1 Pegapitili magono gamahele, lukumbi lwa mabenu ga nganu, Samsoni atolili mwana mene akahamba kumgendelela mdala waki. Akamjovela mkohanu wa chigosi, "Nigana kumlola mdala wangu kuchumba chaki." Nambu mkohanu waki akambelelela.

2 Mkohanu waki akamjovela, "Naholalili pangi umganili lepi ndi nimgegisi mkozi waku amgega. Nambu avi mbena waki, ndi anyambi kuliku mwene. Pepayi mgega mwenuyo pahala yaki."

3 Samsoni akamjovela, "Lukumbi ulu mkotoka kujova kuvya nihengili lepi gabwina kwa gala genikuvakitila Vafilisiti!" 4 Hinu Samsoni akahamba kukamula mabweha miya zidatu na kukunga mikila yaki gaviligavili, kangi akavika chisindi cha moto mukila mabweha gavili. 5 Kangi akachonja milumuli yila na kugalekekeha mabweha gala, nagene gakayingila mumigunda ya Vafilisiti, gakayocha makinja ga nganu na nganu yeyavili yakona kubenwa, mewewa gakatinyisi na migunda ya mizeituni. 6 Vafilisiti peavakotili yani mweakitili chenicho, vakamanya kuvya Samsoni ndi mwakitili chenicho ndava ya mkohanu waki wa ku Timna, mkohanu waki amtolili mdala wa Samsoni na kumgegesa mkozi waki. Hinu Vafilisiti vakahamba kumuyocha motu mdala yula na dadi waki.

7 Samsoni akavajovela Vafilisiti, "Ngati genago ndi gamkitili! Nilapa yati niwuka lepi mbaka nivalipisa kwa gala gemuhengili!" 8 Hinu, akavazangila neju na kuvakoma vamahele. Kangi akahamba kutama mumbugu ya litalau ku Etamu.

9 Kangi Vafilisiti vakabwela, vakavika kambi yavi pamulima wa Yuda na kuuzangila muji wa Lehi. 10 Vandu va ku Yuda vakavakota, "Ndava kyani mbwelili kutizangila?"

Na vene vakavayangula, "Tibwelili kumkamula Samsoni na kumuhengela ngati cheatihengili."

11 Hinu, vandu alufu zidatu va ku Yuda vamuhambili Samsoni kumbugu ya ku Etamu vakamjovela, "Wu, umanyili lepi kuvya Vafilisiti vakutitalalila? Utihengili kyani?" Samsoni akavayangula, "Nivahengili chila chevanihengili vene." 12 Vakamjovela, "Tibweli kukukamula na kukupeleka kwavi." Samsoni akavajovela, "Munilapila kuvya mwavene yati mukunikoma lepi."

13 Vene vakamjovela, "Tete yati tikukoma lepi yati tikukunga ndu na kukugotola kwavi." Ndi vakamkunga kwa nyosi zivili zamupya na kumuhumisa mumbugu yila.

14 Pahikili ku Lehi, Vafilisiti vamuhambili mbiyo kuni viywanga. Chigafula mpungu wa Bambu wamuyingili Samsoni kwa makakala na nyosi zila zevamukungili mumawoko zadaukini ngati wuzi cheuyaka motu na kugwa pahi. 15 Samsoni akalokota njege yivisi ya punda, njege yeniyo ahengili kuvakoma vandu alufu yimonga. 16 Ndi Samsoni akajova,

"Kwa njege ya punda nikomili vandu alufu yimonga,

Kwa njege ya punda niyolili malundu ga mituhi."

17 Peamali kujova, akataga njege yila. Pandu pala pakemiwi Lamati Lehi, mana yaki chitumbi cha njege.

18 Kangi Samsoni avili na njota, akayupa, "Veve Bambu Chapanga, ndi mweunitangatili kupata uhotola uwu, kwa kunihengela nene mtumisi waku, hinu yati ukunileka nifwayi na njota na kukamuliwa na Vafilisiti ava vangadumula jandu?" 19 Chapanga akakayula pandu pepavili na lilindi ku Leki akahumisa manji. Samsoni akanywa manji gala akavya na makakala kangi. Chinyepa chenicho chakemiwi Eni Hakole ndi chivi ku Lehi mbaka lelu.

20 Samsoni avili muhamula wa Vaisilaeli kwa miyaka ishilini, nambu Vafilisiti vavii vakona vitalalila pa Isilaeli.