1 Ligono limonga Abimeleki, mwana wa Gidioni, ahambili kwa vajomba vaki na kwa valongo vangi va nyina waki vavitama ku Shekemu, akavajovela, 2 Muvakota vandu voha va ku Shekemu, "Ki chabwina kwinu, kutalaliwa na vana voha sabini va Yelubaali amala mtalaliwa na mundu mmonga mwene? Mkumbuka kuvya nene na nyenye ndi tavalongo va chakaka." 3 Valongo va nyina waki vavajovili vandu va ku Shekemu gala gevajoviwi na Abimeleki, na vandu voha va ku Shekemu vakamlanda Abimeleki muni avili mlongo wavi. 4 Vakampela hipandi sabini ya madini ga feza vyevyavili munyumba ya Baali Beliti, na mwene Abumeleki atumili vipandi vyenivyo kuvagongole vandu vanaluhonda na vandu vayimu muni vamtangatila. 5 Akalandana nawu kuhamba ku muji wa dadi waki ku Ofula na kwenuko akavakoma valongo vaki voha sabini panani ya liganga limonga. Nambu Yotamu mweavili mwana wa mwishu kuvelekewa wa Yelubali akomiwi lepi muni ajifiyili. 6 Vandu voha va ku Shekemu na Beti Milo vakakonganeka pahi ya mkongo uvaha weuvi papipi na liganga la ukumbuso ku Shekemu, vakamkita Abimeleki kuvya nkosi wavi.

7 Yotamu payuwini makokoso genago, akahamba kuyima panani ya chitumbi Gelizimu, akajova kwa lwami luvaha, "Muniyuwanila nyenye mwavandu va Shekemu ngati mgana Chapanga avayuwanila nyenye. 8 Ligono limonga mikongo yahambili kujihagulila nkosi wavi. Ndi yikaujovela mzeituni, ‘Veve uvya nkosi witu!’ 9 Nambu mzeituni akayangula, ‘Muholalela nihotola kuleka lihengu langu la kuwusa mahuta gangu gegilumbiwa na michapanga na vandu nihamba kujing'aisa kutalalila mikongo?’ 10 Kangi mikongo yikaujovela mkongo wa mtini, ‘Bwela veve utitalalila.’ 11 Nambu chikongo cha mtini chikayangula, ‘Wu, muholalela nihotola kuleka lihengu langu la kupambika matunda gabwina na geginoga, na nibwela kuyitalalila mikongo?’ 12 Ndi mikongo yikaujovela mzabibu, ‘Bwela veve utitalalila.’ 13 Mzabibu ukayangula, ‘Wu nileka kuwusa divayi yeyisangalusa michapanga na vandu, nibwela kujing'aha kuyitalila mikongo?’ 14 Pamwishu mikongo yoha yikaujovela mkongo wa minga, ‘Bwela veve utitalalila.’ 15 Mkongo wa minga ukayangula, ‘Ngati chakaka mgana nivatalalila, mbwela kutama pahi ya chimuhwili changu. Ndi ngati mgani lepi, hinu motu ndi yati niyakisa motu na kutinyisa mikongo ya mielezi ya ku Lebanoni.’ "

16 Yotamu akayendelela kujova, "Hinu muholalela mukiti bwina na uchakaka kumkita Abimeleki kuvya nkosi? Wu, lwenulu ndi luhuna lwemukumlipa Yelu Baali na vandu va munyumba yaki kwa gala geavakitili? 17 Mmanya kuvya dadi wangu ajitendekili kufwa ndava ya kuvagombola nyenye kuhuma kwa Vamidiani. 18 Nambu lelu muvang'anamukili vandu va munyumba ya dadi wangu na kuvakoma vana sabini panani ya liganga limonga. Kangi mumkitili Abimeleki mwana wa mdala yungi wa dadi, avya nkosi wa vandu va Shekemu, ndava muni ndi mlongo winu. 19 Hinu, ngati mkitili genago kwa ubwina na kwa kumtopesa Yelubaali na vandu va munyumba yaki, ndi Abimeleki avakita nyenye musangaluka, na nyenye mumkita mwene asangaluka. 20 Nambu ngati lepi, motu uhumila kwa Abimeleki na kuvatinyisa vandu va ku Shekemu na Beti Milo, mewawa motu uhumila kwa vandu va ku Shekemu na Beti Milo na kumtinyisa Abimeleki." 21 Kangi Yotamu akatilalila ku Beeli, akatama kwenuko ndava muni amyogwipi Abimeleki mlongo waki.

22 Hinu Abimeleki avatalalili vandu ku Isilaeli kwa likumbi lwa miyaka yidatu. 23 Kangi Chapanga akavakita Abimeleki na vandu va ku Shekemu vakomana, na vene vakabela kumlanda Abimeleki. 24 Chapanga akitili chenicho muni kulipisa kukomiwa kwa vana sabini va Yelu Baali. Genago gahumalili muni Abimeleki peavakomili valongo vaki venavo kwa kutangatiwa na valongo vaki va ku Shekemu. 25 Vandu va ku Shekemu vamnyemalili Abimeleki muni vambuna kuhuma munani ya hitumbi. Vandu venavo vavanyagili vindu vyavi vandu vevapitili kwenuko na Abimeleki akajovewa lijambu lenilo.

26 Kangi Gaali, mwana wa Ebedi, pamonga na valongo vaki vahambili kutama ku Shekemu. Na vandu va ku Shekemu vakamuhuvalila mwene muni avya chilongosi wavi. 27 Voha vakahuma kuhamba kumigunda ya mizabibu, vakayava zabibu na kutengeneza divayi na kukita mselebuko munyumba za mchapanga wavi vakalya na kunywa, kangi vakamliga Abimeleki. 28 Gaali, mwana wa Ebedi, akajova, "Tete ta vandu va ku Shekemu tivi wuli? Ndava kyani timuhengela Abimeleki? kwani mwene ndi yani? Mwene ndi mwana wa Gidioni nambu mlongo witu lepi njwee, ihotola lepi kuvya nkosi witu na tihotola lepi kumyidakila Zebuli mweamuhagwili atitalalila. Hinu ndi chabwina tivayidakila vandu va munyumba ya gogo witu Hamoli. 29 Ngati nene nganivyai chilongosi wa ku Shekemu, nganimuwusi Abimeleki akoto kuvya nkosi. Nganimjovili, ‘Yongesa manjolinjoli gaku na ubwela titovana.’ "

30 Zebuli, mtalalila wa muji, peayuwini malovi ga Gaali mwana wa Ebedi, akayoma neju. 31 Ndi akampelekela ujumbi Abimeleki ku Tolima akajova, "Gaali mwana wa Ebedi, pamonga na valongo vaki vabwelili kutama pamuji wa Shekemu, na vikulukisa vandu va muji vakubela veve. 32 Hinu mbwela kilu veve na vandu veuvi nawu, ndi uvanyemela kumigunda yeyivi papipi na muji. 33 Chilau lukela lilanga pelihuma, uuzangila neju muji wenuwo. Gaali pamonga na vandu vaki pavihuma kubwela kutovana na veve uvatova neju."

34 Hinu Abimeleki pamonga na manjolinjoli gaki goha vakawuka kilu na kuhamba ku Shekemu. Akavagava manjolinjoli vaki mumisambi mcheche, na vakajihiha mumigunda yeyavili papipi na Shekemu. 35 Gaali mwana wa Ebedi akahuma kuvala na kuyima pa limlyangu la muji, lukumbi lwenulo Abimeleki na vandu vaki vakawuka pandu pavajifiyili. 36 Gaali pavaweni vandu avo akamjovela Zebuli, "Lola vandu vihuluka kuhuma kuhituvilu vya hitumbi." Zebuli akamjovela, "Veve ulola chimuwili cha vitumbi nambu vandu lepi."

37 Gaali akajova kangi, "Lola! Vandu vihuluka pagati ya mulima na msambi wungi uhuma pandi za njila ya mkongo uvaha wa valondola."

38 Ndi Zebuli akamjovela, "Hinu kuvi kwoki kumeka kwaku, veve mwawajovili, Abimeleki ndi yani? Na ndava kyani timuhengela? Venava lepi vandu vala vewavaligayi? Hamba hinu ukatovana nawu!" 39 Gaali akawuka kuni akuvalongosa vandu va ku Shekemu kutovana na Abimeleki. 40 Nambu Gaali ahotwili lepi na kutila kuyingila mu muji, Abimeleki na mwene akatumbula kuvajumbisana na kuvakoma vandu vamahele na mituhi yavi hikadandasika mbaka pa lilyangu la muji. 41 Kangi Abimeleki akawuya ku Aluma, na Zebuli akamvinga Gaali na valongo vaki vawuka pamuji wa Shekemu.

42 Chilau yaki, Abimeleki akayuwana kuvya vandu va ku Shekemu vawuki kumuji na kuhamba kumigunda. 43 Akavatola vandu vaki akavagava mumisambi yidatu, muni vahamba kunyemelela kumigunda. Pevavaweni vandu vihuma kumuji, akahuma pala pevajifiyili vakahamba kuvakoma. 44 Abimeleki na msambi wa manjolinjoli veavii navu vakajumba na kuyima pa limlyangu la muji. Ndava ya ku vadivalila vandu vakotoka kuwuya kubomani. Misambi yaki yivili yeyasigalili yikavahambila vala vevavi kumigunda na kuvakoma voha. 45 Ngondo yayendalili muhi woha, Abimeleki akautola muji wenuwo na kuvakoma vandu voha vevavili mwenumo. Kangi akabomola nyumba za pa muji na kusopa mwinyu ndima yoha ya muji wenuwo.

46 Vachilongosi voha vevatamayi ku mnala wa Shekemu pavayuwini makokoso genago, vakatila kuhamba mu nyumba yeyavi na ngomi ya mchapanga weukemiwi Bali Beliti. 47 Abimeleki ajoviwi kuvya vachilongosi voha vevatamayi kumnala wa Shekemu vakonganiki pamonga. 48 Abimeleki na vandu vaki vakahamba kuchitumbi cha Salimoni, akatola livagu na kudumula limbanda la mkongo na kulivika palivega laki. Kangi akavalagiza vandu vala veavi nawu kanyata vakita ngati chakiti mwene. 49 Kila mmonga akadumula limbanda ngati lila la Abimeleki. Vakatola mambanda gavi na kugayegeka muluwumba lwa ngomi, vagayocha motu na kutinyisa ngomi, na vandu voha vagosi na vadala elufu yimonga vevavili kumnala wa Shekemu vakafwa.

50 Kangi Abimeleki akahamba ku Tebesi, akautindila muji wenuwo na kuutola kwa makakala. 51 Nambu kwavili na mnala waukangamili wewavii pagati ya muji. Hinu vandu voha va muji vagosi na vadala vakatilila mwenumo na kujidindalila mugati. Vakakwela kuchituvilu cha mnala wenuwo. 52 Abimeleki na vandu vaki vakahamba pamunala wula muni kuuzangila, na mwene auhegelili mlyangu wa kuyingilila ku mnala muni auyocha motu. 53 mdala mmonga akamtagila Abimeleki liganga la kuyagila, likambonda kumutu na kumkayula mutu waki. 54 Kangi Abimeleki akamkemela kanyata msongolo waki mwagegili vindu vya ngondo akamjovela, "Tola upanga waku unikoma, vandu vakoto kujova kuvya nakomiwi na mdala. Msongolo akatola upanga waki akamuhoma na kumkoma." 55 Vaisilaeli pavaweni kuvya Abimeleki afwili, kila mundu akahamba kunyumba yaki.

56 Chenicho ndi Chapanga cheambuni Abimeleki kwa uhakau wula weamukitili dadi waki kwa kuvakoma valongo vaki sabini. 57 Mewawa Chapanga avabunili vandu va ku Shekemu ndava ya uhakau wavi wa kumtangatila Abimeleki. Hinu likoto la Yotamu mwana wa Yelu Baali likavakolela.