1 Mtumu wa Bambu Chapanga awukili ku Giligali akahamba ku Bokimu, akavajovela Vaisilaeli, "Nene navawusili kumulima wa Misili na kuvaleta pamulima wenavajovili vagogo vinu kuvya yati nikuvapela, najovili naha, ‘Katu yati nidenya lepi lilaganu langu na nyenye. 2 Na nyenye navalagizi mkotoka kukita lilaganu na vandu va mulima uwu, nambu mubomola pandu pa kuwusila luteta lwavi.’ Nambu nyenye mwaniyidakili lepi nene. Ndava kyani mwakitili lijambo lenili? 3 Hinu nijova, yati nikuvavinga lepi kangi vakolonjinji va mulima uwu nambu yati vakuvang'aisa, na nyenye yati mukamliwa kuyifumila michapanga yavi." 4 Penapo Mtumu wa Bambu Chapanga pavajovili vandu va Isilaeli malovi aga, vakakwesa lwami na kutumbula kuvemba. 5 Ndi vakapakemela pandu apo Bokimu. Bokimu mana yaki vandu vevivemba. Penapo vamuwusili Bambu Chapanga luteta za kutinyiswa.

6 Yoshua pamali kuvalaga Vaisilaeli, kila mmonga ahambili pandu peapewili pavyayi paki. 7 Vaisilaeli vamuhengili Bambu Chapanga magono goha Yoshua peavii mumi hati lukumbi peamali kufwa, na mewawa lukumbi lwoha lwevatamili vagogo vevasigalili vevagaweni matendu gakulu ga Bambu Chapanga geavahengili Vaisilaeli. 8 Yoshua mwana wa Nuni na muhengaji wa Bambu Chapanga, afwili peavili na miyaka miya yimonga na kumi. 9 Vamzikili pahala peagaviwi pavya paki ku Timnati Helesi, pa mulima wa vitumbi vya Efulaimu kasikazini ya chitumbi Gaashi. 10 Kangi vandu voha va chiveleku chaki na vene vafwili, chikahumila chiveleku chingi changammanya Bambu Chapanga mewa vamanyili lepi gala gevahegili vandu va Isilaeli.

11 Hinu Vaisilaeli vamkitili gahakau Bambu Chapanga, na kufugamila vimong'omong'o vya michapanga ya udesi yeyikemiwa Mabaali. 12 Vamulekili Bambu Chapanga, Chapanga wa vagogo vavi mweavawusili kumulima wa Misili. Vakalanda vimong'omong'o vya michapanga vingi yeyafugamiwi na vandu vevavatindili na vakayigundamila. Ndava yeniyo vamuyomisi neju Bambu Chapanga. 13 Vamulekili Bambu Chapanga na kuhengela vimong'omong'o vya michapanga yeyikemiwa Baali na vimong'omong'o vya chapanga mdala mweikemiwa Ashitaloti. 14 Hinu Bambu Chapanga akavayomela Vaisilaeli, na mwene akavaleka vahiji vavanyaga vindu vyavi. Akaleka vatoviwa na makoko vevavatindili kila upandi na vahotwili lepi kujikengelela na makoko vavi. 15 Kila pavahambili kutovana Bambu Chapanga avatangatili lepi, na vatoviwi ngati chila chaavahakalili na kulapa na vene vavili muungolongondi neju.

16 Kangi Bambu Chapanaga akavapela vaamula vevavasangwili kuwuka mumawoko ga vandu vevanyagili vindu vyavi. 17 Pamonga na ago Vaisilaeli vavayuwanili lepi vahamula vavi, muni vakitili ngati vakemi kwa kulanda michapanga yingi na kuyifugamila. Vayumbatiki kuleka njila yavalandayi vagogo vavi, vevayidakili malagizu ga Bambu Chapanga, nambu vene vakitili lepi chenicho. 18 Lukumbi lwoha Bambu peavapeli vana va Isilaeli muhamula, mwene amtangatili muhamula mwenuyo akavasangula mumawoko ga makoko vavi pamagono geatamili mhamula mwenuyo. Bambu Chapanga avahengili lipyana peayuwini chivembu chavi ndava ya mang'aiso gevakitiwi. 19 Nambu lukumbi lwoha muhamula peafwili vandu vawuyalili njila zavi za kadeni, vakitili uhakau neju ya vagogog vavi. vayilandili michapanga yingi vayihengili na kuyigundamila, katu valekili lepi matendu gavi gakahau na ndindani zavi. 20 Hinu Bambu Chapanga avayomili vandu va Vaisilaeli akajova, "Ndava muni vandu ava vadenyili lilaganu lenakitili na vagogo vavi, navene vabelili kuniyidakila, 21 nene yati nikuvavinga lepi vandu va makabila gangi vala veavalekili Yoshua lukumbi lula peafwili. 22 Yati nikuvakita vandu venavo va makabila gangi vavalinga Vaisilaeli, nilola ngati vakuyiwuyila njila yangu ngati vagogo vavi amala lepi." 23 Ndi Bambu Chapanga avalekili vandu va makabila genago vasigalila mumulima, wala kuvavinga wala amtangatili lepi Yoshua kuvahotola vandu va makabila ago.