1 Ligono limonga Samsoni ahambili kumuji wa ku Gaza, kwenuko akonganike na mdala mmonga mkemi akagona nayu. 2 Vandu va ku Gaza pavajoviwi kuvya Samsoni avi kwenuko, vatindili pandu apo kumbajamila pa limlyangu la muji kilu yoha mbaka lukela. Vatamili nuu kwenuko kilu yoha muni vajovili yati tikumkoma lukela. 3 Nambu Samsoni agonili kwenuko mbaka pagati ya kilu. Kilu yiyo ayimwiki na kuhamba kulimlyangu la muji. Kwenuko akalitupula limulyangu loha pamonga na vidindilu vyaki akagega mumavega gaki na kuhamba nalu mbaka kuchitumbi chechivii papipi na Hebuloni.

4 Pegamaliki genago, Samsoni amganili mdala yungi mweikemiwa Delila mwatamayi kulikemba la Soleki. 5 Vachilongosi va Vafilisiti vakamuhambila Delila yula na kumujovela, "Umubembelezayi Samsoni muni uhotola kumanya makakala gaki gahumalili kwoki na namuna chetihotola kumukamula na kumukunga. Na tete kila mumonga witu yati akukupela hipandi elufu yimonga na miya yimonga ya madini ga feza."

6 Delila amjovili Samsoni, "Pepayi, nijovela makakala gaku gihumalila kwoki, na mundu ihotola wuli kukuhotola na kukukunga?"

7 Samsoni akayangula, "Vakanikunga kwa nyosi saba zivisi za upindi wa nduta, penapo yati nivya lepi na makakala ngati mundu yungi yoyoha."

8 Vakulu va Vafilisiti vamletili Delila nyosi saba zivisi za upinde, na mwene akamkunga Samsoni kwa nyosi zenizo. 9 Delila avahihili manjolinjoli muchumba chingi vamnyemelela Samsoni, kangi akamkemela Samsoni kwa lwami luvaha, "Samsoni, manjolinjoli va Vafilisiti vabwelili kukuzangila!" Nambu Samsoni akadawula nyosi zila zeakungiwi mumawoko ngati wuzi chautinyika motu. Hinu kawaka mundu mweamanyili kuvya makakala gaki gihumila kwoki.

10 Delila akamjovela Samsoni, "Veve univevisi na unikongili. Pepayi niyupa unijovela mundu chaihotola kukukunga kwa chindu kiki."

11 Samsoni akamyangula, "Vakanikunga kwa nyosi za mupya zangahengewa lihengu loloha penapo yati nivya nangali makakala ngati mundu yungi yoyoha."

12 Hinu, Delila akatola nyosi zamupya akamkunga. Kangi akamjovela Samsoni kwa lwami luvaha, "Vafilisiti vabwelili kukuzangila!" Penapo kwavili na manjolinjoli kuchumba chingi vakumnyemelela. Nambu Samsoni akazidawula nyosi zila zeakungiwi mumawoko gaki ngati wuzi.

13 Delila akamjovela Samsoni, "Mbaka hinu wakona ukunikonga ugani lepi kunijovela uchakaka. Nijovela mundu chaihotola kukukunga." Samsoni akamyangula, "Ukabota mayunju gangu gavya mubutu saba na kukungisa pamonga muchitambala, na kukunga mulitendegu yati nivya nangali makakala ngati mundu yungi yoyoha."

14 Samsoni pagonili, Delila abotili mabutu saba ga mayunju ga Samsoni pamonga na chitambala na kukunga mulitendegu. Kangi akamjovela Samsoni, "Samsoni manjolinjoli ga Vafilisiti vibwela kukuzangila." Samsoni akayimuka kuhuma mulugono akatupula litendegu lila na kupapula chitambala chila.

15 Delila akamjovela Samsoni, "Uhotola wuli kujova uniganili kuni ulangisa uniganili lepi kwa kunikonga? Univevisi mala zidatu, unijovili lepi kuvya makakala gaku gihumila kwoki." 16 Delila ayendalili kumng'aha Samsoni kwa kumujovela mambu genago magono goha. Ndi Samsoni akatotokela neju na aganili lepi kangi kukotwa kotwa ndava ya lijambu lenilo, 17 pamwisu akamujovela uchakaka, akajova, "Katu mayunju gangu gawahi lepi kuketwa, nene nivaguliwi ndava ya Bambu Chapanga kuhumila panavili mulutumbu lwa nyina wangu. Ngati vakaniketa mayunju gangu makakala gangu yati giwuka, ndi yati nivya ngati vandu vangi."

18 Hinu, Delila palolili kuvya Samsoni amjovili mfiyu wa makakala gaki, akavakemela vakulu va Vafilisiti, akavajovela, "Mbwela kangi muni Samsoni anijovi mfiyu waki woha, penapo vakulu va Vafilisiti vakamuhambila Delila kuni vamugegili vipandi vya madini ga feza ngati chevamujovili." 19 Hinu Delila akamkita Samsoni agona pa mawondo gaki, akamkemela mundu amketa mabutu saba gala. Kangi Delila akatumbula kumng'aha Samsoni muni makakala gaki gamuwukili. 20 Delila akamjovela, Samsoni, "Samsoni manjolinjoli ga Vafilisiti vibwela kukuzangila!" Samsoni akayimuka mulugono kuni iholalela ngati ihuma na kujisangula ngati cheikitaga. Kumbi amanyili lepi kuvya Bambu Chapanga amali kumleka. 21 Vafilisiti vakamkamula Samsoni, vakamkoyola mihu na kumpeleka kumuji wa ku Gaza, vamkungili kwa pingu za shaba na kumsopa muchifungu, na kwenuko vakampela lihengu la kuyaga nganu. 22 Nambu mayunju ga Samsoni gakatumbula kumela na kukula kavili.

23 Vakulu va Vafilisiti vakonganike ndava ya kuselebuka na kumuwusila luteta chapanga wavi mwaikemiwa Dagoni. Hinu vakavya viyimba naha, "Hinu chapanga witu atitangatili kumkamula likoko witu Samsoni." 24 Vandu pevamanyili gegamkolili Samsoni, vakamlumba chapanga wavi na kujova, "Hinu chapanga witu atitangatili kumkamula likoko witu mweahalabisi mlima witu na kukoma vandu vitu vamahele." 25 Vandu pevahekalili neju mumitima yavi, vakajova, "Mumleta Samsoni abwela kukina." Hinu vamuwusili Samsoni muchifungu, na mwene akakina palongolo yavi vakamvika ayima pagati ya nguzo zivili. 26 Samsoni amjovili msongolo mwamlongosa, "Nivika pandu penihotola kupamisa nguzo zezikamulili lijengu ili muni na nene niyegemela." 27 Nyumba yeniyo yavili yimemili vandu vagosi na vadala. Vachilongosi va Vafilisiti vavili mwenumo, na kudali ya nyumba yeniyo kwavili na vandu alufu zidatu vagosi na vadala, vandu voha vamulingulilayi Samsoni cheakuvahekesa.

28 Penapo Samsoni akamuyupa Bambu Chapanga, "Chondi Bambu Chapanga, nikuyupa unikumbuka. Nipela makakala mala yimonga ndu veve Chapanga wangu muni nivalipisa Vafilisiti, ndava ya kukoyola mihu gangu." 29 Hinu, Samsoni akamwili nguzo zivili za pagati zezakamulili nyumba yoha, chiwoko chimonga munguzo yimonga na chingi nguzo yingi. 30 Kangi Samsoni akajova, "Nifwayi pamonga na Vafilisiti!" Akakang'a nguzo zila kwa makakala gaki goha, nyumba yavagwilili vakulu voha va Vafilisiti na vandu voha vevavili mugati. Penapo veavakomili lukumbi lwa lifwa laki vavili vamahele neju ya vala veavakomili peavili mumi.

31 Valongo vaki vabwelili kumtola, vamzikili pagati ya muji wa Sola na muji wa Eshitaoli mulitinda la Manoa, dadi waki. Samsoni avili muhamula wa Isilaeli kwa miyaka ishilini.