1 Lukumbi lwenulo kwavili na mundu mmonga lihina laki Mika, mweatamayi kuhitumbi ya mulima Efulaimu. 2 Ligono limonga amjovili nyina waki, "Wu, ukumbuka hipandi elufu yimonga na miya yimonga ya madini ga feza vyawayiviwi? Nene navili na nayuwini chawampela likoto mundu mweakuyivili, nene nivi navyu na ndi mwenakuyivili." Nyina waki akajova, "Wa mwana wangu umotisiwa na Bambu Chapanga!"

3 Mika akamuwuyasila nyina waki hipandi alufu yimonga na miya yimonga ya madini ga feza. Nyina waki akajova, "Muni likoto ili likotoka kukupata, vipandi vyenivi vya feza nikuviwusa kwa Bambu Chapanga muni titengeneza chimong'omong'o cha kuhongola na kugubikwa kwa madini ga feza. Hinu nene nikuwuyasila vipandi vyenivi vya feza." 4 Mika pamuwuyasile nyina waki ipandi ya madini ga feza gala, nyina waki akatola vipandi miya zivili akampela mwaikita lufumbu na mwene akatengeneza chimong'omong'o cha kuhongola na kuchigubika kwa madini ga feza. Chimong'omong'o chenicho akachivika mugati ya nyumba ya Mika.

5 Hinu Mika avili na pandu paki pakumyupila Chapanga. Atenganize kagwanda ka panganga ka mteta na vimong'omong'o, kangi akamkita mmonga wa vana vaki kuvya mteta waki. 6 Lukumbi lwenulo kwavili lepi na nkosi ku Isilaeli. Kila mundu akitili chochoha chawonili chabwina.

7 Lukumbi lwenulo kwavili na msongolo mmonga mweatamayi kumuji wa Betelehemu ku mulima wa Yuda, mundu mwenuyo avii Mlawiwa likabila la Yuda. 8 Msongolo mwenuyo awukili ku Betelehemu na kuhamba kulonda pandu pangi pa kutama. Mulugendu lwaki ahikili kunyumba ya Mika kumulima wa hitumbi ya Efulaimu. 9 Mika akamkota, "Uhumili kwoki?" Mwene akamyangula, Nene Mlawi kuhuma kumuji wa Betelehemu mulima wa Yuda. "Nilonda pandu pa kutama."

10 Mika akamjovela, "Tama pamonga na nene, muni uvya ngati mshauli na mteta wangu. Yati nikupela hipandi kumi ya madini ga feza kila mwaka na nyula pamonga na chakulya." 11 Mlawi yula akayidakila kutama na Mika, na kuvya ngati mmonga wa vana vaki. 12 Hinu Mika akamkita Mlawi yula kuvya mteta waki na kutama kunyumba yaki. 13 Kangi Mika akajova, "Hinu nimanyili kuvya Bambu Chapanga yati ikita mambu gangu gakitika bwina muni nivi na msongolo uyu Mlawi ngati mteta wangu."