1 Lukumbi lwenulo kwavili lepi na nkosi wa ku Isilaeli, kwavili na Mlawi mwatamayi ngati myehe kutali ku mulima wa hitumbi ya Efulaimu. Mundu mwenuyo amtolili mdala kuhuma ku Betelehemu ya Yuda. 2 Nambu avala amyomili Mlawi mwenuyo, akamleka na kuhamba kunyumba ya dadi waki ku Betelehemu, akatama kwa lukumbi lwa miyehi mcheche. 3 Ligono limonga mngana waki ahambili kumlanda, aganayi kumkulukisa muni amuwuyisa kunyumba yaki. Hinu mgosi mwenuyo akahamba pamonga na mtumisi waki na punda zivili. Ndi mdala yula akampeleka mgati kwa dadi waki, na mkohanu waki peamuweni akampokela kwa sangaluka. 4 Mkohanu waki amyupili asigalila, akatama nayu kwa magono gadatu, Mlawi mwenuyo na mtumisi waki vakalya na kunywa na kugona kwenuko. 5 Ligono la mcheche, vayimwiki lukela pee, vajitendekili kuwuka, nambu mkohanu waki akamjovela, "Mlya hoti chakulya chidogo muni muvya na makakala ndi muwukayi."

6 Hinu vavili venavo vatamili, vakalya na kunywa pamonga. Kangi mkohanu waki akamjovela Mlawi, "Pepayi ugona penapa kilu iyi na kusangaluka."

7 Mundu yula payimili na kugana kuwuka, mkohanu waki akakangamalisa asigalila, na mwene akagona mala ya pili kwenuko. 8 Ligono la muhanu ayimwiki lukela, na kugana kuwuka. Nambu mkohanu waki akamjovela, "Lyahi hoti chidogo, ulindila muhi ndi uwuka." Ndi voha vavili vakalya pamonga.

9 Mlawi na avala yaki yula pamonga na mtumisi waki pavayimili kuhamba, mkohanu waki akamjovela Mlawi, "Hinu, lola lilanga litipimi. Ugona penapa na kusangaluka. Chilau lukela pee yati uyimuka na kutumbula lugendu lwaku lwa kuwuya kunyumba."

10 Nambu Mlawi yula akabela kugona kwenuko kilu yingi. Ndi, akayima na kuwuka akahika papipi na muji wa Yebusi ndi hinu ukemiwa Yelusalemu. Avili na avala waki na mvanda waki pamonga na punda zivili zila. 11 Pevahegalili ku Yebusi, na kilu yihegalili, mtumisi akamjovela bambu waki, "Hinu mbanga tiyingila mu muji uwu wa Vayebusi na tikagone mwenumo."

12 Bambu waki akamyangula, "Yati ting'anamuka lepi na kuyingila mumuji wa vayehe ndi vangavya Vaisilaeli. Yati tiyendelela na lugendu mbaka tihika ku Gibea. 13 Tikangamale tihamba tikagona ku Gibea amala ku Lama." 14 Hinu, vakayendelela na lugendu lwavi, lilanga latipimi pevavili papipi na muji wa Gibea weuvii mumlima wa likabila la Benjamini. 15 Vakayingila pamuji wa Gibea muni vagona mwenumo. Pavayingili pamuji vakahamba kutama paluvanja lwa muji, muni kawaka mundu mweavagongolili vakagona kunyumba yaki.

16 Pavavili kwenuko gogo mmonga, abwelili kuhuma kumgunda waki. Gogo mwenuyo avili mkolonjinji wa mulima wa hitumbi ya Efulaimu na atamayi ku Gibea ngati myehe. Vandu va muji wa Gibea vavili vandu va likabila la Benjamini. 17 Gogo yula pealolili na kumuwona mwanalugendu yula avi paluvanja, akamkota, "Uhumili kwoki na uhamba kwoki?"

18 Na mwene akamyangula, "Tihumili ku Betelehemu ku mulima wa Yuda na tihamba kutali kuhitumbi ya Efulaimu. Kwenuko ndi kwenitama ndi hinu niwuya kulugendu ku Betelehemu kumulima wa Yuda na niwuya kunyumba ya Bambu. Nambu kawaka mundu yoyoha mweatigongolili munyumba yaki. 19 Tete vatumisi vaku tivi na manyahi ndava ya kulisila punda zitu. Mewawa tivi na libumunda na divayi, ndi vikunikola nene na mdala wangu na mtumisi wangu. Tigana lepi chindu chochoha."

20 Gogo yula akavajovela, "Mbwela kugona kwa nene na yati nikuvapela chindu chochoha nambu mkotoka kugona paluvanja." 21 Ndi akavapeleka kunyumba yaki na kuzipela punda manyahi. Vandu venavo vakasanja magendelu na vakalya na kunywa.

22 Pevavili mukulya na kusangaluka, vakabwela vagosi vahakau va muji wenuwo na kutindila nyumba yeniyo na kugonga pamlyangu. Vakamjovela gogo yula mkolo nyumba, "Muhumisa kuvala mgosi mweabwelili kwaku, tigana kugona naku."

23 Nambu gogo yula mkolo nyumba akahuma kuvala, akavajovela, "Lepi valongo vangu, pepayi mkotoka kumhengela lijambu lenili la soni. Mwenuyu ndi myehe wangu, mkotoka kumkitila uhakau wenuwo. 24 Mlola, nivi na msikana wangu mwangagona na mgosi mewa avi msikana wa mvanda wa myehe uyu. Nivahumisa na muvahengela ngati chamnogela, nambu mundu uyu mkotoka kumuhengela lijambu la soni." 25 Nambu vagosi vala vamuyuwanili lepi. Hinu Mlawi yula akamuhumisa kuvala mdala waki na kuvapela vandu venavo. Na vene vakagona nayu kwa makakala kilu yoha mbaka lukela. Hambakucha vakamleka ahamba.

26 Papipi na lukela, mdala yula akabwela mbaka pamlyangu wa nyumba yaavili mgosi waki, akagwa pahi na kuvya penapo mbaka lukela pakwachili njwee. 27 Mgosi wa mdala yula payimwiki lukela, akadindula milyangu ya nyumba, akahuma kuvala muni ayendelela na lugendu. Chigafula akamkolela mdala waki kuvala agonili pahi pamlyangu na mawoko gaki gavii ngati igana kukamula mulyangu. 28 Akamjovela, "Yima tihambe." Nambu mwene ayangwili lepi chindu muni avii amali kufwa, akamyinula akamkweha panani ya punda waki na kumpeleka mbaka kunyumba yaki. 29 Pahikili kunyumba akatola chipula na kudumulana higa ya mdala yula hipandi kumi na vivili. Kangi akavipeleka vipandi vyenivyo mu kila likabila la Isilaeli, kila likabila lapewili chipandi chimonga. 30 Vandu voha vevalolili lijambu lenilo vakajova, "Lijambu lenilo la kukangasa lahumalili lepi amala kuwonekana kuhumila ligono lila Vaisilaeli pavahumili ku mulima wa Misili mbaka lelu. Tikotana na tiholalela na kuhamula cha kukita."