1 Vandu va Efulaimu vamkotili Gidioni, "Ndava kyani utihengili naha? Ndava kyani watikemili lepi pawahambili kutovana na Vamidiani?" Hinu ndi vakavembeneka neju.

2 Nambu Gidioni akavayangula, "Mambu gamuhengili nyenye ndi gavaha neju kuliku gala ganihengi nene pamonga na vandu va lukolo lwangu. Chila chidebe chavakitili vandu va Efulaimu pavamalili kubena ndi chabwina kuliku mabenu ga valongo vangu va Abieezeli. 3 Chapanga avahotwisi nyenye muvakoma Olebu na Zeebu vankosi va Midiani. Wu, nene nikitili kyani kulinganisa na nyenye?" Gidioni pamalili kujova genago, vakaleka kumyomela.

4 Kwa lukumbi ulu Gidioni pamonga na manjolinjoli vaki miya zidatu vahikili ku mfuleni Yolodani, vakayomboka. Pamonga vatotokili neju nambu vayendelili kuvalandalila Vamidiani. 5 Pavahikili ku Sukoti akavajovela vandu va muji wenuwo, "Pepayi muvapela manjolinjoli vangu chakulya valyayi muni vatotokili neju, nene nakona niyendelela kuvalandalila vankosi va ku Midiani Zeba na Salimuna."

6 Nambu vachilongosi va Sukoti vakamkota Gidioni, "Ndava kyani tivapela chakulya manjolinjoli kwakona kumkamula Zeba na Salimuna?"

7 Gidioni akavajovela, "Chakaka, nambu Bambu Chapanga pakunitangatila kuvakamula Zeba na Salimuna, yati niwuya na kuvatova kwa minga na mbigili za kulugangatu!" 8 Gidioni akawuka penapo na kuvahambila vandu va Penueli, akavayupa namuna yilayila, na vandu va Penueli vamuyangwili ngati chavayangwili vandu va ku Sukoti. 9 Gidioni akavajovela, "Paniwuya kuni nivahotwili vankosi avo yati nikuubomola mnala uwu!"

10 Zeba na Salimuna vavili ku Kalikoli pamonga na manjolinjoli elufu kumi na muhanu ndi vevasigalili kuhuma kwa vandu vaki va kwelihumila lilanga, muni vayavi laki yimonga na elufu ishilini vakomiwi. 11 Gidioni akalanda njila ya upandi wa kwelitipama lilanga yeyivili upandi wa kwelihumila lilanga mwa Noba na Yogibeha, akalizangila manjolinjoli ago chigafula. 12 Vankosi venavo va Midiani, Zeba na Salimuna vatolwiki na kutila, nambu Gidioni avalandili na kuvakamula, na manjolinjoli voha vayogwipi.

13 Kangi Gidioni, mwana wa Yoashi, akawuya kuhuma kungondo kwa kupita pandu pa kuholotela papikemiwa Helesi. 14 Akamkamula msongolo mmonga wa ku Sukoti na kumkotakesa. Msongolo yula akamyandikila mahina ga vachilongosi na vagogo vavimanyikana neju va ku Sukoti, venavo voha vavili vandu sabini na saba. 15 Gidioni akawuya kwa vandu va ku Sukoti, akavajovela, "Mukumbuka pamwaniligili na kujova, ‘Ndava kyani kuvapela mabumunda vandu vaku vevatotoki neju kwakona mwangamkamula Zeba na Salimuna?’ Hinu Zeba na Salimuna ndi ava apa!" 16 Hinu, akavakamula vagogo voha va ku Sukoti na akavatova na kuvapapula higa zavi kwa minga na mbigili ndi livya lihakalilu kwavi. 17 Mewawa akaubomola mnala wa ku Penueli na kuvakoma vagosi voha va pa muji wenuwo.

18 Kangi Gidioni akavakota Zeba na Salimuna, "Wu, vandu vala vemwavakomili ku Taboli yavi wuli?" Vakamyangula, "Vawanini na veve, muni kila mumonga awonikini ngati mwana wa nkosi."

19 Gidioni akavajovela, "Venavo vavili valongo vangu, vana va nyina wangu wa kuniveleka. Nilapa kwa Chapanga mwavili mumi, kuvya ngamuvakomili lepi, hati nene nganivakomi lepi nyenye." 20 Kangi akamjovela Yateli, mvelekanu waki wa kutumbula, "Vakoma venava." Yateli ayogwipi kuutola upanga waki muni avi akona mdebe.

21 Penapo Zeba na Salimuna vakajova, "Tikoma wamwene muni lenili ndi lihengu la mundu mvaha." Hinu Gidioni akavakoma Zeba na Salimuna na akatola mapambu gegavili muhingu za ngamiya zavi.

22 Vaisilaeli vakamjovela Gidioni, "Veve ndi uvya chilongosi witu, veve pamonga na viveleku vyaku vyavibwela, muni veve utigombwili kwa Vamidiani."

23 Gidioni akavayangula, "Nene yati nivya lepi mtalila winu amala viveleku vyangu. Bambu Chapanga ndi mwakuvalongosa." 24 Kangi akavajovela, "Nigana kuvayupa chindu chimonga, niyupa kila mmonga winu anipela ndolola zamwanyagili kungondo." Vamidiani vala vavii Vaishimaeli, ndi vawalayi vindu vya zahabu.

25 Vakamyangula, "Yati tikupela kwa kugana tavete." Hinu vatandiki nyula na voha mmonga mmonga akatagila ndolola yaki pa nyula yeniyo. 26 Utopa wa ndolola zevampelili zavii kilo ishilini. Mewawa apewili ndolola za pameng'elu za mashonga gamahele, nyula zabwina za langi ya zambalau zaziwaliwa na vankosi va ku Midiani, na mikufu yeyavii muhingu za ngamia zavi. 27 Gidioni atumili zahabu zeniyo zoha kutengenezela chindu cha zahabu chechiwanangana na nyula ya kugubika panganga lavawalili vamteta va Isilaeli akachivika ku muji waki wa Ofula. Vaisilaeli voha vahambili kuchifugamila Chindu chenicho. Ndi chindu chenicho chikavya lingongeka kwa Gidioni na vandu va munyumba yaki.

28 Hinu, Vamidiani vatoviwi na Vaisilaeli, na vavang'aili lepi kavili Vaisilaeli. Na mulima woha wa Isilaeli wavili na uteke kwa miyaka alubaini magono goha Gidioni peavi mumi.

29 Gidioni mewawa lihina laki lingi Yelubaali mweavi mwana wa Yoashi awuyili kunyumba yaki na kutama kwenuko. 30 Gidioni avili na vana vagosi sabini, muni agegili vadala vamahele. 31 Mewawa Gidioni avili na mdala yungi uko ku Shekemu mwenuyo amvelekili mwana mgosi lihina laki Abimeleki. 32 Gidioni mwana wa Yoashi, afwili pavili mgogolo neju, azikiwi mulitinda la Yoashi, dadi waki, ku muji wa Ofula wa lukolo lwa Vabiezeli.

33 Peafwili Gidioni, Vaisilaeli vayiwuyili michapanga ya Baali na kuyifugamila. Vakamkita Baali Beliti kuvya chapanga wavi. 34 Vaisilaeli vamukosiwi Bambu Chapanga, Chapanga wavi, mweavasangwili kuhuma kwa makoko vavi vevavatindili pandi zoha. 35 Mewawa vavahengili lepi gabwina vandu va lukolo lwa Yelubaali lihina laki lingi Gidioni kwa gala goha gevahengili vandu va Isilaeli.