1 Paafwili Ehudi, Vaisilaeli vahengili kangi uhakau palongolo ya Bambu Chapanga. 2 Bambu Chapanga avalekili vatovewa na nkosi Yabini wa Kanaani, mwaatalalilayi ku Hazoli. Mkulu wa manjolinjoli gaki avili Sisela, mweatamayi ku Halosheti mulima wa vandu vevangavya Vaisilaeli. 3 Nkosi Yabini avili na mutuka za lyuma miya tisa za kuhutwa na falasi za kutovanela ngondo. Avang'ahisi neju Vaisilaeli mumiyaka ishilini, ndi Vaisilaeli vakamvembela Bambu Chapanga avatangatila.

4 Lukumbi lwenulo kwavii na mlota wa Chapanga mdala mwakemiwa Debola wavili mdala wa Lapidoti. Mewa avi muhamula wa Vaisilaeli. 5 Debola avili na uyovalela wa kutama pahi ya mtende wewavili pagati ya muji wa Lama na muji wa Beseli ku mulima wa hitumbi ya Efulaimu. Vandu va ku Isilaeli vamuhambili muni avahamula matakilu gavi. 6 Ligono limonga Debola amkemili Balaki mwana wa Abinoamu wa muji wa Kedeshi ku mulima wa Nafutali. Pabwelili amjovili, "Bambu Chapanga wa Vaisilaeli, akulagiza naha, ‘Uhamba ukavayola manjolinjoli vaku elufu kumi kuhuma makabila ga Nafutali na Zabuluni uvalongosa mbaka ku chitumbi cha Taboli. 7 Nene yati nikumkulukisa Sisela, mkulu wa manjolinjoli wa Yabini, abwela na manjolinjoli na mutuka zaki kutovana na veve kumfuleni wa Kishoni, na kukukita umuhotola.’"

8 Balaki akamyangula Debola, "Ngati uhamba pamonga na nene, na nene yati nihamba. Nambu ngati uhamba lepi na nene, nene yati nihamba lepi."

9 Debola akamyangula, "Chabwina, yati nihamba pamonga na veve, nambu yati wipata lepi utopesa wowoha wa uhotola, muni Bambu Chapanga yati akumleka Sisela atoviwa na mdala, ndi Debola akalongosana na Balaki vakahamba ku Kedeshi." 10 Balaki akavakemela manjolinjoli va makabila ga Nafutali na Zabuluni ku Kedeshi kwenuko, vandu alufu kumi vakamlanda. Debola akahamba pamonga nayu.

11 Lukumbi lwenulo, Hebeli mundu wa likabila la Vakemi ajivikili patali na Vakemi vayaki va uveleku wa Hobabu, mkohanu wa Musa. Ajengili lindanda laki kutali kwenuko ku mkongo uvaha weuvi ku muji wa Zaananimu, papipi na Kedeshi.

12 Sisela peayuwini kuvya Balaki mwana wa Abinoamu ahambili kuchitumbi Taboli, 13 Sisela akatola manjolinjoli pamonga na mutuka zaki miya tisa za ngondo zezihutwa na falasi, akawuka ku Halosheti Hagoni, akahamba kumfuleni Kishoni.

14 Debola akamjovela Balaki, "Hamba! Lelu ndi Bambu Chapanga yati akutangatila umuhotola Sisela." Wu, Bambu Chapanga akulongolili lepi kulongolo yaku! Hinu, Balaki akahelela kuhuma kuchitumbi Taboli kuni akuvalongosa manjolinjoli elufu kumi vamlandili. 15 Balaki peavazangili kwa upanga, ndi Bambu Chapanga akamkita Sisela pamonga na manjolinjoli na mutuka zaki za kuhutwa na falasi vakajikolela vavi mumang'aiso neju. Sisela akahuluka mumutuka yaki ya ngondo yeyihutwa na falasi na kutila kwa magendelu. 16 Balaki na manjolinjoli vaki avalandalili manjolinjoli va Sisela na mutuka zavi mbaka Halosheti yeyivi ku mulima wa vandu vangavya Vasilaeli na kuvakoma voha kwa upanga, asigalili lepi hati linjolinjoli mmonga.

17 Nambu Sisela ajumbalili mbaka kulindanda la Yaeli mwaavi mdala wa Hebeli wa likabila la Vakeni. Akitili chenicho muni Yabini nkosi wa Hazoli atamili cha uteke na vandu va lukolo lwa Hebeli mwahumili ku likabila la Keni. 18 Yaeli akahamba kumpokela Sisela na kumjovela, "Mkulu wangu yingila mugati kotoka kuyogopa." Ndi Akayingila mulindanda la Yaeli na Yaeli akumgubika Sisela kwa libulangeti. 19 Sisela akamjovela Yaeli, "Pepayi, niyupa manji ninywe, muni nina njoto." Hinu akadindula kahaku ka chikumba wewavili na mavele, akampela anywai, na kumgubika kangi. 20 Sisela akamjovela, "Yima pamlyangu wa lindanda mundu yoyoha akabwela kukota ngati pavi mundu yoyoha penapa, bela mjovela kawaka mundu."

21 Ndi Yaeli mdala Hebeli akatola chibiki cha lindanda na nyundo, akamuhambila nyemunyemu kuni Sisela agonili lugono muni atotokili na lugendu. Yaeli akakongomela chibiki chenicho pachiwungi ndi chayingili mbaka paludaka, bahopo Sisela akafwa. 22 Hinu Balaki pamlandayi Sisela, Yaeli ahumili kuvala na kumpokela akamjovela, "Bwela na nene yati nikulasa mundu mwaukumlonda." Balaki akayingila mulindanda la Yaeli na kumkolela Sisela pahi, afwili, na chibiki cha lindanda pachiwungi chaki.

23 Hinu, ligono lenilo Chapanga avakitili Vaisilaeli vamuhotola nkosi Yabini wa Kanaani. 24 Manjolinjoli va Vaisilaeli vayendalili kuvya na makakala neju ya manjolinjoli ga Yabini nkosi wa Kaanani, pamwisu manjolinjoli ga Isilaeli vavakomamikisi njwe Yabini na manjolinjoli gaki.