1 Bambu Chapanga avalekili vandu va milima yingi ndava ya kuvalinga Vaisilaeli vangayimanya ngondo pa mulima wa Kanani. 2 Akitili chenicho muni chiveleku cha vandu va Isilaeli muni vamanyayi kutovana ngondo, avawula muni vamanya lepi kutovana ngondo. 3 Milima yeyalekiwi ndi yeniyi, vachilongosi muhanu va Vafilisiti na Vakanani voha na Vasidoni na Vahivi vevahamalili ku hitumbi ya Lebanoni kuhumila chitumbi Baali Helimoni mbaka kuhika Hamati. 4 Bambu Chapanga avalekili venavo ndava ya kuvalinga Vaisilaeli, alola ngati viyidakila malagizu gaki geampelili Musa muni vavapela vagogo vavi. 5 Hinu, Vaisilaeli vatamili pamonga na Vakanani na Vahiti na Vaamoli na Vapelezi na Vahivi na Vayebusi. 6 Vaisilaeli vagegili vasikana va makabila genago na vasikana vavi kuvagegesa vasongolo makabila genago na kufugamila michapanga ya vandu venavo.

7 Vaisilaeli vakitili uhakau palongolo ya Bambu Chapanga wavi, vakamkosewa Bambu Chapanga, Chapanga wavi na kufugamila michapanga ya Mabaali na Maashela. 8 Hinu, Bambu Chapanga akavayomela Vaisilaeli, na mwene akavakita vatovewa na Kushani Lishataimu nkosi wa Mesopotamia, ndi Vaisilaeli vamuhengili Kushani Lishataimu mulukumbi lwa miaka nane. 9 Vaisilaeli vamvembili Bambu Chapanga na mwene akavahagulila mundu wa kuvagombola ndi Otinieli mwana wa Kenazi, mbena waki Kalebu. 10 Hinu, Mpungu wa Bambu wambwelili Otinieli, na mwene akavya muhamula wa Vaisilaeli. Otinieli ahambili kungondo, na Bambu Chapanga akamuhotosa kumuhotola Kushani Lishataimu nkosi wa Mesopotamia. 11 Ndi mulima ukavya na uteke mulukumbi lwa miyaka alubaini. Mbaka Otinieli mwana wa Kenazi peafwili.

12 Kangi Vaisilaeli vahengili kangi uhakau palongolo ya Bambu Chapanga. Bambu Chapanga akampela makakala Egiloni nkosi wa Moabu avatova Vaisilaeli. 13 Nkosi Egiloni akawungana na Vaamoni na Vaamaleki, akahamba nawu kutovana na Vaisilaeli, vakavahotola na kuutola muji wa Yeliko kwa liina lingi ukemiwa muji wa mitende. 14 Vaisilaeli vakavya muuvanda wa kumuhengili Egiloni nkosi wa Moabu mumiyaka kumi na nane.

15 Nambu Vaisilaeli pavamvembili Bambu Chapanga, mwene avahagulili mundu wa kuvagombola ndi Ehudi mwana wa Gela wa likabila la Benjamini mwaihengela chiwoko cha mangenya. Vaisilaeli vamtumili apeleka njombi zavi kwa Eligoni nkosi wa Moabu. 16 Ehudi ajitengenezili upanga weutema pandi zivili, utali waki sendimita hamusini. Akaukunga muchiwunu chaki upandi wa kulyela mugati ya magwanda gaki. 17 Kangi ampelekili Egiloni njombi zila. Egiloni avi mundu mweakulupalili neju. 18 Ehudi pamalili kugotola njombi zila kwa nkosi, akavajovela vandu vevagegili njombi vawuka. 19 Nambu mwene pahikili pachimong'omong'o cha maganga gegahongoliwi papipi na ku Giligali, akamuwuyila Egiloni akajova, "Nkosi nivi na ujumbi wa chimfiyu nigana kukujovela." Nkosi akavalagiza vatumisi vaki vahuma kuvala mutileka tavete.

20 Nkosi avii atami mwene muchumba chaki cha kunani chachiyingisa mbepu, ndi Ehudi akamuhegelela na kumjovela "Nivi na ujumbi waku kuhuma kwa Chapanga." Nkosi akayima pachigoda chaki. 21 Ehudi akaholomola upanga waki kwa chiwoko chaki cha kumangeya na kumuhoma Egiloni mulutumbu. 22 Upanga wayingili pamonga na mkamulilu waki, wahumalili mumbele na mahuta gagubiki upanga wenuwo muni Ehudi aholomwili lepi. 23 Kangi, Ehudi akahuma kuvala ya chumba na akadinda milyangu wa chumba chila kwa ufunguwo. 24 Ehudi peawukili, vatumisi va nkosi vakawuya. Pavalolili milyangu yidindiwi, vaholalili pangi ahambi kundindima muchumba cha mugati. 25 Valindalili mbaka vakavya na wogoyu, pavalolili idindula lepi vakatola ufunguwo na kudindula milyangu. Vamkolili nkosi wavi agonili pahi kuni afwili.

26 Peavalindilayi, Ehudi atolwiki kupitila pachavili chimong'omong'o cha maganga, akatilila ku Seila. 27 Pahikili kwenuko ku mulima wa hitumbi ya Efulamu akabeta lipenenga lelimanyisa ngondo, ndi Vaisilaeli vakahelela pamonga nayu kuhuma kumilima yila ya hitumbi kuni mwene alongolili. 28 Akavajovela, "Munilanda, muni Bambu Chapanga avakili muvahotola vamakoko vinu Vamoabu." Vakamlanda mbaka pakuyombokela kumfuleni wa Yolodani na kupatola pandu pa kuyombokela na valekili lepi Vamoabu vayomboka hati mumonga. 29 Ligono lenilo vavakomili manjolinjoli va Vamoabu elufu kumi vevana makakala na umanya wa kutovana ngondo, kawaka hati mmonga mweavatolwiki. 30 Ligono lenilo Vaisilaeli vavahotwili Vamoabu na mulima wavili na uteke mumiyaka semanini.

31 Pahala pa Ehudi, akagelekela Shamgali mwana wa Anati, mweavatovili Vafilisiti miya sita kwa ndonga yeyihongwiki ya kuhikita ng'ombi zihamba kulongolo, na mwene mewa avagombwili Vaisilaeli.