1 Vaisilaeli vahengili kangi uhakau palongolo ya Bambu Chapanga, na mwene akavaleka vatalaliwa na Vafilisiti kwa miyaka alubaini.

2 Kwavili na mundu mmonga ku Sola uko, wa likabila la Dani, lihina laki Manoa. Na mdala waki avili ngaveleka. 3 Ligono limonga, mtumu wa Bambu Chapanga amuhumalili mdala mwenuyo akamjovela, "Veve ndi ngaveleka, nambu yati wipata ndumbu na kumveleka mwana wa chigosi. 4 Hinu ujiyangalila, kotoka kunywa divayi amala ugimbi amala kotoka kulya chakulya chochoha chechikukita ukotoka kuyidikiliwa na Chapanga, 5 muni yati uvya na ndumbu na kumveleka mwana mgosi. Mayunju ga mwana mwenuyo gakotoka kuketwa, muni mwana mwenuyo avaguliwi ndava ya Chapanga, muni yati ivya ndava ya lihengu la Chapanga kuhumila kuvelekewa kwaki. Na mwene yati itumbula kuvasangula Vaisilaeli kuhuma kwa Vafilisiti."

6 Mdala mwenuyo akahamba kumjovela mngana waki, "Mundu wa Chapanga anibwelili ndi pamihu paki pavili ngati mtumu wa kunani kwa Chapanga. Nayogwipi neju, namkoti lepi kwahumili mewa namkoti lepi lihina laki. 7 Nambu anijovili kuvya yati nivya na ndumbu na kuveleka mwana mgosi. Anilagizi nikotoka kunywa divayi amala ugimbi mewa nikotoka kulya chochoha chechikunikita nikoto kuyidakiliwa na Chapanga, muni mwana mwenuyo avya mweavaguliwi ndava ya Chapanga na awusiwi ndava ya lihengu la Chapanga kuhumila kuvelekewa mbaka peifwa."

8 Ndi Manoa akamyupa Bambu Chapanga akajova, "Veve Bambu Chapanga, pepayi, nikuyupa umtuma kangi mundu waku yula mwawamtumili muni atiwula gala getiganikiwa kumhengela mwana mwenuyo peivelekewa."

9 Bambu Chapanga ayuwini kuyupa kwa Manoa, na mtumu wa kunani kwa Chapanga yula amuhambili kangi mdala yula pavili kumgunda. Nambu mngana waki avi lepi pamonga nayu. 10 Ndi mdala yula akajumba kanyata, kumjovela mngana waki, "Lola! Mundu yula mwanihumalili ligono lila anihumali kangi."

11 Manoa akalandana na mdala waki mbaka kwa mundu yula, akamkota, "Wu, veve ndi mundu yula mwawalongili na mdala mwenuyu?" Mundu yula akamyangula, "Ena, ndi nene."

12 Kangi Manoa akamkota, "Lukumbi malovi gaku pegitimila ndi mambu goki getiganikiwa kugalanda ndava ya mwana mwenuyo? Yati ihenga lihengu loki?"

13 Mtumu wa kunani wa Bambu akamjovela Manoa, "Mdala waku iganikiwa kukamula goha genimujovili. 14 Akotoka kulya chochoha chechihengiwi kuhuma muzabibu, mewa akotoka kunywa divayi amala ugimbi amala kulya chochoha changayidikiliwa palongolo ya Chapanga. Agalanda goha genimlagizi."

15 Manoa akamjovela mtumu mwenuyo, "Pepayi tama chidogo tikuhinjila mene ulye." 16 Mtumu wa kunani kwa Chapanga akamjovela Manoa, "Hati ngati mkaning'ang'anisa nitama chidogo yati nilya lepi chakulya chinu. Nambu ukagana, tendekeha luteta lwa kutinyisa, umuwusila Bambu." Manoa amanyili lepi kuvya mwenuyo ndi mtumu wa Bambu.

17 Hinu, Manoa akamjovela mtumu wa Bambu yula, "Tijovela lihina laku muni gala gewatijovili pegitimila tikutopesa."

18 Mtumu wa kunani kwa Chapanga akamyangula, "Ndava kyani ugana kumanya lihina langu? Lihina langu likangasa."

19 Penapo Manoa akatendekeha mwana mene na luteta lwa uhembe akavika panani ya litalahu akumuwusila Bambu Chapanga. Na mtumu wa kunani kwa Chapanga yula akakita mambu ga kukangasa palongolo ya Manoa na mdala waki. 20 Hinu, Manoa na mdala waki pavavili vilola milumuli ya motu chayikwela kunani kuhuma pandu pakuwusila luteta, vamuweni mtumu mwenuyo wa Bambu Chapanga mumilumuli yila ikwela kuhamba kunani, ndi Manoa na mdala waki vakamfugamila. 21 Manoa akamanya kuvya mwenuyo avii mtumu wa kunani kwa Chapanga. Mtumu mwenuyo wa Bambu amuhumalili lepi kangi Manoa amala mdala waki.

22 Hinu manoa akmjovela mdala waki, "Chakaka yati tifwa, muni timuweni Chapanga!"

23 Nambu mdala waki akamyangula, "Ngati Bambu Chapanga ngaigana kutikoma ngayidakili lepi luteta lwitu lwa kutinyisa na luteta lwa uhembe, na ngatilangisi lepi mambu ago mewa na kutipela malagizu."

24 Hinu, mdala wa Manoa aveliki mwana mgosi, na mwene akampela lihina Samsoni. Mwana mwenuyo akakula na Bambu Chapanga ammotisi. 25 Mpungu wa Bambu ukatumbula kuhenga lihengu mugati yaki peavili ku Mahane Dani, pagati ya ku Sola na ku Eshitaoli.