1 Manjolinjoli va likabila la Efulaimu vakonganiki kujitendelekela ndava ya ngondo, vakayomboka mfuleni Yolodani vakahika ku Zafoni. Kangi vakamjovela Yefuta, "Ndava kyani watikemili lepi tihamba pamonga kutovana na Vaamoni? Hinu yati tiyocha nyumba yaku kuni veve uvii mugati yaki!"

2 Yefuta akavajovela, "Nene pamonga na vandu vangu tavii na umakoko uvaha na Vaamoni. Navayupili munitangatila nambu mwabwelili lepi kunisangula. 3 Panalolili kuvya mbwelili lepi kunisangula, nayokisi wumi wangu, nahambili kukomana na Vaamoni na Bambu Chapanga anitangatili nikavatova. Ndava kyani hinu mbwelili kutovana na nene?" 4 Penapo Yefuta akavakemela vandu voha va ku Gileadi pamonga, vakahamba kutovana na vandu va Efulaimu. Vandu venavo va Geleadi vavahotwili vandu va Efulaimu. Venavo Vaefulaimu ndi vevavajovayi, "Nyenye va Gileadi ndi vatolo vemjumbili kuhuma likabila la Efulaimu na Manase." 5 Kangi vandu va Geliadi vakanyaga viyombokelu vya mfuleni Yolodani muni mundu yoyoha kuhuma mulikabila la Geliadi akotoka kuyomboka. Mundu yoyoha mweaganayi kuyomboka ndava ya kutila ngondo vandu va Geliadi vakamukota, "Wu, veve uhuma mulikabila la Efulaimu?" Na ngati akayangula, "Pehe," 6 Vamjovili, hinu jova linenu lenili, "Shiboleti" Nambu mwene akajova, "Siboleti," Ndava muni va Efulaimu vahotola lepi kuluwula bwina linenu lenilo. Penapo vakumkamula na kumkoma kwenuko kuviyombokelu vya mfuleni Yolodani. Vandu alufu alubaini na vavili va Efulaimu vafwili lukumbi lwelulo.

7 Yefuta avili muhamula wa Vaisilaeli kwa miyaka sita. Kangi Yefuta mundu kuhuma ku Geleadi akafwa, vamzikili ku Geleadi, pa muji waki.

8 Peafwili Yefuta, Ibizani mundu kuhuma ku Betelehemu akavya chilongosi na muhamula wa Isilaeli. 9 Mwene avili na vana vagosi selasini na vasikana selasini. Vasikana vaki selasini avagegisi kulukolo lungi, mewawa na vasongolo vaki vagegili vasikana selasini kuhuma lukolo lungi. Ibizani avili muhamula wa Isilaeli kwa miyaka saba. 10 Kangi Ibizani afwili, vakamzika ku muji wa Betelehemu.

11 Mewawa peafwili Ibizani, Eloni wa likabila la Zebuluni avili muhamula wa Isilaeli kwa miyaka kumi. 12 Kangi Eloni akafwa, vakamzika ku muji wa Aiyaloni kumulima wa likabila la Zebuluni.

13 Peafwili Eloni, Abudoni mwana wa Hileli, kuhuma ku muji wa Pilatoni akavya muhamula wa Isilaeli. 14 Abudoni avili na vana vagosi alubaini na vajukulu selasini vevakwelili punda sabini. Na mwene avili muhamula wa Isilaeli kwa miyaka nane. 15 Kangi Abudoni afwili, vamzikili ku muji wa Pilatoni pamulima wa likabila la Efulaimu, pa mulima wa hitumbi ya Vaamaleki.