1 Kangi Yelubaali mewawa mweakemiwi Gidioni na vandu voha vevavili pamonga nayu vayimwiki lukela, vakavika kambi yavi kunyasi papipi na chinyepa cha Halodi, na pandu pa kugona pa Vamidiani pavili upandi wavi wa ku kasikazini, ku likemba papipi na chitumbi Mole.

2 Bambu Chapanga akamjovela Gidioni, "Vandu veuvili navu ndi vamahele neju kwa nene kuvakita Vamidiani vatovewa na nyenye. Hinu Vaisilaeli valajilumba na kujova kuvya vajisangwi vene kwa makakala gavi na lepi nene ndi mwenivatangatili. 3 Hinu vakokosela vandu voha kuvya, ‘Mundu yoyoha mwana wogoyu amala mwaindendema awuya kunyumba yaki awuka pa chitumbi Gileadi.’" Hinu, vandu alufu ishilini na vavili vakawuya kunyumba yavi na kusigalila vandu alufu kumi.

4 Bambu Chapanga akamjovela Gidioni, "Vandu veuvi nawu vakona vamahele. Hinu vahelesa kuchinyepa na nene yati nikuvalinga kwenuko. Mundu yoyoha mwanikujovela, mwenuyu hamba naku, mwenuyo ahamba veve. Nambu mundu yoyoha mwanikujovela kotoka kuhamba naku ndi mundu mwenuyo akotoka kuhamba na veve." 5 Hinu, Gidioni akavatola vandu vala akavapeleka kumfuleni na Bambu Chapanga akamjovela, "Vandu vala vevinywa manji kwa kumyanga manji ngati mabwa ndi uvalekanganisa na vala vevinywa manji kwa kufugama." 6 Vandu vevanywili manji kwa kulapulila ngati mabwa ndi vavili miya zidatu. Nambu vangi voha vevasigalili vafugimi kunywa manji. 7 Bambu Chapanga akamjovela Gidioni, "Venavo vandu miya zidatu vevanywili kwa kumyanga ngati mabwa, kupitila vandu avo yati nikuvasangula Vaisilaeli yati nikuvakita Vamidiani vatovewa na veve. Nambu vangi voha vevasigalili vajovela vawuya kunyumba zavi." 8 Kangi manjolinjoli vakatola yakulya na mapenenga ga vala vevawuyayi, kangi akavalaga vahamba kunyumba zavi. Mwene asigalili na vandu miya zidatu. Pandu pa kugona pa Vamidiani pavili kulikemba.

9 Kilu yeniyo, Bambu Chapanga amjovili Gidioni, "Yumuka helela ukavatova mukambi zavi, muni nikukitili veve uvahotola. 10 Nambu ngati uyogopa kuhamba, hamba pamonga na mtumisi waku Pula uhamba ku pandu pavi pevigona. 11 Kwenuko yati uyuwana gevijova na veve yati upata makakala ga kuvatova." Gidioni akahamba pamonga na Pula mtumisi waki mbaka kula kwevatamayi valonda va kambi za Vamidiani. 12 Vamidiani na Vaamaleki na vandu voha va kwelihumila lilanga vadandasiki kulikemba, vavii vamahele ngati mambalanguli, na ngamiya zavi zangavalangika zavili zamahele ngati msavati wa kumbwani.

13 Gidioni pahikili, amyuwini mundu mmonga akumkokosela myaki njozi yaki naha, "Nalotili njozi. Naweni libumunda la Shayili libilinduka mbaka pa kambi za Vamidiani, ukalitova lindanda limonga na kuling'anamusa pahi kuvya kunani na likagona pahi."

14 Muyaki akamyangula, "Njozi yeniyo yilangisa ndi upanga wa yula Gidioni mwana wa Yoashi mundu wa Isilaeli. Chapanga amkitili avahotola Vamidiani pamonga na manjolinjoli gitu goha."

15 Gidioni payuwini ndoto ya mundu yula na udandaula waki, akamfugamila Chapanga. Kangi akawuya kukambi ya Vaisilaeli, akajova, "Muyimuka tihamba muni Bambu Chapanga atikitili tete tivatova manjolinjoli ga Vamidiani." 16 Hinu akavagava manjolinjoli vala miya zidatu misambi yidatu, kila mmonga akampela mapenenga na chihulu vyangali manji na kuvika lumuli mugati yaki. 17 Akavajovela, "Munilolokesa, mkita ngati chenikita, penihika papipi na kambi. 18 Petipula mapenenga, nene pamonga na msambi wangu, mwavoha mpula mapenenga kuhuma kila upandi na kujova kwa lwami luvaha, ‘Mtovana ndava ya Chapanga! na mtovana ndava ya Gidioni.’"

19 Pelwahegalili kilu neju, Gidioni na msambi waki wa manjolinjoli miya yimonga, vakahika pa mwishu wa kambi. Lukumbi lwenulo valonda vevavii vawukayi muni vayingila valonda vangi. Gidioni na msambi waki vakapula mapenenga na kubayula vihulu vyevakamwili mumawoko gavi. 20 Na misambi yila ivili vakakita chilachila. Mumawoko gavi ga kumangeya vakamwili milumuli na mawoko ga kulyela vakamwili mapenenga na kupyula kwa lwami luvaha, vakajova, "Mtovana kwa upanga ndava ya Bambu Chapanga na mtovana kwa upanga ndava ya Gidioni!" 21 Kila linjolinjoli ayimili pandu paki kutindila kambi. Nambu manjolinjoli va Vamidiani vatilili kwa wogohi kuni vivembeneka. 22 Vandu va Gidioni pavapyulili mapenenga gavi miya zidatu, Bambu Chapanga avakitili vamanjolinjoli va Vamidiani kila mmonga atumbula kutola upanga na kumkoma myaki. Vala vevasigalili vajumbili kutali neju mbaka ku Selela pepiyelekela Beti shita, vakahamba kutali neju mbaka kumbaka wa ku Abeli meholi papipi na Tabati.

23 Vaisilaeli va likabila la Nafutali na likabila la Asheli na likabila la Manase voha, vakemiwi vakavalanda Vamidiani. 24 Gidioni akatuma vajumbi kwoha kumulima wa hitumbi ya Efulaimu vakakokosa, "Muvajovela manjolinjoli vahelela kuvadivalila na kuvatova Vamidiani kwa kutola pandu za kuyombokela mu mifuleni hidebe na kwa mfuleni Yoludani mbaka uko ku Beti Bala." Hinu manjolinjoli voha va Efulaimu vakabwela na kutola pandu pa kuyombokela mbaka uko ku Beti Bala. 25 Vavatolili mateka vachilongosi vavili va Vamidiani, ndi Olebu na Zeebu. Vamkomili Olebu palitalau la Olebu, mewa na Zeebu vamkomili pandu pakuminyila zabibu. Kangi vayendalili kuvalandalila Vamidiani. Vampelekili Gidioni mutu wa Olebu na mutu wa Zebu, kumwambu ya mfuleni Yolodani.