1 Peafwili Abimeleki, Tola mwana wa Pau, mjukulu wa Dodo, wa likabila la Isakali, akahumila kuvagombola Vaisilaeli. Tola atamayi ku Shamili ku mulima wa hitumbi ya Efulaimu. 2 Avii muhamula wa Vaisilaeli kwa miyaka ishilini na yidatu, ndi akafwa na kuzikiwa ku Shamili.

3 Pafwili Tola akagelekela Yaili mundu wa ku Gileadi akavya muhamula wa Vaisilaeli kwa miyaka ishilini na yivili. 4 Yaili avili na vana selasini vevakwelili punda selasini, mewawa vavi na miji selasini pamulima wa Gileadi, ndi mbaka lelu hijiji vyenivyo vikemiwa Hawoti Yaili, mana yaki hijiji ya Yaili. 5 Yaili afwili na kuzikwa ku Kamoni.

6 Vaisilaeli vamuhokili kangi Bambu Chapanga vakavafugamila michapanga ya Baali na michapanga Maashitaloti, na michapanga ya vandu va ku Shamu na michapanga ya vandu va ku Sidoni na michapanga vandu va Amoni na mishapanga ya vandu va ku Filisiti. Vamulekili Bambu Chapanga vamufugamili lepi kangi. 7 Bambu Chapanga akavayomela Vaisilaeli, na kuvakita Vafilisiti na Vaamoni vavahotola Vaisilaeli. 8 Mumiyaka kumi na nane Vaisilaeli vang'ahiswi na Vafilisiti na Vaamoni kwevatamayi kwenuko ku Gileadi kumulima Vaamoli kwelihumila lilanga mwa mfuleni Yolodani. 9 Vaamoni mewa vayombwiki mfuleni Yoludani kutovana na makabila ga Yuda na makabila ga Benjamini na makabila ga Efulaimu. Hinu vandu va Isilaeli vang'aiswi neju.

10 Kangi Vaisilaeli vakamvembela Bambu Chapanga na kujova, "Tete tikubudili veve Chapanga, muni tikulekili veve Chapanga witu, na tikuyifugamila michapanga ya Baali."

11 Mwene Bambu Chapanga akavajovela, "Wu, nene navasangwili lepi kuhuma kwa Vamisili na Vaamoni na Vaamoli na Vafilisiti? 12 Mewawa Vasidoni na Vaamaleki na Vamidiani vene vavang'aisi, nyenye mwanivembili nene. wu, navasangwili lepi kuhuma muutalalila wavi? 13 Nambu nyenye munilekili nene na kuyifugamila michapanga yingi. ndava yeniyo yati nikuvasangula lepi kavili. 14 Hinu muhambayi mukayivembela michapanga yila yemuyihagwili. Yeniyo ndi yivasangula nyenye pamang'aiso ginu."

15 Nambu Vaisilaeli vakamjovela Bambu Chapanga, "Tikubudili veve Chapanga. Utihengela chewigana, nambu tikuyupa utisangula lelu." 16 Kangi vakayitagila kutali michapanga yingi yeyavi pagati yavi vakamfugamila kavili Bambu Chapanga. Mwene Bambu Chapanga aganili lepi kuyendelela kulola Vaizilaeli ving'aiswa.

17 Ndi Vaamoni vakakonganeka pamonga na kuvika kambi yavi ku Gileadi. Vaisilaeli na vene vakakonganeka pamonga na kuvika kambi yavi ku Misipa. 18 Kwenuko Vaisilaeli na vachilongosi wavi vakakotana, "Hinu ndi yani mweitumbula kutovana ngondo na Vaamoni? Mundu yeyoha mweikita chenicho ndi mweivya chilongosi va vandu voha vevitama ku Gileadi."