1 Ligono limonga Samsoni ahelili kuhamba ku muji weukemiwa Timna, kwenuko amuwene mdala mmonga Mfilisiti. 2 Peawuyili kunyumba akavajovela mau na dadi waki, "Nimuweni mdala mmonga mfilisiti ku Timna. Hinu munigegesa mdala mwenuyo."

3 Nambu dadi na nyina waki vakamkota, "Wu, kawaka msikana yoyoha pagati ya valongo vaku amala pagati ya vandu vitu hati uhamba kugega kwa vafilisiti vangadumula jandu?" Nambu Samsoni akamjovela dadi waki, "Nigegesa mdala mwenuyo, muni akuniganisa neju."

4 Dadi na nyina waki vamanyili lepi kuvya mambu genagu gakitiwi na Bambu mwene ndava ya kuvatova Vafilisiti. Lukumbi lwenulo, Vafilisiti vavatalalila Vaisilaeli.

5 Samsoni na dadi na nyina waki vawukili kuhamba ku Timna. Pavahikili kumigunda ya mizabibu uko ku Timna, chigafula ukahumalila mpapakasi ukali wa lihimba na ukambulumila Samsoni. 6 Bahopo, mpungu wa Bambu Chapanga wamuyingili Samsoni kwa makakala, akalikamula milomo na kulikayulana lihimba lila kwa mawoko gaki ngati mundu chaikayulana mene. Nambu Samsoni avajovili lepi dadi amala nyina waki lijambu leakitili.

7 Samsoni pahikili ku Timna, akahamba kulongela na msikana yula mweamganisi neju Samsoni. 8 Magono gadebe pagapitili akawuya kangi ku Timna kuhamba kumgega msikana yula. Peavili mnjila akaveduka pamuhana ya njila kulola mtuhi wa lihimba wula, kumbi kwavili na njuchi na wuchi mumtuhi wula. 9 Ndi, akabakula wuchi wula kwa mawoko gaki akavya ilya kuni iyendelela na lugendu lwaki. Pawuyili kwa dadi na nyina waki akavapela wuchi na vene vakalya. Nambu avajovili lepi kuvya wuchi wula wahumi mugati ya mtuhi wa lihimba.

10 Dadi waki Samsoni akahamba kunyumba ya msikana mwenuyo kuvika bwina mambu ga kugegana, na Samsoni akakita mselebuko kwenuko ngati chavakitayi vasongolo. 11 Vafilisiti pavamuweni Samsoni vamuletili vasongolo selasini vatama nayu pamuselebuko wenuwo. 12 Samsoni akavajovela, "Yati nikita luhumu. Ngati mukahotola kudandawula luhumu lwenulo mulukumbi lwa magono saba ga mselebuko, yati nikuvapela magwanda selasini gamsopi neju na magwanda gangi selasini." 13 Nambu ngati muhotwili lepi kudandawula, nyenye yati mukunipela magwanda selasini gamsopi neju na magwanda gangi selasini.

"Vakamjovela, Tijovela luhumu lwenulo tiyuwane."

14 Samsoni akavajovela,

"Mugati ya mweilya kwahumili chakulya,

mgati ya mweanamakakala chahumili chindu chechinoga."

"Mumagono gadatu vasongolo vala vahotwili lepi kudandawula luhumu lula."

15 Hinu ligono la mcheche vakamjovela mdala wa Samsoni, "Myupa mngana waku atidandaulila mana ya luhumu lwenulo, ngati lepi yati tikuyocha motu veve na pamonga nyumba ya dadi waku. Wu mwatigongolili penapa ndava ya kutinyaga vindu vitu?"

16 Mdala wa Samsoni amuhambili Samsoni kuni ivemba, akamjovela, "Chakaka unigani lepi! Uvapelili luhumu vandu vangu nambu unidandaulili lepi!" Samsoni akamyangula, "yuwanila hati dadi na nyina wangu navajovili lepi, hinu nihotola wuli kukujovela veve?"

17 Nambu ayendelili kuvemba mumagono goha saba ga mselebuko. Muligono la saba Samsoni amjovili mdala waki mana ya luhumu lula muni amung'ahayi. Mdala waki akahamba kanyata kuvajovela vandu vaki mana ya luhumu lwenulo. 18 Ligono lenilo la saba, kwakona lilanga kutipama vakamjovela Samsoni,

"Chindu choki chechinoga kuliku wuchi?

Ndi yani mwana makakala kuliku lihimba?"

Samsoni akavayangula,

"Ngati ngamuleke kumkulukisa mdala wangu anikota,

ngamumanyi lepi udandaulo wa luhumu lwangu."

19 Penapo mpungu wa Bambu wamukitili Samsoni avya na makakala, ndi akahamba ku Ashikeloni, akavakoma vandu selasini, kangi akatola magwanda gavi ga mselebuko akavapela vala vavahotwili luhumu lula. Kangi akawuya kunyumba ya dadi na nyina waki kuni ayomi neju. 20 Hinu, mdala wa Samsoni agotoliwi kwa msongolo mmonga mweavii mkozi wa Samsani pagati ya vala selasini vevabwelili kutama nayu.