1 Magono genago Vaisilaeli vavi lepi na nkosi. Hinu likabila la Dani lalondayi pandu pavi pene pa kutama penapo, muni mbaka lukumbi lwenulo lavii lakona na kunukuliwa pandu paki pagati ya makabila ga Isilaeli. 2 Hinu vandu va likabila la Dani vavatumili vandu mhanu vanamakakala kuhuma ku Sola na ku Eshitaoli vakavalagiza vahamba vaung'omesa mulima. Hinu vandu venavo vakahika pamulima wa vitumbi vya Efulaimu, vakatama ku nyumba ya Mika. 3 Pevavili ku nyumba ya Mika, vamanyili chailongela msongolo Mlawi yula, ndi vakayingila mugati na kumkota, "Ndi yani mweakuletili kuni? Penapa wikita kyani?"

4 Mwene akavayangula, "Niyidakilini na Mika mweanilipa nimuhengela lihengu la kuvya mteta namteta waki."

5 Vakamjovela, "Pepayi, utikotekesela kwa Bambu Chapanga ngati mu lugendu lwitu yati tipata chatigana."

6 Mteta yula akavayangula, "Mhamba wa uteke. Bambu Chapanga aluyidakili lugendu lwinu."

7 Hinu vandu mhanu vala vakawuka na kuhamba ku Laishi. Vavawene vandu vevatamili kwenuko, chevatamili kwa uteke ngati vandu va ku Sidoni. Vandu venavo vakomana lepi na mundu na vavi na kila chindu pamulima wavi. Mewa vavii kutali na vandu va ku Sidoni na vajibagwili na vandu vangi. 8 Vamang'omesi vala vawuyili kwa valongo vavi ku Sola na ku Eshitaoli, valongo vavi vakavakota, "Mambu mugawene wuli kwenuko?" 9 Vene vakavayangula, "Muyima na tihamba tikauzangila mulima wenuo. Tiuweni mulima wenuo una ludaka lwa bwina kwa kugaba, wu, yati mtama penapa changali kukita chindu? Mkita kanyata kuhamba kuutola mulima wenuo! 10 Pamuhika kwenuko yati mukuvakolela vandu vangali wogoyu wowoha. Mulima wenuwo uvaha na uvi na kila chindu chetigana kwa wumi witu, na Chapanga atipeli mulima wenuwo uvya witu."

11 Hinu, vandu miya sita kuhuma likabila la Dani vavi na silaha zavi za ngondo vakawuka kuhuma Sola na Eshitaoli kuhamba kutova ngondo. 12 Pavavili mulugendu vakavika kambi ku Kiliati Yealimu pamulima wa Yuda. Ndava yeniyo pandu penapo upandi wa kwalitipama lilanga pikemiwa Mahane Dani mbaka lelu. 13 Kuhuma kwenuko vakahamba mulima wa hitumbi ya Efulaimu, vakahika kunyumba ya Mika.

14 Vandu vala vevakiti umang'omesi ku mulima wa Laishi vakavajovela valongo vavi, "Wu, mmanyili kuvya munyumba zenizi kuvi na chizibau na vimong'omong'o vya michapanga pamonga na chimong'omong'o cha kuhongola na kugubikwa kwa madini ga feza? Hinu muholalela chakukita." 15 Hinu vamang'omesi vala vakahamba kunyumba ya Mika, vakayingila na kumjambusa msongolo iyendelela wuli. 16 Lukumbi lwenulo manjolinjoli vala miya sita va likabila la Dani, pevavi na vindu vyavi vya ngondo, vayimili palimlyangu. 17 Manjolinjoli muhanu vala vevahambili kukita umang'omesi pamulima vayingili mugati, vatolili chimong'omong'o chachigubikwi na madini ga feza, chizibau na vimong'omong'o vingi vya michapanga. Lukumbi lwenulo mteta yula ayimili pamlyangu pamonga na vandu miya sita vevakamwili vindu vya ngondo.

18 Peavaweni vandu vala vayingi munyumba ya Mika vakatola chimong'omong'o cha kuhongola na chechigubikwi kwa madini ga feza na kahaku ka panganga, akavakota, "Mkita kyani?"

19 Vakamjovela, "Guna, kotoka kujova chindu chochoha, tiwuka tavoha uvya mteta witu na dadi witu. Wu, chabwina veve kuvya mteta wa mundu mmonga amala kuvya mteta wa likabila limonga la Isilaeli?" 20 Mteta yula ahekalili neju akatola kizibau na chimong'omong'o cha kuhongola na kugubikwa na madini ga feza na akalandana nawu.

21 Hinu, vakatumbula lugendu kuni valongolisi vana vavi na mifuya na vindu vyavi vyoha. 22 Pavahiki kutali na nyumba yila, Mika akavakemela vandu vevatamayi papipi na mwene, vakavalanda vandu va likabila la Dani vakavakolela, 23 vakalongela kwa lwami luvaha, na vandu va likabila la Dani vakang'anamuka, na vakamkota Mika, "Ugana kyani mbaka utilandili pamonga na msambi wenuwo woha?"

24 Mika akavayangula, "Nyenye mtolili michapanga yangu yanajitengenezili, na mumtolili na mteta wangu muwukili nayu, munilekili changali chindu. Muhotola wuli kunikota nigana kyani?"

25 Vandu va likabila la Dani vakamyangula, "Kotoka kujova na tete, ngati lepi vavi vandu vangi pagati yitu vana ligoga vihotola kukuzangila, na veve yati uyagisa wumi waku na wa valongo vaku." 26 Mika pealolili kuvya vandu vala vana makakala kuliku mwene, akawuya kunyumba, na vala vandu va likabila la Dani vakayendelela na lugendu.

27 Vandu va likabila la Dani vala vakatola vindu vyevyatenganizwi na Mika, vakamtola na mteta mwamuhengela. Vakahamba kuvazangila vandu va kumuji Laishi vevatamayi kwa uteke, vakavakoma vandu va muji wenuwo kwa mapanga gavi na kuutinyisa muji wenuwo woha. 28 Vandu va muji wenuwo vavi lepi na mundu wa kuvasangula muni vavi kutali na muji wa Sidoni, na vayelewana lepi na vandu vangi. Muji wenuwo wavili mulikemba la Beti Lehobu. Vandu va likabila la Dani vaujengili kangi muji wenuwo na kutama mwenumo. 29 Vang'anamwisi lihina la muji wenuwo, vakaukemela Dani lihina la gogo wavi mweavili mmonga wa vana va Yakobo. Pakutumbula apo muji wenuwo wakemiwi Laishi. 30 Vandu va likabila la Dani vayimamisi chimong'omong'omo na kuchifugamila, na Yonatani mwana wa Gelishomu, mjukulu wa Musa, avili mteta wavi. Vavelekwa vaki mewa vavili vamteta va likabila la Dani mbaka vandu va mulima wenuwo pevapelikwi kuluhamilu. 31 Lukumbi lwoha Lindanda la Chapanga lelavili ku Shilo, vandu va likabila la Dani vayendalili kuchifugamili chimong'omong'omo chechahongoliwi na Mika.