1 Peamali kufwa Yoshua, Vaisilaeli vamkotili Bambu Chapanga, "Likabila loki pagati yitu lelilongolela kutovana na Vakanani?"

2 Bambu Chapanga akavayangula, "Likabila la Yuda ndi lelilongolela kuvahotola Vakanaani na kuutola mulima wavi."

3 Manjolinjoli va likabila la Yuda vakavajovela valongo vavi va likabila la Simeoni, "Muwungana na tete petihamba kutovana na kuutola mulima wetipewili. Na tete mewa yati tiwungana na nyenye pemwihamba kutovana na kuutola mulima wemupewa." Ndi likabila la Simeoni vakayidakila kuhamba pamonga nawu. 4 Hinu, vandu va likabila la Yuda vakahamba kuzangila, na mwene Bambu Chapanga avatangatili vavahotola Vakanani na Vapelezi, vakavakoma vagosi elufu kumi kungondo kwenuko ku Bezeki. 5 Kwenuko kumuji wa Bezeki vamkolili nkosi Adonibezeki, vakatovana nayu na kuvahotola Vakanani na Vapelezi. 6 Adonibezeki akatila, nambu vamjumbisi na kumkamula, vakamdumula magumba ga mmumawoko na mumagendelu. 7 Adonibezeki akajova, "Vankosi sabini venavadumwili magumba ga mumwoko na magendelu vanongayi masigalilu ga chakulya pahi ya meza yangu. Hinu Chapanga anilipisi ngati chanihengili." Vampeliki ku Yelusalemu na mwene akafwila kwenuko.

8 Kangi vandu va likabila la Yuda vavatovili vandu va muji wa Yelusalemu na kuutola muji wenuwo. Vavakomili vandu voha kwa mapanga na kuuyongomesa muji kwa motu. 9 Mwanakandahi manjolinjoli va likabila la Yuda vahambili kutovana na Vakanani vevatama ku milima ya vitumbi, na vangi vevatama ku mulima uyumu wa Negebu na vevavi ku mulima wa selede papipi na mbwani. 10 Pagenago, vakahamba kuvazangila Vakanani vevatama kumuji wa Hebuloni, kadeni muji wenuwo wakemiwi Kiliati Aliba, vakavahotola vandu va lukolo lwa Sheshai na Himani na Talimai.

11 Kuhuma kwenuko manjolinjoli va likabila la Yuda vahambili kutovana na vandu va muji wa Debili, kadeni apo muji wenuwo wakemiwi Kiliati Sefeli. 12 Kalebu akajova, "Mundu yoyoha mwaihotola kuvazangila na kuutola muji wa Kiliati Sefeli yati nikumpela msikana wangu Akisa avya mdala waki." 13 Hinu Otinieli, mwana wa Kenazi mbena vaki Kalebu, avatovili vandu va muji wenuwo, Kalebu amuwusili msikana waki Akisa muni agegewa na Otinieli. 14 Akisa peagegiwi na Otinieli, ligono limonga akamkulukisa Otinieli, akamjovela, "Umuyupayi dadi wangu mgunda." Akisa akwelili panani ya punda na pahulwiki Kalebu akamkota, "Ugana nikupela kyani?" 15 Akamyangula, "Nipela njombi, niyupa unipela chinyepa cha manji muni mgunda wewanipelili ku Negebu ndi payumu." Kalebu akampela chinyepa cha upandi wa kunena na kunyasi.

16 Uveleku va Keni mweavili mkohanu wa Musa, valandini na vandu wa likabila la Yuda kuhuma Muji wa Mitende mewa wewakemiwi Yeliko, mbaka ku lugangatu lwa Yuda lweluvii kusini papipi na Aladi, vakatama kwenuko pamonga na vandu va Yuda. 17 Kangi manjolinjoli va likabila la Yuda vakalongosana na valongo vavi manjolinjoli va likabila la Simioni, na vakavatova Vakanaani vevatamayi ku Sefati. Vauyongomisi njwee muji wenuwo na kung'anamusa lihina laki na kuukemela Holima. 18 Manjolinjoli va likabila la Yuda mewa vatolili miji ya Gaza na mibaka yaki, na muji wa Ashilekeloni na mibaka yaki na Ekiloni na mibaka yaki yoha yeyatindili mulima wenuwo. 19 Bambu Chapanga avili pamonga na vandu va likabila la Yuda, na vene vaukamwili mulima wa hitumbi. Nambu vavahotwili lepi vakolonjinji va milima ya selede ndava venavo vavi na mutuka za ngondo zazihutwa na falasi zavili za lyuma ndi vahotwili lepi kuvavingisa. 20 Muji wa Hebuloni wagotoliwi kwa Kalebu ngati cheavalagisi Musa. Kalebu avingili lukolo ludatu lwa chiveleku cha Anaki vevavili mwenumo. 21 Nambu vandu va likabila la Benjamini vavavingi lepi Vayebusi vevatamayi pabomani ya Yelusalemu, mbaka lelu iyi Vayebusi vitama na vandu va likabila la Benjamini bomani ya Yelusalemu.

22 Manjolinjoli va makabila ga Yosefu ndi Efulaimu na Manase vakwelili kuhamba kuuzangila muji wa Beseli, na Bambu Chapanga avi pamonga navu. 23 Vandu va makabila ga Yosefu vatumbwili hoti kuvatuma vamang'omesi vakaung'omesa muji wa Beseli. Muji wenuwo kadeni wakemiwi Luzu, 24 Vamang'omesi venavo vamuweni mundu mmonga ihuma kumuji wenuwo vene vakamjovela, "Tilangisa njila yayihamba kumuji na tete yati tikukoma lepi." 25 Akavalangisa njila yeyihamba pabomani, ndi vakayingila na kuvakoma vandu voha vevavili mwenumo. Nambu vamulekili mundu mwenuyo na vandu va munyumba yaki. 26 Mundu mwenuyo akahamila pamulima wa Vahiti, kwenuko ajengili muji weaukemili Luzu, ndi ukemiwa chenicho mbaka lelu.

27 Vandu va likabila la Manase vavavingili lepi vandu vevatamili kumiji ya Beti Sheani na hijiji yaki, na muji wa Taanaki na hijiji yaki na muji wa Doli na hijiji yaki na muji wa Ibuleamu na hijiji yaki na muji wa Megido pamonga na hijiji yaki. Ndava Vakanani vayendalili kutama kwenuko. 28 Hati Vaisilaeli pevapatili makakala vavavingili lepi Vakanani nambu vavang'ang'anisi vahenga mahengu geginonopa.

29 Mewawa vandu va likabila la Efulaimu vavavingili lepi Vakanani vevatama ku Gezeli, Vakanani vayendalili kutama kwenuko pamonga na vandu va Efulaimu.

30 Vandu va likabila la Zebuluni vavavingili lepi vakolonjinji va muji wa Kitiloni, mewa vala va muji wa Nahalali, nambu Vakanani vayendalili kutama pamonga nawu kuni vakuvang'ang'anisa kuhenga mahengu geginonopa ngati vavanda vaki.

31 Vandu va likabila la Asheli navene vavavingili lepi vandu va miji ya Ako na Sidoni na Helabu na Akizibu na Heliba na Afeka na Rehobu. 32 Vandu va likabila la Asheli vatamili pamonga na Vakanani vakolonjinji va mulima wenuwo ndava muni vavavingili lepi.

33 Vandu va likabila la Nafutali vavavingili lepi vandu va muji wa Beti Shemeshi na Beti Anati, vatamili pamonga nawu. Nambu vakolonjinji va miji yeniyo yivili vang'ang'aniswi kuvahengela Vaisilaeli mahengu geginonopa.

34 Vaamoli vavang'ang'anisi vandu va likabila la Dani vatama kuhitumbi, vavayidakili lepi kutama pamiji ya selede. 35 Vaamoli vayendalili kutama mumiji yeyavili muchitumbi cha Helesi na Aiyaloni na Shaalibimu. Nambu vandu va likabila la Manase na Efulaimu vavalongwisi na kuvang'ang'anisa Vaamoli kuhenga mahengu geginonopa.

36 Mubaka wa Vaamoli wavili kasikazini ya Sela, pandu pakuholotela pepikemewa Akalabimu.