1 Ku Gileadi avi mundu mkekesi neju liina laki Yefuta, mwana wa mau mmonga mkemi, na dadi waki akemewayi Gileadi. 2 Gileadi avi mewa na vana vangi kwa mdala waki wa chakaka. Vana vala pevakulili ndi vakamvinga Yefuta na kumjovela, "Nakuhotola veve kuhala chochoha kuhuma kwa dadi witu, ndava veve wamwana wa mdala yungi." 3 Hinu Yefuta akavatila valongo vaki akahamba kutama pamulima wa Tobu. Pandu pevitama vandu vangagana kuyidakila malagizu vakajiwunga nayu na kumlanda mulugendu lwaki.

4 Mwanakandahi, Vaamoni vatovini ngondo na Vaisilaeli. 5 Pegahumalili genago, vagogo va ku Gileadi vahambili kumtola Yefuta ku mulima wa Tobu. 6 Vakamjovela Yefuta, "Ubwela utilongosa patitovana ngondo na Vaamoni."

7 Nambu Yefuta akavayangula vagogo vala ku Gileadi, "Wu mwemwanibelili nene na kunivinga panyumba ya dadi wangu? Ndava kyani mukunilanda hinu, kuni muvi mumanga'iso?"

8 Vachilongosi va ku Gileadi vakamjovela Yefuta, "Kosewa gamumbele, tete tibwela kwaku muni ukatitangatila kutovana ngondo na Vaamoni, na veve yati uvya chilongosi witu na vandu voha va pa Gileadi."

9 Yefuta akavajovela vagogo va ku Gileadi vala, "Mukaniwuyisayi kunyumba na nyenye mkatovana ngondo na Vaamoni na Bambu Chapanga akanitangatila kuvatova, wu chakaka yati nivya chilongosi winu?"

10 Vagogo va ku Gileadi vala vakamjovela Yefuta, "Bambu Chapanga iyuwana goha getijova na tete yati tikita ngati cheujovili." 11 Yefuta akalandana na vagogo va Gileadi, na vene vamkitili kuvya chilongosi wavi na mkulu wa manjolinjoli. Kwenuko ku Mizipa awuyili kavili kugajova malovi gaki palongolo ya Bambu Chapanga gala goha gealongili na vagogo.

12 Yefuta avatumili vajumbi kwa nkosi wa ku Amoni vakamjovela, "Uvi na luhonda lwoki na tete mbaka ubwela utovana na vandu va mulima witu?"

13 Nkosi wa ku Amoni akavayangula vajumbi vala, "Vaisilaeli pavahumili ku Misili, vatolili mulima wangu kuhuma mfuleni Alinoni mbaka mfuleni Yaboki na mfuleni Yolodani. Hinu niwuyasila mulima wangu kwa uteke."

14 Yefuta akatuma kangi vajumbi kwa nkosi wa ku Amoni 15 vakamjovela, "Vaisilaeli vatolili lepi mulima wa Vamoabu amala mulima wa Vaamoni. 16 Nambu Vaisilaeli pevahumili ku Misili vagendili kulukongolo mbaka nyanja ya Shamu na kuhika ku Kadeshi. 17 Kangi Vaisilaeli vakatuma vajumbi kwa nkosi wa ku Edomu vakamuyupa vapita pamulima waki, nambu nkosi wa ku Edomu akabela. Ndi vakamuyupa nkosi wa ku Moabu na mwene mewa akabela. Hinu Vaisilaeli vasigalili ku Kadeshi. 18 Kangi vagendili kupitila kulugangatu kutindila mulima wa Edomu na Moabu mbaka pavahikili upandi kwelihumila lilanga wa mulima wa Moabu. Kangi vavikili kambi kumwambu ya mfuleni Alinoni. Nambu vayingili lepi kumulima Moabu ndava muni mfuleni Alinoni ndi wavili mmbaka wa Moabu. 19 Penapo Vaisilaeli vatumili vajumbi kwa nkosi Sihoni wa Vaamoli mwatalila ku Heshiboni vakamuyupa vapita pamulima waki pevihamba kumulima wavi. 20 Nambu Sihoni avayidakili lepi Vaisilaeli vapita pamulima waki, ndava muni avasadiki lepi Vaisilaeli na kuvaleka vapitayi. Hinu Sihoni avakonganisi manjolinjoli vaki voha, akavika kambi ku Yahasa, muni vatovana na vandu va Vaisilaeli. 21 Nambu Bambu Chapanga, Chapanga wa Vaisilaeli avatangatilia Vaisilaeli vakamtova Sihoni pamonga na manjolinjoli vaki. Hinu Vaisilaeli vatolili mulima woha wa Vaamoli wula wevatamayi. 22 Vatolili mulima woha wa Vaamoli, kuhumila mfuleni Alinoni mbaka mfuleni Yaboki, mewawa kuhumila lugangatu upandi walihumila lilanga mbaka kwelitipama lilanga mwa mfuleni Yolodani. 23 Hinu, Bambu Chapanga, Chapanga wa Isilaeli, ndi mweavavingili Vaamoli vawuka palongolo ya Vaisilaeli. Wu, veve ugana kutinyaga mulima witu? 24 Utola mulima weupewili na mchapanga winu Kemoshi. Nambu tete yati titama mulima wetipewili na Bambu Chapanga, Chapanga witu. 25 Wu, uholalela kuvya veve unamakakala neju kuliku Balaki mwana wa Zipola mwaavili nkosi wa Moabu? Mwene akomini lepi na Vaisilaeli amala kutovana nawu lukumbi lwoha. 26 Ndava muni kwa miyaka miya zidatu Vaisilaeli vatamili ku Heshiboni na hijiji yaki pamonga na miji ya Aloeli na hijiji yaki pamonga na miji yoha yeyivili mumihana ya mfuleni Alinoni, ndava kyani veve watolili lepi ndima yeniyo lukumbi lwenulo? 27 Nene nikuhokili lepi chochoha nambu veve unihokili kwa kutovana na nene. Bambu Chapanga ndi muhamula lelu ahamula pagati ya Vaisilaeli na vandu va Amoni." 28 Nambu nkosi wa Amoni avevisi ujumbi wenuwo wa Yefuta.

29 Kangi Mpungu wa Bambu Chapanga wamuhambili Yefuta, na mwene akawuka na kupita pagati ya Gileadi na Manase, akawuya Mizipa pa mulima wa Gileadi na kuvazangila Vaamoni. 30 Yefuta akamlapila Bambu Chapanga akajova, "Ngati ukanikita nivahotola Vaamoni, 31 hinu yeyoha mwaihuma kuvala ya nyumba yangu kubwela kunipokela penivya mukuwuya penimali kuvatova Vaamoni, mwenuyo yati ivya waku veve Bambu Chapanga. Mwenuyo yati nikuwusila kuvya luteta lwa kutinyisa."

32 Hinu, Yefuta akayomboka mfuleni, akahamba kutovana na Vaamoni na Bambu Chapanga akamtagatila Yefuta avahotola Vaamoni. 33 Yefuta na manjolinjoli vaki vavahotwili neju, akatola kutumbula Aloeli mbaka papipi na Miniti na kuyendelela mbaka Abeli Kelamimu, miji yoha yeyatoviwi yavili ishilini. Hinu Vaizilaeli vavahotwili jwee Vaamoni.

34 Yefuta pavili mukuwuya kunyumba yaki ku Mizipa, msikana waki akahuma kuvala kumpokela kuni ikina na kutova kang'oma. Msikana mwenuyo ndi avili mwana yuyo avi lepi na mwana yungi wa chidala amala mgosi. 35 Yefuta pamuweni, apapwile nyula zaki kwa ungolongondi na kujova, "Vee msikana wangu! Univinisi mtima. Veve ndi mmonga wa vandu vevakuning'aha. Nilapili kwa Bambu Chapanga ndi nihotola lepi kung'anamusa chila chenilapili."

36 Na mwene akamjovela, "Dadi ngati ulapili chindu kwa Bambu Chapanga, ndi kita chila chewahadili, ndava Bambu Chapanga akutangatili kuvatova Vaamoni." 37 Kangi akamjovela dadi waki, "Nikuyupa chindu chimonga, nipela miyehi hivili nihamba na vamkozi vangu kuchitumbi, kuvembenekela lifwa langu muni yati nifwa kwakona nangagegewa." 38 Dadi waki akamleka ahamba kwenuko kwa miyehi yivili. Mwene akahamba pamonga na vamkozi vaki, na kuvembeneka ndava yati ifwa kwakona angagegewa. 39 Payamaliki miyehi yivili, akawuya kwa dadi waki, na dadi waki akamkitila ngati cheahadili. Msikana mwenuyo agonili lepi na mgosi yoyoha. Ndi kuhumila penapo vakavika mvelu wenuwo ku Isilaeli. 40 Kila mwaka vasikana va Isilaeli vahamba kuvembeneka kwa magono mcheche ndava ya lifwa la msikana wa Yefuta wa ku Gileadi.