaani.

13 Kangi mngonganu woha wa Vaisilaeli vapeliki ujumbi wa uteke kwa vandu va likabila la Benjamini vevatamayi ku litalawu la Limoni. 14 Vandu venavo va likabila la Benjamini vakawuya, vapewili vasikana vala vevahumili ku Yabeshi Giliadi vevangagona na mgosi vevalekiwi changakomiwa. Nambu vasikana venavo vavatosili lepi.

15 Mitima yikavavina Vaisilaeli, muni Bambu Chapanga avikili ligodi pagati ya makabila genago ga Isilaeli. 16 Kangi vachilongosi va mngonganu wula vakakota, "Hinu yati tikita wuli muni kuvapela vadala wenavo vagosi vevasigalili, muni vadala voha va likabila la benjamini vakomiwi? 17 Yiganikiwa vagosi vevasigalili va likabila la Benjamini vapewa vadala muni vayendeleza likabila lavi, na likotoka kuyaga likabila loloha pa Isilaeli. 18 Nambu tihotola lepi kuvagegesa vasikana vitu vavyai vadala vavi, muni tamali kulapa kuvya mundu yoyoha mwakumgegesa msikana waki kwa vagosi va likabila la Benjamini apewa likoto."

19 Kangi vakajova, "Lola kuvii na mselebuko wa Bambu Chapanga weukitiwa kila mwaka ku Shilo uvii papipi." Muji wenuwo wa Shilo uvii ku kasikazini ya Beteli na kusini mwa Lebona, mewa upandi wa kwelihumila lilanga kunjila yikulu yeyihuma ku Beteli kuhamba Shekemu. 20 Hinu vakavalagiza vagosi vala likabila la Benjamini vevangapata vadala, "Muhamba mukajihiha mumigunda ya mizabibu. 21 Muvya mihu, vasikana va Shilo pevihuma kuvala kukina lukumbi lwa mselebuko, muhuma mumizabibu na kila mundu amtola kwa makakala msikana mmonga avya mdala waki. Kangi muwuya kumulima wa Benjamini. 22 Vadadi vavi amala vahaja vavi vakabwela kutivembenekela yati tikuvajovela, ‘Tete tikuvayupa muvawonela lipyana vandu va likabila la Benjamini na muvalekela vavatola vasikana venavo, muni tahotwili lepi kuvapela vadala kungondo ya Yabeshi Gileadi. Mewawa nyenye mwavagegisi lepi vasikana venavo kwitu, ndi yati muhamuliwa lepi.’ "

23 Vala vagosi va likabila la Benjamini vakakita chenicho, kila mmonga ajihagulili msikana pagati ya vasikana vevahumili kukina kuvala na kumtola avya mdala waki. Kangi vakawuya ku mulila wevapewili, vakajenga miji yavi kangi na kutama mwenumo. 24 Lukumbi lulolo Vaisilaeli vangi vakawuka, kila mundu akawuya kulikabila laki na kwa valongo vaki. Kila mundu awuyili kupandu paki peapewili.

25 Magono genago Vaisilaeli vavili lepi na nkosi. Kila mundu akitili ngati chealolili mwene kuvya chabwina.