1 Ligono lenilo, Debola na Balaki mwana wa Abinoamu vayimbili lunyimbu ulu.

2 Vachilongosi vavalongwisi Isilaeli,

vandu vajiwusili kwa kugana vene,

Mumlumba Bambu Chapanga!

3 Muyuwanila nyenye vankosi!

Muyuwana nyenye vakulu!

Yati nikumyimbila Bambu Chapanga

Yati nikumyimbila Bambu Chapanga lunyimbu lwa kumlumba, Chapanga wa Isilaeli.

4 Veve Bambu Chapanga pawahumili ku Seili,

pawahelili kuchitumbi Edomu,

mulima wandendimi,

kunani kwa Chapanga kwagwisili manji, na mahundi gatonyisi fula.

5 Hitumbi yanyugusiki palongolo yaku Bambu Chapanga,

hati chitumbi sinai chanyugusiki palongolo yaku, veve Bambu Chapanga, Chapanga wa Isilaeli.

6 Mumagono ga Shamgali mwana wa Anati,

mumagono ga Yaeli,

njila zivaha zavi lepi na vandu vevapitayi kuhamba kugulisa na kugula vindu,

vanalugendu vapitili njila za mumihana.

7 Valimaji valekili kulima,

mbaka panahumalili nene Debola,

nene mwanivili ngati mau wa vandu Vaisilaeli.

8 Vaisilaeli pevamulekili Chapanga na kujihagulila mchapanga wungi,

Kukahumalila ngondo pamulima.

Nambu avi lepi hati mlota mmonga mweakamwili mgoha amala mweakamwili chingwamba,

pagati ya manjolinjoli elufu alubaini va Isilaeli

9 Nikuvalumba vakulu va manjolinjoli va Isilaeli,

vevajiwusili kwa kugana kwavi vene pagati ya vandu,

Mumlumba Bambu Chapanga!

10 Nyenye mwemukwela punda zamsopi,

nyenye mwamutamila vindu vya kutamila vya mashonga gamahele, vyevivikwa panani yaki,

nyenye mwamugenda munjila mkokosa lijambu lenilo.

11 Muyuwanila lwami, za nyimbu za misambi ya vandu vevitindila viliva,

ava viyimba kuhotola kwa Bambu Chapanga,

uhotola wa vandu vaki kumulima wa Isilaeli.

Penapo vandu va Bambu Chapanga vahulwiki mumilyangu ya muji.

12 Yimuka, Debola!

Yimuka uyimba lunyimbu!

Yimuka Balaki mwana wa Abinoamu,

uvatola vandu vaku veuvakamwili kungondo!

Vee wamwana wa Abinoamu. 13 Vakekesi vevasigalili vahelili kuwuya kwa vachilongosi vavi,

vandu va Bambu Chapanga vabwelili kwa nene, kukomana na vamakoko vitu vevanamakakala.

14 Vabwelili manjolinjoli kuhuma likabila la Efulaimu vakahelela kunyasi,

vakalanda valongo vavi vandu va likabila la Benjamini.

kuhuma mulukolo lwa Makili vakabwela vakulu va manjolinjoli,

kuhuma mu likabila la Zebuluni vabwelili vachilongosi vakulu.

15 Vakulu va likabila la Isakali valandini na Debola,

Chakaka, vandu va likabila la Isakali vamlandili Balaki mewa

vamlandili mbaka kunyasi.

Nambu vandu va likabila la Lubeni

vahotwi lepi kuhamula vahamba amala vakoto kuhamba

16 Ndava kyani mwasigalili mumbele pamonga na misambi ya mambelele?

Wu, mwamuyuwanila lukwilu za vadimaji vikemela mambelele?

Chakaka lukolo za Lubeni zagavanyiki

vahotwi lepi kuhamula vahamba amala vakoto kuhamba

17 Vandu va ku Gileadi vatamili kumwambu ya mfuleni Yolodani,

vandu va likabila la Dani vasigalili muwatu yivaha.

Vandu va likabila la Asheli mewawa vatamili munyumba zavi papipi na nyanja.

18 Manjolinjoli va likabila la Zabuloni vayogwipi lepi kufwa kungondo,

mewawa na manjolinjoli va likabila la Nafutali vayogwopi kuvazangila vamakoko vavi.

19 Ku Tanaki, pamuhana ya chinyepa cha Megido,

vankosi vabwelili na kutovana, vankosi va ku Kanaani vatovini,

nambu vatinyagili lepi madini ga feza.

20 Ndondo zatovini ngondo uko kunani ku mahundi,

ngati pezagendayi munjila zaki, zatovini na Sisela.

21 Manji gamahele ga mfuleni Kishoni gavayolili kutali,

chakaka manji gamahele ga mfuleni Kishoni.

veve mpungu wangu uyendelela kulongolo kwa makakala!

22 Falasi za Sisela zapitili na kupalu palu kwa chigigi,

zakitili chigigi na kwatu zavi.

23 Mtumu wa kuanani kwa Chapanga ijova naha,

"Muupela likoto vandu muji wa Melozi,

muvapela likoto neju vandu vaki,

muni vabeli kutangatila ngondo za Bambu Chapanga,

vabelili kutovana na vamakoko va Bambu Chapanga vevana makakala."

24 Yaeli amotisiwa kuliku vadala voha,

mdala wa Hebeli, mweihumila kumulima wa Kemi,

amotisiwa kuliku vadala voha vevitama mumandanda.

25 Sisela amyupili manji, na mwene ampelili mavele,

amletili magindani munkeve wa utopesa.

26 Kwa chiwoko kumangiha akamwili chibiki cha lindanda,

na muchiwoko cha kulyela akamwili nyundu ya fundi,

akamubowola mutu waki na kumbonda Sisela mutu,

adenyili na kubayula chiwungi chaki,

27 Sisela agundimi, akagwa, pamagendelu ga Yaeli,

agonili nuu pamagendelu ga Yaeli.

Pala peagundimi ndi afwili.

28 Nyina waki Sisela alolokesa palidilisha na penapo palidilisha akatumbula kujova,

ndava kyani mutuka yaki ya kuhutwa na falasi yicheliwi?

Ndava kyani vigigi vya falasi waki vicheliwi kuyuwanika?

29 Vadala vevana luhala vevamhengela vakamyangula,

akajipolesa mtima kangi na kangi kwa liyangulo lenilo.

30 Chakaka vilonda na kugavana vindu vyevanyagili kungondo,

msikana mmonga amala vavili kwa kila linjolinjoli,

ligwanda la mangoma ga langi ndava ya Sisela,

ligwanda la mangoma ga limbelele lelitotiwi,

na magwanda gavili gegatotiwi mapambu ndava yangu.

31 Veve Bambu Chapanga makoko vaku vafwayi voha,

nambu vala vevakukugana vavyai ngati mabalala pala peyilanga lukumbi lilanga pelihuma kwa lumuli luvaha!

Na mulima wavili na uteke njwe kwa miyaka alubaini.