1 Vaisilaeli vakitili kangi uhakau palongolo ya Bambu Chapanga, na mwene akavakita vatalaliwa na Vamidiani mumiyaka saba. 2 Vamidiani vavahengili gahakau neju Vaisilaeli, mbaka Vaisilaeli vajumbalili kuhitumbi na kujigimila malindi na mbugu za hitumbi kuvya ngomi zavi za kujihiha. 3 Vaisilaeli pavapandili mbeyu mumigunda, Vamidiani na Vaamaleki na vandu vangi kuhuma kwelihumila lilanga vabwelili kuvazangila. 4 Vandu venavo vavikili kambi pa mulima, na kuhalabisa mabenu goha pamulima mbaka mumibaka ya Gaza, vavalekili lepi Vaisilaeli chochoha, mambelele amala ng'ombi amala punda. 5 Vandu venavo vabwelili vamahele ngati mambalanguli vabwelili pamonga na ng'ombi na ngamiya na mambelele gavi mandanda gavi, vahalabisi mulima wa Isilaeli muni vavili vamahele neju na kawaka mundu mweahotwili kuvavalanga. 6 Vamidiani vatolili kila chindu cha Vaisilaeli, mbaka Vaisilaeli vamvembili Bambu Chapanga avatangatila.

7 Vaisilaeli pavamvembili Bambu Chapanga avawusa mumang'aisu gegavakolili kuhuma kwa Vamidiani, 8 Bambu Chapanga avapelekili mlota, na mwene akavajovela, "Bambu Chapanga, Chapanga wa Isilaeli, ijova naha, navawusili kumulima wa Misili kwemwavili mwavavanda. 9 Navasangwili muutalila wa Vamisili na vandu voha vevatovini na nyenye pamulima uwu. Na nene navavingili vandu venavo palongolo yinu na kuvapela nyenye uwu mulima wavi uvya winu. 10 Kangi nikavajovela, nene ndi Bambu Chapanga winu, mkoto kufugamila michapanga ya Vaamoli, vala vemutama pamulima wavi! Nambu nyenye mwaniyidakili lepi nene."

11 Mtumu wa kunani kwa Chapanga akahamba, akatama pahi ya mkongo uvaha wa Yoashi mundu wa lukolo lwa Abiezeli, ku Ofula. Gidioni mwana wa Yoashi, apeta nganu pandu pa kuminyila zabibu ajihihili muni Vamidiani vakotoka kumuwona. 12 Mtumu wa kunani kwa Chapanga akamuhumila Gidioni, akamjovela "Bambu Chapanga avi pamonga na veve mkekesi!"

13 Gidioni akamjovela, "Mkulu wangu yikavya Bambu Chapanga avili pamonga na tete, mboni mambu aga goha gatihumili? Gavi kwoki matendu gaki gakukangasa gevatijovili vagogo vitu pala pevajovili, Bambu Chapanga ndi mwatiwusili ku mulima wa Misili? Nambu hinu Bambu Chapanga atilekili na kutikita titovewa na Vamidiani!"

14 Bambu Chapanga akamng'anamukila na kumjovela, "Hamba kwa makakala gaku goha geuvii nagu ukavasangula Vaisilaeli kuhuma kwa Vamidiani. Nene lepi mwanikutuma."

15 Gidioni akamyangula, "Pepai Bambu Chapanga, yati nihotola wuli kuvasangula Vaisilaeli? Muni lukolo lwangu ndi lwangali makakala ga kutovana ngondo mulikabila la Manase, nene mwene nimanyikana lepi munyumba ya dadi wangu!"

16 Bambu Chapanga akamjovela, "Nene yati nivya pamonga na veve, na yati ukuvakoma Vamidiani voha changali kunonopa ngati ukumkoma mundu mmonga."

17 Gidioni akamjovela, "Ngati uganiswi na nene, nilangisa ulangisu muni nimanya chakaka kuvya veve ndi Bambu mwaulongela na nene. 18 Nikuyupa kotoka kuwuka penapa mbaka peniwuya na kukuletela njombi." Bambu Chapanga akamyangula, "Yati nitama penapa mbaka peuwuya."

19 Gidioni akahamba kunyumba yaki akateleka nyama ya mpapakasi na akatola uhembe kilo kumi na kuteleka mabumunda gangali ngemeku, akasopa mabumunda na nyofu muchidengu na msusu muchiviga, kangi akampelekela pala pa mkongo uvaha wa mwaloni na kuvika palongolo yaki. 20 Mtumu wa kunani kwa Chapanga akamjovela, "Tola nyama na mabumunda gangali ngemeku uvika panani ya litalahu lenili. Kangi sopa msusu panani ya nyama na mabumunda." Na mwene Gidioni akakita chenicho. 21 Kangi mtumu wa kunani kwa Chapanga akagolosa ndonga yaki na kupamisa nyama na mabumunda. Chigafula motu ukahuma palitalau ukatinyisa nyama na mabumunda genago. Penapo mtumu wa kunani kwa Chapanga akahovalela.

22 Ndi Gidioni akamanya kuvya mwenuyo ndi mtumu wa kunani kwa Chapanga akavemba, "Nikita wuli, veve Bambu Chapanga wangu muni nimuwene mtumu waku wa kunani kwa mihu gangu hinu yati nifwa."

23 Nambu Bambu Chapanga akamjovela, "Utama kwa uteke, kotoka kuyogopa yati wifwa lepi." 24 Gidioni akayola maganga na akamjengela Bambu Chapanga pandu pakuwusila luteta na kupakemela, "Bambu Chapanga ndi Uteke." Pandu pakuwusila luteta penapo pavii mbaka lelu kwenuko ku Ofula, ku muji wa Vabiezeli.

25 Kilu yiyo Bambu Chapanga amjovili Gidioni, "Tola ng'ombi yigosi yimonga ya dadi waku, yila ng'ombi ya pili yeyivii na miyaka saba. Bomola pandu pakuwusila luteta kwa Baali yeavili nayu dadi waku na kudenya chimong'omng'o cha Ashela chechivili pamuhana ya pandu pa kuwusila teta. 26 Kangi, unijengela nene Bambu Chapanga, Chapanga waku, pandu pa kuwusila luteta panani ya litalawu lenili ngati cheyiganikiwa. Kangi uniwusila luteta lwa kutinyisa ya ng'ombi ya pili yila kwa kuhengela sagala zila za chimong'mong'o cha Ashela chawadenyidenyili." 27 Ndi Gidioni akatola vatumisi vaki kumi, akakita ngati chalagizwi na Bambu Chapanga. Nambu ndava muni ayogwipi valongo vaki na vandu va pabomani, ahotwili lepi kukita mambu genago muhi nambu akitili kilu.

28 Vakolonjinji va muji pavayumwiki lukela pehe valolili pandu pa kuwusila luteta pa chapanga Baali padenywili na chomong'ong'o cha Ashela yeyavii pamuhana na pandu pa kuwusila teta padenyiwi. Ng'ombi ya pili yila yatinyiswi panani ya pandu pangi pamupya pakuwusila luteta pepajengiwi penapo. 29 Vakakotana, "Yani mwakitili lijambu lenili?" Pavakitili umang'omesi vamanyili kuvya Gidioni mwana wa Yoashi ndi mwakitili genago. 30 Vandu va pamuji vamuhambili Yoashi vakamjovela, "Muleta mwana waku apa timukome, muni adenyili pandu pakuwusila luteta kwa chapanga Baali na kudenya chomong'omong'o cha Ashela yeyavili pamuhana yaki."

31 Nambu Yoashi akavajovela vandu vala vevamlandili, "Wu, nyenye mukumkengelela Baali? Wu, yati mukumsangula? Mundu yoyoha mweakumkengelela Baali akomewa mewawa kwakona kwangacha. Ngati Baali ndi chapanga, hinu, mumlekayi ajikengelela mwene muni pandu paki pa kuwusila luteta pabomolwi." 32 Ligono lenilo vampelili Gideoni lihina la Yelu Baali, mana yaki ndi, "Baali ajikengelela mwene" Muni pandu paki pa kuwusila luteta ndi pepabomoliwi.

33 Kangi Vamidiani na Vaamaleki na vandu voha vevatama kwelihumila lilanga vakonganiki pamonga vakayomboka mfueni Yolodani vakavika kambi palikemba la Yezileeli. 34 Nambu Mpungu wa Bambu Chapanga ukambwelela na kumulongosa Gidioni, na mwene akabeta lipenenga kuvakemela manjolinjoli va lukolo lwa Abiezeli vabwela vamlanda. 35 Akavatuma vajumbi pamulima woha, vahamba kuvakemela manjolinjoli voha va likabila la Manase vabwela kumlanda. Vajumbi vangi akavatuma vakavakemela vandu va makabila ga Asheli na Zebuluni na Nafutali, na vene vakabwela kuwungana nayu.

36 Gidioni akamjovela Chapanga, "Ujovi yati ukunitangatila nene kuvagombola Vaisilaeli, 37 lola nivika chikumba cha limbelele pa luvanja lwa kupepetela nganu. Ngati lukela kwivya na mbetu panani ya chikumba ndu na mulima woha ukasigalila uyumu, penapo yati nimanya kuvya yati ukunitangatila nene kuvasangula Vaisilaeli." 38 Lijambu lenilo likatimila, muni Gidioni peayimwiki lukela aweni mbetu panani ya chikumba, aminyili chikumba chenicho na manji ukamema munkeve. 39 Kangi Gidioni akamjovela Chapanga, "Pepayi, kotoka kuniyomela, nileka nikuyupa chindu chingi kangi. Niyupa nikulinga kavili kwa chikumba chichichi, niyupa chikumba ichi nduu chiyuma nambu mulima woha utepetela kwa mbetu." 40 Chapanga akitili chenicho kilu yeniyo, muni panani ya chikumba pavili payumu na mulima woha watepatili kwa mbetu.